Azərbaycan ilə Litva arasında iqtisadi, siyasi əlaqələr yüksələn xətlə inkişaf edir

Milli Məclis Sədrinin müavini, parlamentin Təbii ehtiyatlar, energetika və ekologiya məsələləri komitəsinin sədri Valeh Ələsgərov ölkəmizdə səfərdə olan Litva xarici işlər nazirinin müavini Evaldas İqnataviçus ilə görüşmüşdür.

V.Ələsgərov Milli Məclisin strukturu, fəaliyyəti, beynəlxalq əlaqələri, ölkəmizdə həyata keçirilən iqtisadi islahatlar, neft strategiyası, Dağlıq Qarabağ münaqişəsi və digər məsələlər barədə qonağa ətraflı məlumat vermişdir. O, Azərbaycan ilə Litva arasında münasibətlərin inkişafı üçün böyük potensialın mövcud olduğunu vurğulamış və həyata keçirilən müştərək layihələrdən söhbət açmışdır. Bildirmişdir ki, Azərbaycan ilə Litva arasında iqtisadi, siyasi əlaqələr yüksələn xətlə inkişaf edir.

Səmimi görüş üçün minnətdarlığını bildirən Evaldas İqnataviçus ölkəmizin onda xoş təəssürat yaratdığını və burada gedən inkişafdan məmnun qaldığını qeyd etmişdir. Qonaq ölkələrimiz arasındakı əlaqələrin mövcud durumundan razılığını bildirmiş və bunun gələcəkdə daha da genişlənəcəyinə əminliyini ifadə etmişdir.

Söhbətdə tərəfləri maraqlandıran digər məsələlər ətrafında geniş fikir mübadiləsi aparılmışdır.

Azərbaycan.- 2009.- 17 oktyabr.- S. 5.