Gənclər siyasətinin məqsədi sağlam və intellektual nəsil formalaşdırmaqdır

Gənclər cəmiyyətin ictimai-siyasi həyatında fəal iştirak edən aparıcı təbəqədir. Məhz buna görə dövlət gənc nəslin təhsilinin yüksəlməsinə, mənəvi tərbiyəsinə, onların sağlamlığının qorunmasına strateji əhəmiyyətli məsələ kimi baxır və bu sahələrə xüsusi qayğı ilə yanaşır.

Heydər Əliyevin Azərbaycanda həyata keçirdiyi gənclər siyasəti hazırda Prezident İlham Əliyev tərəfindən uğurla inkişaf etdirilir. Bu gün həyata keçirilən gənclər siyasəti çox geniş bir spektri - gənclərin təhsili, tərbiyəsi, sağlamlığı, intellektual və mənəvi inkişafı, asudə vaxtlarının səmərəli təşkili, ölkənin iqtisadi-siyasi və mədəni həyatında iştirakı ilə bağlı məsələləri əhatə edir. Onların intellektual potensialının inkişaf etdirilməsinə, peşəkar kadrlar kimi hazırlanmasına, vətənpərvərlik ruhlarının inkişafına, ölkənin hər yerində irəli çəkilmələrinə, quruculuq, yaradıcılıq sahələrində bilavasitə təmsil olunmalarına, yaradıcı və istedadlı yeniyetmələrin aşkar olunmasına yönəlmiş tədbirlər Gənclər və İdman Nazirliyi tərəfindən davamlı olaraq həyata keçirilməkdədir.

Dövlət başçısı İlham Əliyev tərəfindən gənclərin potensialından ölkənin mənafeyi naminə düzgün istifadə edilməsi, onların faydalı məşğulluğunun təmini, dövlət idarəçiliyi sistemində iştirakının gerçəkləşdirilməsi məqsədilə 30 avqust 2005-ci ildə "Azərbaycan Gəncliyi Dövlət Proqramı (2005-2009-cu illər)"nın təsdiq edilməsi haqqında sərəncam imzalandı. 2006-cı ildə ölkə rəhbərinin Gənclər və İdman Nazirliyinin yaradılması haqqında sərəncamında isə gənclər və idman sahəsində həyata keçirilən siyasətin səmərəliliyinin artırılması ön plana çəkildi.

Dövlət başçısının sərəncamları ilə təsdiq edilən "Xüsusi istedada malik olan uşaqların (gənclərin) yaradıcılıq potensialının inkişafı üzrə Dövlət Proqramı (2006-2010)", "2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı", "Təhsil sisteminin informasiyalaşdırılması üzrə Dövlət Proqramı (2008-2012)" və digər sənədlər gənc nəslin mütəşəkkil qüvvə kimi formalaşmasına, mənəvi cəhətdən yetkinləşməsinə, sosial problemlərinin həllinə, idmanın kütləviləşməsinə böyük təsir göstərməkdədir.

Ölkə Prezidentinin 30 iyun 2009-cu ildə imzaladığı sərəncamla təsdiq edilən "Bədən tərbiyəsi və idman haqqında" Azərbaycan Respublikasının Qanununda ölkədə bu sahədə fəaliyyətin təşkilati-hüquqi, sosial-iqtisadi əsasları və dövlət gənclər siyasətinin əsas prinsipləri müəyyənləşdirilmişdir.

1997-ci ildən ölkədə Olimpiya hərəkatının genişlənməsi, idman və bədən tərbiyəsinin tərəqqisi, daha geniş coğrafi məkanda təbliği, Azərbaycanın dünya idman ailəsinin bərabərhüquqlu üzvünə çevrilməsi sahəsində məqsədyönlü tədbirlər həyata keçirilməyə başlandı. İdmana dövlət qayğısı ilə yanaşı, onun maddi-texniki bazasının möhkəmləndirilməsi istiqamətində ciddi işlər görüldü.

Bakıda, Maştağada, Naxçıvanda, Gəncədə, Şəkidə, Bərdədə, Lənkəranda, Qubada, Şamaxıda, Qazaxda, Masallıda və digər rayonlarda dünya standartlarına uyğun 14 Olimpiya İdman Kompleksi tikilərək gənclərin istifadəsinə verildi. Hazırda daha 20 rayonda idman komplekslərinin inşası uğurla davam etdirilir.

Uzun illərin təcrübəsinə əsaslanan Azərbaycan idmançıları hər il beynəlxalq yarışlarda, dünya və Avropa çempionatlarında yüksək nəticələr göstərərək medallar qazanırlar. Bu uğurlar dövlətin həyata keçirdiyi məqsədyönlü tədbirlərin nəticəsidir. Ölkə Prezidenti "...Bizim işimiz təkcə beynəlxalq yarışlarla məhdudlaşmır", - deməklə vurğulayıb ki, idman dövlətin ən vacib hesab etdiyi sahələrdəndir. Bu istiqamətdə infrastruktur genişləndirilib, müasirləşdirilib, idmançıların həyat şəraitini yaxşılaşdırmaq, problemlərini həll etmək üçün bütün vacib tədbirlər görülüb və bu işlər davam etdirilir. "Neft ölkəsi", "Odlar yurdu" kimi tanınan ölkəmiz indi "İdman ölkəsi" adını da qazanıb.

