Biz həmişə xalqla bir yerdəyik

Bu gün 5000-ci sayı işıq üzü görən "İki sahil" qəzetinin hər bir əməkdaşı öz əməyi ilə müasir Azərbaycanın qurucuları sırasındadır

Əvvəlcə "İki sahil" qəzetinin yarandığı tarixə qısaca nəzər yetirək. 1965-ci ildə mətbu orqan kimi əsası qoyulmuş "Zavod həyatı" qəzeti 1991-ci il iyul ayının 10-dan "İki sahil" adı altında müstəqil ictimai-siyasi qəzet kimi fəaliyyətə başlamışdır. Qəzetin əsas məqsədi Azərbaycanın dövlət müstəqilliyinin əldə olunması, onun qorunub möhkəmlənməsi uğrunda aparılan mübarizəyə qələmin, sözün gücü ilə kömək etmək, ölkənin qarşısında duran ağır problemlərin aradan qaldırılması yollarını araşdıran insanların fəaliyyətini dolğun və obyektiv yazılarla işıqlandırmaq idi.

Bu mənada bir məqamı xüsusi vurğulamağı zəruri hesab edirik ki, "İki sahil" qəzeti fəaliyyətə başladığı ilk gündən görkəmli dövlət və siyasi xadim Heydər Əliyevi Azərbaycanı labüd məhvolma təhlükəsindən xilas edə biləcək yeganə şəxsiyyət kimi görərək onun hakimiyyətə qayıtması üçün bir tribuna rolunu oynamışdır. Qəzetdə bu mövzuda tanınmış siyasətçilərin, ictimaiyyət nümayəndələrinin çıxışları, təlqin etdikləri həqiqət ölkənin nicatının, müstəqilliyinin taleyinin məhz ulu öndər Heydər Əliyevdə olduğuna möhkəm inam yaradır, onun hakimiyyətə qayıtması üçün xalqın çağırışına-tələblərinə böyük impuls verirdi.

1990-cı illərin əvvəllərində Azərbaycanda hərc-mərcliyin baş alıb getdiyi bir dövrdə, hər gün rastlaşılan təzyiqlərin, hədələrin olduğu bir vaxtda ölkənin xilasının yeganə çarəsinin məhz Heydər Əliyevdə olduğu barədə yazılar vermək bir o qədər də asan deyildi. Qəzetin ərsəyə gəlməsində böyük xidmətlər göstərmiş Vüqar Rəhimzadənin bu istiqamətdə gördüyü işlər sonralar ulu öndər Heydər Əliyev tərəfindən yüksək qiymətləndirildi. Ölkənin ağır illərindəki dövrə nəzər salan, qəzetin o illərdəki fəaliyyətindən bəhs edən Azərbaycanın xilaskarı YAP-ın yubileyi münasibətilə keçirilmiş təntənəli yığıncaqda demişdi: "Mən hesab edirəm ki, "İki sahil" qəzeti çox iş görmüşdür. O vaxt bu qəzet çox cəsarətli yazılar verirdi. ...Biz Naxçıvanda blokada şəraitində yaşadığımız dövrdə Vüqar Rəhimzadə tez-tez Naxçıvana gələrdi və hələ Yeni Azərbaycan Partiyası yaranandan xeyli əvvəl Naxçıvanın problemləri, ədalətsiz hadisələrə qarşı Azərbaycanın ayrı-ayrı vətəndaşlarının fikirlərini dərc etməkdə yaxşı fəaliyyət göstərərdi, indi də göstərir. Mən bunu yüksək qiymətləndirirəm".

"İki sahil" qəzetinin dünyanın görkəmli siyasi xadimlərindən birindən, Azərbaycanın xilaskarından gördüyü mənəvi dəstək heç nə ilə müqayisəyə gəlməz. Amma onu da unutmuruq ki, "İki sahil" qəzetinə verilən belə yüksək qiymət bizi xalq, ölkə, dövlət üçün ən çətin məqamlarda belə öz vəzifəmizi mətbu yazılarımızla Azərbaycanın problemlərinin həllinə kömək etməkdə görmüş və bu gün də genişmiqyaslı quruculuq işləri getdiyi bir vaxtda ulu öndər Heydər Əliyevin layiqli davamçısı Prezident İlham Əliyevin uğurlu siyasətini işıqlandırmaqdan böyük qürur duyuruq.

