TÜRKSOY-un təşkilatçılığı ilə "Rəssamların görüşməsi" adlı sərgi açılmışdır

Oktyabrın 16-da Muzey Mərkəzinin sərgi qalereyasında TÜRKSOY-un təşkilatçılığı ilə türkdilli ölkələrin rəssam və fotoqraflarının sərgisi açılmışdır.

Mədəniyyət və turizm naziri Əbülfəs Qarayev mərasimi açaraq bildirmişdir ki, Bakıda "Bakı İslam mədəniyyətinin paytaxtı - 2009" mədəniyyət ili çərçivəsində növbəti mühüm tədbir keçirilir. Türkdilli ölkələrin bir-birinə mədəni, həm də mənəvi yaxınlaşmasının başlıca amillərindən biri olan belə sərginin keçirilməsi bu dəfə paytaxtımıza nəsib olmuşdur.

Azərbaycan 15 ildən artıqdır ki, TÜRKSOY-un üzvüdür. Bu yaxınlarda Prezident

İlham Əliyev türkdilli ölkə rəhbərlərinin Naxçıvan şəhərində keçirilən zirvə görüşündə türk xalqlarının mədəniyyət sahəsində əməkdaşlığın, dostluğun, qardaşlığın inkişafında TÜRKSOY-un xidmətlərini yüksək qiymətləndirmişdir.

TÜRKSOY-un baş direktoru Düsen Kaseinov təşkilat adından qonaqları salamlamış və sərgiyə marağın böyük olduğundan məmnunluğunu bildirmişdir.

"Rəssamların görüşməsi" sərgisində TÜRKSOY-a üzv olan ölkələrdən 16 rəssamın 32 əsəri, həmçinin foto ustalarının 67 işi nümayiş etdirilir.

1998-ci ildən TÜRKSOY tərəfindən hər il təşkil edilən "Rəssamların görüşməsi" sərgisi, TÜRKSOY-a üzv olan 14 ölkədən - Azərbaycan, Türkiyə, Qazaxıstan, Qırğızıstan, Özbəkistan, Türkmənistan və digər ölkələrin mədəniyyət nazirləri səviyyəsində seçilən ayrı-ayrı rəssamların iştirakı ilə keçirilir.

Sərginin açılışında X TÜRKSOY rəssamlar görüşünün rəsm sərgisində qalib gəlmiş Qazaxıstan təmsilçisi mükafatlandırılmış, Qazan şəhərində keçirilən VIII Açıq Qazan fotomüsabiqəsində "Harmoniya" işinə görə, "Mənzərə" nominasiyasında 3-cü yerə layiq görülmüş həmyerlimiz Əqdəs Bağırzadəyə diplom təqdim olunmuşdur.

Tədbirdə TÜRKSOY-a üzv dövlətlərin mədəniyyət nazirləri, o cümlədən hökumət nümayəndələri iştirak etmişlər.

AzərTAc

Azərbaycan.- 2009.- 18 oktyabr.- S. 2.