Azərbaycanda yaradılan müasir idman infrastrukturu, inşa edilən obyektlər dünya standartlarına uyğunlaşdırılır. Mingəçevir avarçəkmə bazasının bərpası, Qusarda qış idman növlərinin və turizm infrastrukturunun yaradılması dövlətin bu sahələrin inkişafına xüsusi diqqət və qayğısının göstəricisidir.

Dövlət başçısının konsepsiyasına görə növbəti illər ərzində bədən tərbiyəsi və idman sahəsinin inkişafı üçün hüquqi, sosial və iqtisadi bazanın yaradılması, əhalinin fiziki inkişaf səviyyəsinin yüksəldilməsi, perspektivli, yüksək səviyyəli idmançıların və məşqçilərin hazırlanması sahəsində müvafiq tədbirlərin həyata keçirilməsi davam etdiriləcək. Eyni zamanda, bədən tərbiyəsi sahəsində elmi-metodiki təminat sisteminin təkmilləşdirilməsi və bu sahənin maddi-texniki bazasının inkişaf etdirilməsi, möhkəmləndirilməsi istiqamətində mühüm addımlar atılacaq. Milli yığma komandaların və idmançıların Olimpiya oyunlarına, dünya, Avropa çempionatlarına və digər beynəlxalq yarışlara hazırlığı, bədən tərbiyəsi və idmanla məşğul olanlara tibbi nəzarət və xidmətin təmin edilməsi, həmçinin beynəlxalq əlaqələrin genişləndirilməsi dövlətin diqqət mərkəzindədir.

Uşaqlar və gənclər arasında bədən tərbiyəsi və idmanın inkişaf sisteminin formalaşdırılması, təkmilləşdirilməsi, məktəbəqədər yaşlı uşaqların, ümumtəhsil məktəbi şagirdlərinin və tələbələrin fiziki tərbiyə sisteminin inkişaf etdirilməsi, yaşayış yerlərində bədən tərbiyəsi və idman işinin təşkili, əhalinin bədən tərbiyəsi, sağlamlıq və idmanyönümlü məşğələlərə cəlb olunması və digər məsələlər bu sahədə dövlətin qarşıya qoyduğu əsas məqsədlərdəndir.

Prezident İlham Əliyevin "2007-ci il "Gənclər ili" elan edilsin" sərəncamı isə dünya azərbaycanlılarının hər birinin ailəsində böyüyən gənc üçün, ilk növbədə, cəmiyyətin inkişafı, xalqın elmi-texniki, ziyalı potensialının yüksəlməsi, tərəqqisi üçün geniş şərait yaratdı.

Son illər Azərbaycanda gedən hüquqi, demokratik dövlət quruculuğu prosesində gənclərin fəallığı xeyli artıb. Onlar bu gün cəmiyyətin inkişafında fəal iştirak edir və ən mötəbər kürsülərdən sözlərini deyir. Gənclərin maraqları nəzərə alınaraq beynəlxalq səviyyəli tədbirlərdə iştirakı təmin olunur. Gənclərimiz bir çox beynəlxalq konfranslarda, seminarlarda, forumlarda hər il mütəmadi olaraq fəal iştirak edirlər.

Bu il sentyabrın 24-də Azərbaycan Prezidenti İlham Əliyev gənc nəslə növbəti diqqət və qayğının təzahürü olaraq "2009-2010-cu tədris ilində Azərbaycan Respublikasının ali məktəblərinə daxil olmuş tələbələrə Prezident təqaüdünün verilməsi haqqında" sərəncam imzaladı. Bu sərəncam yüksək bal toplamış 102 tələbəyə şamil edildi.

Azərbaycan gəncliyi dövlətin onlara göstərdiyi diqqət və qayğını yüksək dəyərləndirməklə yanaşı, öz məsuliyyətini də dərk edir. Ölkə başçısının müəyyənləşdirdiyi strateji vəzifələrin uğurla həyata keçirilməsinə, respublikamızın dinamik inkişafına töhfəsini verməyə çalışır.

Gənclər siyasəti dövlətin daxili siyasətinin mühüm tərkib hissəsidir və o, cəmiyyətin proqressiv inkişafı üçün mühüm əhəmiyyətə malikdir. Prezident İlham Əliyevin hazırda uğurla davam etdirdiyi dövlət gənclər siyasəti Azərbaycan gəncliyini daha gözəl gələcəyə istiqamətləndirməkdədir.

Adilə QOCAYEVA

Azərbaycan.- 2009.- 16 oktyabr.- S. 7.