Avropa Ədalətli Oyunlar Hərəkatının konqresi öz işini davam etdirir

Bakıda keçirilən Avropa Ədalətli Oyunlar (Fair Play) Hərəkatının 15-ci konqresi öz işini oktyabrın 15-də davam etdirmişdir.

Tədbirdə ədalətli oyunlar prinsiplərinin həyatda və idmanda tətbiqi, bu sahədə problemlər və yanaşmalar ətrafında məruzələr dinlənilmişdir.

Azərbaycan Milli Olimpiya Komitəsinin vitse-prezidenti Çingiz Hüseynzadənin "Beynəlxalq münaqişələrin tənzimlənməsində idmanın rolu" mövzusunda məruzəsi maraqla qarşılanmışdır.

Ç.Hüseynzadə bu gün idmanın müharibəyə və müharibənin idmana təsiri haqqında geniş danışmışdır. O demişdir ki, Olimpiya oyunları vasitəsilə bu gün cəmiyyətdə sülhə nail olmaq mümkündür. Münaqişələr çox zaman idmanda "fair play" prinsiplərinin pozulmasına, bəzən isə yarışların, beynəlxalq oyunların keçirilməsinə də maneçilik törədir. Ötən əsrdə iki dünya müharibəsi üç Yay Olimpiya Oyununun keçirilməməsi ilə nəticələnmişdi. Ölkələr arasında gərgin münasibətlər isə 1980-ci il Moskva Olimpiadasının bir çox dövlətlər tərəfindən boykot edilməsinə gətirib çıxarmışdır.

Müharibələr bir sıra hallarda cəmiyyətlərin idmandan, sağlam həyat tərzindən uzaqlaşması ilə nəticələnir. Ermənistanın Azərbaycana təcavüzü nəticəsində 300-ə yaxın böyük idman qurğusu, 1550 idman zalı dağıdılmışdır. Minlərlə uşaq, yeniyetmə və gənc bədən tərbiyəsi və idmandan kənarda qalmışdır.

Ç.Hüseynzadə Azərbaycanın hər zaman ədalətli oyunlar prinsiplərinə sadiq qaldığını diqqətə çatdırmışdır. O, 1997-ci ildən Azərbaycan Milli Olimpiya Komitəsinin məqsədyönlü fəaliyyəti nəticəsində Azərbaycanın dünyada idman ölkəsi kimi tanındığını söyləmişdir. Görülən işlərin nəticəsi kimi Azərbaycan bu gün həm də "fair play" prinsiplərinə riayət edən ölkələrdən biridir.

Tədbirdə Avropa Şurasının nümayəndəsi Stanislass Frossard "Millətlərarası dialoqa və sosial inteqrasiyaya idmanın töhfəsi", Polşadan olan professorlar Riçard Jukovski və Zofia Jukovskanın "Ədalətli oyunlar olimpiya təhsilində mənəvi dəyər kimi", İdman Elmləri üzrə Avropa Şəbəkəsinin prezidenti Valter Tokarskinin "Çoxmillətli cəmiyyətlərdə idman vasitəsilə münaqişələrin həlli" mövzularında məruzələri, Azərbaycan Boks Federasiyasının vitse-prezidenti Ağacan Əbiyevin, İtaliyanın Ədalətli Oyunlar Hərəkatının prezidenti Ruggero Alçanterinin və başqalarının idmanda "fair play" prinsiplərinin qorunması ilə bağlı çıxışları maraqla qarşılanmışdır.

Konqres işini oktyabrın 16-da davam etdirəcəkdir.

AzərTAc

Azərbaycan.- 2009.- 16 oktyabr.- S. 3.