İslam mətbəxi Beynəlxalq kulinariya festivalının iştirakçıları Heydər Əliyev Fondunda olmuşlar

Oktyabrın 9-da İslam mətbəxi Beynəlxalq kulinariya festivalının iştirakçıları Heydər Əliyev Fondunda olmuşlar.

Qonaqlara fondun fəaliyyəti barədə ətraflı məlumat verilmişdir. Bildirilmişdir ki, fondun əsas məqsədi görkəmli siyasi xadim Heydər Əliyevin zəngin irsini öyrənmək və təbliğ etməkdən, Azərbaycanın sosial-iqtisadi, mədəni tərəqqisinə yönəlmiş genişmiqyaslı fəaliyyəti barədə gələcək nəsillərdə, xarici qonaqlarda əyani təsəvvür yaratmaqdan, ölkəmizin mədəniyyəti və tarixinin geniş təbliği ilə əlaqədar aparılan işlərə kömək göstərməkdən ibarətdir.

Ümummilli lider Heydər Əliyevin respublikamıza rəhbərlik etdiyi dövrlərdə islam ölkələri ilə əlaqələrin inkişafına xüsusi diqqət yetirildiyi vurğulanmışdır. Ulu öndərin mədəniyyət, incəsənət və idmanın inkişafına göstərdiyi qayğıdan danışılmışdır.

Fondun ziyarətçiləri görkəmli siyasi və dövlət xadiminin şəxsi arxivindən götürülmüş və onun fəaliyyətinin ayrı-ayrı dövrlərini əhatə edən eksponatlara maraqla baxmışlar. Onlar dünyanın tanınmış siyasi xadimləri tərəfindən verilmiş hədiyyələrlə, ulu öndərimizin həyat və fəaliyyətindən bəhs edən kitablarla, dünyanın nüfuzlu elm, mədəniyyət və incəsənət xadimlərinin Azərbaycan dövlətinin qurucusu haqqında fikirləri ilə tanış olmuş, müxtəlif ölkələrin liderləri ilə görüşlərdə çəkilmiş şəkillərdən zəngin təəssürat almışlar.

Ekspozisiya ilə tanışlıqdan sonra qonaqlar fondun Xatirə kitabına ürək sözlərini yazmışlar.

AzərTAc

Azərbaycan.- 2009.- 10 oktyabr.- S. 7.