Ədalətli oyunların təbliğində mətbuatın rolu barədə müzakirələr aparılmışdır

Oktyabrın 16-da Bakıda Avropa Ədalətli Oyunlar Hərəkatının 15-ci konqresi işini davam etdirmişdir.

Səhər iclaslarında 6 məruzə dinlənilmişdir. Almaniyadan Volker Rosun futbolda ədalət prinsipləri ilə bağlı çıxışı iştirakçıların diqqətini cəlb etmişdir. Almaniyalı qonaq "Hörmət - futbolda "fair-play" qaydalarının açarı kimi" adlı məruzə ilə çıxış etmişdir. V.Ros futbolda ədalət qaydalarının tez-tez pozulması, hakimlərin belə hallarda rolu barədə, futbolçuların "fair-play" qaydalarına əməl etməsi, bu sahədə olan problemlərə toxunmuşdur.

Azərbaycan Güləş Federasiyasının vitse-prezidenti Cavanşir Qurbanovun "Hakimlərin gücü və məsuliyyəti", İdman Elmi və Fiziki Təhsil üzrə Beynəlxalq Şuranın prezidenti Marqaret Talbotun "Fair-play" keyfiyyət və bərabərlik üçün", Azərbaycan Milli Olimpiya Komitəsinin məsul katibi Səlhət Abbasovanın "Ədalətli oyun prinsiplərini həyat prinsiplərinə çevirək!" məruzələri dinlənilmişdir. Çıxış edənlər yarışlarda idmançılar arasında gender və sosial bərabərsizlik kimi məqamlara xüsusi toxunmuşlar. İdmanda ədalətin qələbə çalmasında təhsilin və təbliğatın böyük rolu olduğu vurğulanmışdır.

Nahar fasiləsindən sonra isə "Ədalətli oyun prinsiplərinin təbliğində mətbuatın rolu" mövzusunda müzakirələr aparılmışdır. İclasın bu hissəsini tanınmış idman jurnalisti Elnur Əşrəfoğlu aparmışdır.

Müzakirələrdə Avropa Ədalətli Oyunlar Hərəkatının vitse-prezidentləri Manfred Laemmer, Erdoğan Erpinar, İtaliya Ədalətli Oyunlar Hərəkatının rəhbəri Ruggero Alçanterini və Azərbaycanın mətbuat orqanlarının nümayəndələri iştirak etmişlər. Müzakirələr zamanı mətbuatın ədalət prinsiplərinin yayılmasında rolu, bu sahədə problemlər və çatışmazlıqlar barədə geniş fikir mübadiləsi aparılmışdır.

Azərbaycan.- 2009.- 17 oktyabr.- S. 7.