Azərbaycan iqtisadiyyatı dinamik inkişaf edir

Hər bir siyasi qüvvənin fəaliyyətinə verilən ictimai qiymət azad seçkilərlə şərtlənir. Məhz bu strateji seçimin nəticəsi olaraq hər bir xalq müəyyən zaman kəsiyində milli inkişaf yolunu, tərəqqi yönümünü müəyyən edir. Çoxluğun maraq və mənafeyini öz fəaliyyətində ehtiva edən, rasional siyasət yeridərək cəlbedici proqram və ideyalarla silahlanan komandanın uğur qazanması isə qaçılmaz olur. Azərbaycan xalqı 2008-ci il 15 oktyabr tarixdə cənab İlham Əliyevi ikinci dəfə prezident seçməsi ilə populist və irreal vədlərə deyil, əməli işə, konkret nəticəyə səs vermişdir. Bu tarixi seçim xalqımızın təkamülə əsaslanan demokratik inkişaf tərəfdarı olduğunu, ölkənin taleyini yalnız konkret planlara malik, çevik, işlək və monolit komandaya etibar etdiyini bir daha nümayiş etdirmişdir.

Dövlət başçısı İlham Əliyev son 6 ildə ulu öndər Heydər Əliyev tərəfindən müəyyənləşdirilmiş iqtisadi strategiyanı inamla davam etdirərək Azərbaycanın dinamik inkişafında yeni mərhələnin əsasını qoymuşdur. Bu alternativsiz siyasətin Azərbaycana gətirdiyi böyük uğurlar respublika hüdudlarından kənarda da yüksək etimadla, rəğbətlə qarşılanır. Bir çox qabaqcıl dövlətlərin onilliklər boyu keçdiyi inkişaf və tərəqqi mərhələlərini qısa müddətdə adlayan, keçid dövrü üçün səciyyəvi olan problemlərin öhdəsindən inamla gələn respublikamızın qısa müddətdə əldə etdiyi nailiyyətlər, ilk növbədə, cənab İlham Əliyevin yüksək liderlik keyfiyyətləri ilə izah olunur. Dövlət başçısı məhz bu fenomen keyfiyyətləri sayəsində son bir ildə Azərbaycanın qlobal böhrana qarşı effektiv müqavimətini təmin etmiş, onun mənfi təsirlərinə qarşı preventiv tədbirlər həyata keçirmişdir. Bugünlərdə Kanadanın Toronto şəhərində keçirilmiş türkdilli diasporların forumunda Azərbaycan Prezidenti İlham Əliyevin yekdilliklə "İlin adamı" seçilməsi də onun fəaliyyətinin beynəlxalq aləmdə yüksək dəyərləndirildiyini deməyə əsas verir. Dövlət başçısı bu ada Yer üzündə ümumi sülhün bərqərar olması işinə böyük töhfə verən XXI əsrin görkəmli siyasi xadimi kimi layiq görülmüşdür. Forum iştirakçılarının Prezident İlham Əliyevə ünvanlanmış müraciətində onun çoxmilyonlu türk dünyasında şəksiz lider olması, bütün planetdə sülhü bərqərar etmək, Cənubi Qafqaz regionunda və onun hüdudlarından kənarda siyasi vəziyyəti sabitləşdirmək səyləri vurğulanır. Türkdilli diasporların forumunda çıxış edən nümayəndələr Azərbaycan Prezidentinin mükəmməl savada, nadir erudisiyaya malik olmasını da qeyd edərək vurğulamışlar ki, bu keyfiyyətlər onun əksər beynəlxalq tribunalardan ən müxtəlif auditoriya qarşısında nitq söyləməsinə, ölkəmiz üçün mühüm mədəni və iqtisadi layihələrə diqqəti cəlb etməsinə, hamıda həmin layihələrə maraq hissi oyatmasına kömək edir.

Müraciətdə bu uğurların əldə etdilməsində ulu öndər Heydər Əliyevin əsasını qoyduğu islahatların da əhəmiyyəti xüsusi vurğulanmışdır. Bildirilmişdir ki, islahatlar kursu sayəsində Azərbaycan Şərqdə Qərb mədəniyyətinin çiçəklənən bölgəsi, Qərbdə isə qədim Şərq sivilizasiyasına xas olan ən yüksək mənəvi və mədəni dəyərlərin mərkəzi hesab edilir.

Dövlət başçısı İlham Əliyevin dəfələrlə vurğuladığı kimi, Azərbaycanın hazırkı uğurlarının əsasında həm də ümummilli lider Heydər Əliyevin hələ respublikaya rəhbərliyinin birinci dövründə formalaşdırdığı möhkəm iqtisadi potensial dayanır.

