Bakıda keçirilən TÜRKSOY Daimi Şurasının 26-cı toplantısına yekun vurulmuşdur

"Bakı-İslam Mədəniyyətinin Paytaxtı-2009" mədəniyyət ili çərçivəsində "Qafqaz Point" otelində keçirilən TÜRKSOY Daimi Şurasının 26-cı toplantısına oktyabrın 17-də yekun vurulmuşdur.

TÜRKSOY Daimi Şurasının müvəqqəti əlaqələndiricisi, Azərbaycanın mədəniyyət və turizm naziri Əbülfəs Qarayev bildirmişdir ki, bu gündən etibarən qurumun fəaliyyət dairəsi genişlənəcək və təşkilat beynəlxalq status daşıyacaqdır. Bu səbəbdən də qurum Türk Mədəniyyəti Beynəlxalq Təşkilatı

(TÜRKSOY) adlanacaqdır. Beynəlxalq qanun və nizamnamələrə uyğun fəaliyyət göstərəcək təşkilatın baş direktoru isə baş katib statusunu yerinə yetirəcəkdir. Təşkilatın beynəlxalq qurumlar tərəfindən tanınması və əlaqələrinin genişləndirilməsi üçün ardıcıl addımlar atılacaqdır.

Nazir vurğulamışdır ki, bu dəyişikliklər Naxçıvan şəhərində keçirilmiş Türkdilli ölkələrin dövlət başçılarının IX zirvə görüşü zamanı nəzərdə tutulmuş məsələlərin bir növ davamıdır.

Bildirilmişdir ki, iki gün davam edən toplantıda ötən müddət ərzində təşkilatın fəaliyyəti təhlil edilmiş, TÜRKSOY-un hüquqi sənədlərinə düzəlişlər və əlavələr olunmuş, eləcə də qurumun 2010-cu il üçün fəaliyyət proqramının müzakirəsi aparılmışdır.

Toplantıda türk mədəni irsinin qorunması və inkişaf etdirilməsi ilə bağlı birgə tədbirlərin həyata keçirilməsi, türkdilli xalqların tarixi-mədəni əlaqələrinin gücləndirilməsi, ikitərəfli və çoxtərəfli əməkdaşlığın genişləndirilməsinin vacibliyi və digər bu kimi məsələlər müzakirə edilmişdir.

TÜRKSOY-un baş katibi Düsen Kaseinov qurumun türk xalqlarının daha da yaxınlaşması istiqamətində həyata keçirdiyi tədbirlər barədə ətraflı məlumat vermiş və Bakıda yekunlaşan toplantının əhəmiyyətindən danışmışdır.

Natiq vurğulamışdır ki, qurumun növbəti toplantısı 2010-cu il mayın 6-8-də Moldovanın tərkibinə daxil olan Qaqauz Yeri Muxtar Respublikasında təşkil ediləcəkdir. TÜRKSOY Daimi Şurasının müvəqqəti əlaqələndiricisi vəzifəsini isə muxtar bölgənin mədəniyyət naziri Dmitri Kambur daşıyacaqdır.

Sonra TÜRKSOY Daimi Şurasının 26-cı toplantısının yekun sənədi - Bakı Bəyannaməsi imzalanmışdır.

Sənəddə Azərbaycanın təklifi nəzərə alınaraq, TÜRKSOY-un təşkilatçılığı ilə "Ümumtürk mədəniyyətinin inkişafı strategiyası"nın hazırlanması, dünya sivilizasiyasının inkişafına əhəmiyyətli töhfə vermiş zəngin türk mədəni irsinin qorunması və dəstəklənməsi üzrə TÜRKSOY Fondunun yaradılması, qurumun Avropa Şurası, İSESKO və bir sıra digər beynəlxalq təşkilatlarla əməkdaşlıq qurması və mədəniyyətlərarası dialoqun təşviqinə dair "Bakı Prosesi"ndə fəal iştirak etməsinin vacibliyi öz əksini tapmışdır. Sənəddə, həmçinin Ermənistan tərəfindən işğal edilmiş Dağlıq Qarabağ və ətraf rayonlarda türk mədəni irsinin məhv edilməsinin pislənilməsi ilə bağlı məsələlər də yer almışdır. Bəyannamədə TÜRKSOY-un Avropa Şurasının "Sənətçilər Dialoq naminə" layihəsində iştirak etməkdə maraqlı olduğu da qeyd edilmişdir.

Tədbirdə iştirak edən TÜRKSOY-un üzvü olan Türkiyə, Qazaxıstan, Qırğızıstan, Tatarıstan, Başqırdıstan, Qaqauz Yeri və digər ölkələrdən gəlmiş nümayəndələr biri-birilərinə xatirə hədiyyələri təqdim etmişlər.

Azərbaycan.- 2009.- 18 oktyabr.- S.2.