Polis Akademiyasında Dövlət Müstəqilliyi Günü qeyd edilmişdir

Oktyabrın 16-da Daxili İşlər Nazirliyinin Polis Akademiyasında Dövlət Müstəqilliyi Gününə həsr olunmuş tədbir keçirilmişdir.

Əvvəlcə tədbir iştirakçıları bütün varlığı ilə Azərbaycana, xalqına bağlı olan, onun müstəqilliyi yolunda misilsiz fədakarlıq göstərmiş ümummilli lider Heydər Əliyevin akademiyanın həyətindəki abidəsinin önünə tər çiçəklər düzmüşlər.

Mərasimdə 1918-ci ildən başlanan və 1991-ci il oktyabrın 18-də yenidən bərpa olunan müstəqillik tariximiz, 1993-cü ildə ulu öndər Heydər Əliyevin xalqın təkidi ilə yenidən hakimiyyətə qayıdışından sonra Azərbaycanın dünyanın sivil və demokratik dövlətləri sırasına qoşulması, ümummilli liderin yürütdüyü siyasət nəticəsində əldə olunan uğurlar barədə ətraflı məlumat verilmişdir.

Vurğulanmışdır ki, respublikamızın müstəqillik yolunda qazandığı uğurlar ümummilli lider Heydər Əliyevin adı və gərgin fəaliyyəti ilə sıx bağlıdır. Məhz onun müdrik və uzaqgörən siyasəti nəticəsində xalqımız tarixin ağır sınaqlarından şərəflə çıxaraq müstəqilliyini qorumuş, möhkəmləndirmiş, əbədi və dönməz edə bilmişdir.

Tədbirdə müstəqilliyin bərpası dövründə Azərbaycanda baş verən ictimai-siyasi hadisələr barədə müdavimlərə ətraflı məlumat verilmiş, onları maraqlandıran suallar cavablandırılmışdır.

Bundan başqa, 18 oktyabr - Dövlət Müstəqilliyi Günü ilə əlaqədar akademiyanın əyani fakültəsinin əməkdaşları və müdavimlərinin Azərbaycan İstiqlal Muzeyinə ekskursiyası təşkil edilmişdir. Azərbaycan xalqının qədim zamanlardan bugünədək milli azadlıq hərəkatını işıqlandıran və ümumi fondu 20 min eksponatdan artıq olan muzeydə nümayiş etdirilən ekspozisiya müdavimlərdə böyük maraq doğurmuşdur.

Həmçinin Polis Akademiyasında Dövlət Müstəqilliyi Günü münasibətilə təşkil edilmiş viktorina zamanı müdavimlər Azərbaycanın müasir tarixi barədə verilən sualları cavablandıraraq vətənlərinin tarixi haqqında biliklərini nümayiş etdirmişlər.

AzərTAc

Azərbaycan.- 2009.- 17 oktyabr.- S. 6.