Qaçqınların və məcburi köçkünlərin problemləri beynəlxalq təşkilatların diqqət mərkəzində olmalıdır

Oktyabrın 8-də Azərbaycan Milli Elmlər Akademiyasının İnsan Hüquqları İnstitutunda "Qaçqınların və məcburi köçkünlərin hüquqları və beynəlxalq təşkilatların ikili standartları" mövzusunda tədbir keçirilmişdir.

Tədbirdə vurğulanmışdır ki, qaçqınların və məcburi köçkünlərin öz yurd-yuvasına qayıtması, onların həyat şəraitinin yaxşılaşdırılması məsələləri dövlətin ən ümdə vəzifəsidir. Bu kateqoriyadan olan insanlara qayğı və diqqət ümummilli liderimiz Heydər Əliyevin fəaliyyətinin əsas istiqamətlərindən biri idi.

İnsan Hüquqları İnstitutunun direktoru Aytən Mustafayeva bildirmişdir ki, Ermənistanın işğalçılıq siyasəti nəticəsində bir milyondan çox soydaşımız doğma torpaqlarından məhrum olaraq məcburi köçkün vəziyyətinə düşmüş, yüz minlərlə insanın hüquqları pozulmuşdur. Bütün bunlara baxmayaraq, beynəlxalq təşkilatlar Azərbaycan həqiqətlərinə ikili standartlarla yanaşır, qaçqınların və məcburi köçkünlərin problemlərinə biganəlik nümayiş etdirirlər.

A.Mustafayeva qeyd etmişdir ki, bir sıra nüfuzlu beynəlxalq qurumların üzvü olan və bu problemi daim həmin təşkilatların diqqətinə çatdıran Azərbaycan həmin istiqamətdə səylərini gücləndirməlidir. Bundan əlavə ölkə qanunvericiliyində də müvafiq dəyişikliklər edilməsinin zəruriliyini nəzərə çatdıran A.Mustafayeva günü-gündən inkişaf edən Azərbaycanda bu sahədə yeni, daha mütərəqqi qanunlara ehtiyac olduğunu söyləmişdir.

AzərTAc

Azərbaycan.- 2009.- 9 oktyabr.- S. 7.