Türkiyənin Baş naziri Azərbaycan Parlamentinin nümayəndə heyətini qəbul etmişdir

Oktyabrın 14-də Türkiyənin Baş naziri Rəcəb Tayyib Ərdoğan Ankarada səfərdə olan Azərbaycan Milli Məclisini nümayəndə heyətini və ölkəmizin Türkiyədəki səfiri Zakir Həşimovu qəbul etmişdir.

Rəcəb Tayyib Ərdoğanla görüşdən sonra jurnalistlərə açıqlama verən Milli Məclisin xarici əlaqələr komitəsinin sədri Səməd Seyidov bildirmişdir ki, Türkiyə hökumətinin başçısı ilə iki ölkə arasında əlaqələrin inkişafı, birgə görüləcək işlər, iqtisadi məsələlər, bölgənin təhlükəsizliyi məsələləri ətrafında fikir mübadiləsi aparılmışdır. Baş nazir Azərbaycan parlamentində söylədiyi fikirləri bir daha təkrar etmişdir. Azərbaycanın parlament nümayəndə heyəti bölgədəki ölkələr arasında əlaqələrin inkişafına qarşı deyildir. Biz, sadəcə bu əlaqələlərin qurulmasının Dağlıq Qarabağ probleminin həlli ilə paralel aparılmasını istəyirik.

Səməd Seyidov qeyd etmişdir ki, Azərbaycan-Türkiyə əlaqələri "bir millət, iki dövlət" fəlsəfəsi əsasında qurulmuş, indiyədək bu təməldə inkişaf etmiş və bundan sonra da bu cür davam edəcəkdir. Heç bir qüvvə ikitərəfli münasibətlərimizi poza bilməz. Bizim qəlbimizdə bir Türkiyə sevgisi, məhəbbəti vardır. Türkiyədə də Azərbaycan, Dağlıq Qarabağ sevgisi vardır. Biz bir millətik, eyni istiqamətdə fəaliyyət göstərən və siyasət yürüdən iki dövlətik. Bu görüşdə hörmətli Baş nazirdən eşitdiyimiz sözlər ümidlərimizi daha da artırdı.

Azərbaycan.- 2009.- 15 oktyabr.- S. 7.