Azərbaycan Prezidenti İlham Əliyev "Şuşa" tankerinin istismara verilməsi mərasimində iştirak etmişdir

Azərbaycan Respublikasının Prezidenti İlham Əliyev oktyabrın 14-də "Şuşa" tankerinin istismara verilməsi mərasimində iştirak etmişdir.

Dövlətimizin başçısı mərasimdə iştirak etmək üçün Yaxt-kluba gəldi.

"Şuşa" tankerinin yan aldığı Yaxt-klubda Prezident İlham Əliyevi Dövlət Xəzər Dəniz Gəmiçiliyinin rəisi Aydın Bəşirov qarşıladı. Gəminin kapitanı tankerin istismara tam hazır olması barədə dövlətimizin başçısına raport verdi.

Gəminin xidmət və yaşayış sahələri ilə tanış olan Prezident İlham Əliyev dənizçilərin iş və həyat şəraiti ilə yaxından maraqlandı. "Şuşa" tankerinin Rusiyanın Nijni Novqorod şəhərindəki "Krasnoye Sormovo" gəmiqayırma zavodunda inşa olunması barədə dövlətimizin başçısına məlumat verildi. Bildirildi ki, tankerdən əsasən Qazaxıstan neftinin Heydər Əliyev adına Bakı-Tbilisi-Ceyhan boru kəməri ilə ixracı üçün Səngəçal terminalına daşınmasında istifadə olunacaqdır. Eyni vaxtda bir neçə növ neft və neft məhsulları daşımaq üçün nəzərdə tutulan gəmi "Prezident Heydər Əliyev" tankeri ilə eyni layihədəndir və bu tip tankerlər Xəzərdə istismar edilən ən iri gəmilərdən hesab olunur. Qeyd olundu ki, Dövlət Xəzər Dəniz Gəmiçiliyinin 6-dan çox belə tankeri vardır. "Şuşa" tankerinin yükgötürmə qabiliyyəti 13 min tona bərabərdir. Gəminin uzunluğu 150 metr, eni 17,3 metr, suya oturumu isə 7,14 metrdir. Bu tanker Dövlət Xəzər Dəniz Gəmiçiliyinin sayca 80-ci gəmisidir. Onlardan 43-ü tanker, 37-si quru yük gəmisidir.

Prezident İlham Əliyev gəminin kapitan körpüsünə baxdı. Məlumat verildi ki, ölkəyə gətirilmiş digər yeni tankerlərdə olduğu kimi, "Şuşa" tankeri də ən müasir naviqasiya avadanlığı və cihazları ilə təchiz edilmişdir. Prezident İlham Əliyev gəminin istismara verilməsini bildirən düyməni basdı.

Daha sonra dövlətimizin başçısı gəminin ən yuxarı göyərtəsinə qalxdı, tankerin heyətinə xoş arzularını çatdırdı, müvafiq tövsiyə və tapşırıqlarını verdi.

AzərTAc

Azərbaycan.- 2009.- 15 oktyabr.- S. 2.