XX əsrin 70-80-ci illərində Azərbaycanın rəhbəri olmuş ümummilli lider Heydər Əliyevin cəsarətli, uzaqgörən və müdrik siyasəti nəticəsində o dövrlərdə respublika ətrafında yaranmış süni məhdudiyyətlər qismən aradan qaldırılmışdır. Hətta həmin illərdə iqtisadiyyatı başqa müttəfiq respublikalardan xeyli geri qalan Azərbaycan qısa müddət ərzində keçmiş sovetlər ittifaqında ən qabaqcıl respublikalardan biri olmuşdu. Müdrik rəhbərin uğurlu fəaliyyəti nəticəsində Azərbaycan qısa müddətdə iqtisadiyyatın hərtərəfli inkişafına görə sovet dövlətinin müstəqil yaşamaq imkanı qazanmış iki respublikasından birinə çevrilmişdi. Ümummilli lider Heydər Əliyevin Azərbaycan və Sovet İttifaqı rəhbərliyindən getməsindən sonrakı mərhələdə isə respublika iqtisadiyyatında ciddi tənəzzül başlamış, bir çox aparıcı istehsal sahələrində, xüsusən onun aparıcı sahəsi olan yanacaq-energetika istehsalı xeyli aşağı düşmüşdü. Sovetlər imperiyası dağıldıqdan sonra qazanılan müstəqilliyin ilk 2 ilində gənc ölkənin idarə olunmasının naşı və səriştəsiz əllərə düşməsi üzündən iqtisadiyyat ağır böhran vəziyyəti ilə üzləşmişdi. Azərbaycan Prezidenti İlham Əliyev haqlı olaraq 27 yanvar 2009-cu ildə Budapeştdə keçirilmiş enerji sammitində müstəqilliyin ilk illərində neftdən səmərəli şəkildə istifadə edilmədiyini bildirmişdir: "Azərbaycanda böyük miqdarda neft və qaz hasil olundu. Lakin ölkəmiz müstəqillik əldə etdikdən sonra biz onun faydasını görmədik. Bizə qalan yalnız dağıdılmış infrastruktur, tükənmiş neft və qaz yataqları və böhran içərisində olan iqtisadiyyat oldu".

1993-cü ildə ulu öndər Heydər Əliyevin xalqın israrlı tələbi ilə hakimiyyətə qayıdışı bütün sahələrdə olduğu kimi, milli iqtisadiyyatın böhrandan uğurla çıxmasını təmin etmişdir. Ulu öndərin müstəqil ölkənin milli mənafelərinə xidmət edən siyasəti nəticəsində Azərbaycanın hərtərəfli tərəqqisinin, o cümlədən iqtisadi yüksəlişinin ən ümdə problemləri düzgün qiymətləndirilmiş və onların vaxtında həlli yolları müəyyənləşdirilmişdir. Kifayət qədər mürəkkəb şəraitdə dahi rəhbərin diplomatik səriştəsi hesabına ərsəyə gələn və tarixə "Əsrin müqaviləsi" adı ilə düşən strateji əhəmiyyətli neft kontraktlarının imzalanması isə ölkənin qarşısında duran taleyüklü vəzifələrin həllinə, zəruri iqtisadi islahatların aparılmasına, habelə Azərbaycan həqiqətlərinin dünyaya çatdırılmasına, onun beynəlxalq aləmdə nüfuzunun yüksəlməsinə əlverişli imkanlar açmışdır. Naxçıvan Muxtar Respublikasının 85 illiyinə həsr olunmuş təntənəli mərasimdə dövlət başçısı İlham Əliyevin vurğuladığı kimi, "...Məhz 1993-2003-cü illərdə ölkədə bugünkü Azərbaycanın - güclü Azərbaycanın yaradılması mümkün olmuşdur". Ümummilli liderin müstəqil respublikamıza rəhbərliyi dövründə praktik nəticələr verməyə başlayan bu iqtisadi strategiya hazırda Azərbaycan Prezidenti İlham Əliyev tərəfindən böyük məharətlə davam etdirilir. Respublikamız son illərdə ümumi daxili məhsul istehsalına görə nəinki MDB məkanında, hətta dünyada ən qabaqcıl yerlərdən birini tutur.