"İki sahil" ictimai-siyasi mətbu orqanı olaraq bu istiqamətlərin hər biri üzrə öz oxucuları ilə daim ünsiyyətdədir. Qəzetin kollektivi söz və mətbuat azadlığının verdiyi imkanlardan sui-istifadə etməyi heç vaxt özünə rəva bilməyib. Biz hər kəsin şərəf və ləyaqətinin qorunmasına çalışırıq.

Yarandığı ilk gündən indiyədək "İki sahil" qəzetinin daim riayət etdiyi əsas prinsiplərdən biri mətbuatın, hər bir vətəndaşın, jurnalistin mənəvi zənginləşməsinə xidmət edən yazıların dərc edilməsi olmuşdur. Bununla bağlı bir məsələni qeyd etmək yerinə düşər ki, "İki sahil" qəzetinin baş redaktoru Vüqar Rəhimzadə Azərbaycan Mətbuat Şurası İdarə Heyətinin üzvü, Şuranın "reket" jurnalistika ilə mübarizə komissiyasının sədridir. Buna görə də bizim qəzetdə jurnalist ləyaqətinin, obyektivliyin üstün mövqe tutduğunu sübut etməyə ehtiyac qalmır. Qəzetimzin hər bir əməkdaşında belə bir fikir formalaşıb ki, bəzi mətbuat orqanlarının əməkdaşlarının söz, fikir azadlığından sui-istifadə etməsi, jurnalistlərin peşə davranış qaydalarından kənara çıxması və yüksək vəzifə sahibləri, sıravi vətəndaşlar barədə yalan, böhtan yazması yolverilməzdir, bu jurnalist prinsiplərinə, etikasına tamamilə zidd bir hərəkətdir.

Bu gün jurnalist məsuliyyətinin son dərəcə vacib bir keyfiyyət olduğu "İki sahil" qəzetinin baş redaktoru Vüqar Rəhimzadənin tez-tez diqqətə çatdırdığı tələbdir. Qəzetin yaradıcı kollektivi bu məsuliyyəti daim öz üzərində hiss edir.

Ulu öndər Heydər Əliyev jurnalistlərin zəhmətini yüksək qiymətləndirərək deyirdi: "Mən jurnalistlərə, mətbuat orqanlarında çalışanlara böyük hörmətlə yanaşıram. Sizin əməyinizi çox ağır, mürəkkəb əmək hesab edirəm. Özünü bu peşəyə həsr edənlər əsl hünər göstərirlər". - Bu sözləri "İki sahil" qəzetinin kollektivinə də aid etmək olar. Onlar bu çətin peşənin öhdəsindən şərəflə gəlirlər.

Sabah Azərbaycanın dövlət müstəqilliyi günü qeyd olunacaq. Qəzetimizin 5000-ci nömrəsinə diqqət yetirəndə aydın görünür ki, "İki sahil"in keçdiyi yol dövlət müstəqilliyinin 18 ilinin tarixidir. Bu tarix uğurla davam edir. Azərbaycan mediası, bu medianın diqqətçəkən orqanlarından biri olan "İki sahil" qəzeti tarixə güzgü tutur.

Azərbaycan Prezidenti İlham Əliyev mətbuat işçilərinin zəhmətini yüksək qiymətləndirməklə bərabər qarşıya mühüm vəzifələr qoymuşdur: "Mətbuatımız bu gün öz mütərəqqi ənənələrini davam etdirməli, cəmiyyətdəki problemləri və nöqsanları ictimai müzakirəyə çıxarmalı, demokratik proseslərin fəal iştirakçısı olmalıdır".

İftixar hissi ilə qeyd edirik ki, bu gün 5000-ci sayı işıq üzü görən "İki sahil" qəzetinin kollektivi ölkə rəhbərinin bu tapşırığına layiqincə əməl etmək əzmini nümayiş etdirir. Əminliklə deyirik ki: Biz həmişə yeni, müasir Azərbaycanın qurucularının önündə getdiyimiz kimi, bundan sonra da öz qələmimizlə ölkəmizin daha da inkişafına, iqtisadi qüdrətinin artmasına xidmət edəcəyik!

Telman QAFAR

Azərbaycan.- 2009.- 17 oktyabr.- S.7.