Nazirlər Kabinetinin 2009-cu ilin birinci yarısının sosial-iqtisadi yekunlarına həsr olunmuş geniş iclasında qeyd olunduğu kimi, hazırda bir çox aparıcı ölkələri qlobal maliyyə və iqtisadi böhran bürüdüyü halda, Azərbaycan həyata keçirilən iqtisadi siyasətin nəticəsi olaraq uğurla inkişaf edir. Əksər dövlətlərdə, o cümlədən Avropa İttifaqı ölkələrində, MDB məkanında ÜDM-in azalması müqabilində Azərbaycanda artımın müşahidə olunması kifayət qədər müsbət göstəricidir. 2009-cu ilin büdcəsində neftin bir barelinin qiymətinin 70 dollar civarında nəzərdə tutulmasına baxmayaraq, "qara qızıl"ın qiymətində müşahidə olunan ucuzlaşma respublikamızın inkişafının qarşısını ala bilməmişdir. Kifayət qədər maliyyə ehtiyatlarına malik olan Azərbaycan böhrana qarşı düşünülmüş tədbirlər həyata keçirməklə inkişafını davam etdirir.

Azərbaycan iqtisadiyyatının yüksək artımı, ilk növbədə, onun quruluşunun çoxşaxəli genişlənmə mərhələsinə keçməsi ilə şərtlənir. Xüsusən, son zamanlar sahibkarlığın məqsədyönlü inkişafına dövlət tərəfindən daha yüksək dəstək verilməsi, onun istehsalyönümlü fəaliyyətinin təşviqi, istər yerli, istərsə də xarici iş adamları üçün münbit şəraitin yaradılması yerli imkanlar əsasında iqtisadiyyatın çoxşaxəli inkişaf istiqamətinin təşəkkülünə səbəb olmuşdur. Bu yöndə genişlənən inkişaf meyili davamlı xarakter almış, 2009-cu ilin birinci yarısında qeyri-neft sektorunda artım 4,1 faiz təşkil edərək ÜDM artımını xeyli üstələmişdir.

Dünyanın əksər ölkələrinin keçdikləri yüksək tərəqqi yolu göstərir ki, onların hər birinin iqtisadi inkişaf strategiyasının xeyli özünəməxsusluğı var. Qabaqcıl ölkələrə xas olan cəhətləri öyrənərkən onlarda nəzərə çarpan fərqlər qabarıq üzə çıxır. Hər bir dövlətin öz adı ilə başqalarından seçilməsi üçün "iqtisadi inkişaf modelləri" (Amerika, Almaniya, Yaponiya, İsveç və s. modelləri) anlayışından istifadə edilir. Müxtəlif ölkələrin inkişaf əlamətləri öyrənildikcə belə modellərin sayını da xeyli artırmaq olar. Əslində isə bütün modellər ümumi əlamətlərinə görə bir-birinə çox oxşar, bəzi hallarda hətta eynidirlər. Lakin istənilən ölkənin iqtisadi inkişaf istiqaməti və durumu onun imkanlarına və şəraitinə müvafiq olur və yalnız bu cəhətlərinə görə başqalarından fərqlənir. Bəzən isə oxşar imkan və şəraitə malik ölkələr qarşılıqlı təsir və nümunələr zəminində özlərinə xas iqtisadi inkişaf modeli müəyyən edirlər. Azərbaycanın daxili istehsal potensialını düzgün dəyərləndirən ulu öndər Heydər Əliyev ölkənin uzun dövr üçün mükəmməl ümumi iqtisadi inkişaf modelini əsaslandırmışdır. Respublikamızın iqtisadi inkişaf modeli bir sıra cəhətlərinə görə başqalarına nəinki bənzəmir, həm də müəyyən üstünlükləri ilə seçilir. Bu modelin ən üstün tərəflərindən biri də sərbəst inkişaf etmək üstünlüyüdür. Azərbaycan iqtisadiyyatı başqa ölkələrdən az asılı olmaqla, əsasən daxili imkanları hesabına inkişaf edən dövlətlərdən biridir. Azərbaycan Prezidenti İlham Əliyev 2009-cu il aprel ayının 28-də Belçika Krallığına səfəri zamanı Avropa Komissiyasının sədri Jozef Monuell Barrozu ilə birgə keçirdiyi mətbuat konfransında jurnalistin verdiyi suala cavab olaraq demişdir: "Azərbaycan güclü iqtisadi potensiala malik olan və özünü təmin edən ölkədir. Azərbaycan müstəqil ölkə kimi yaşamaq və uğurla inkişaf etmək qabiliyyətini artıq nümayiş etdirmişdir".

Respublikamızın heç bir dövlətdən asılı olmayan iqtisadi inkişaf modeli onun uzunmüddətli, hərtərəfli, həmahəng tərəqqisinin ən bənzərsiz tərəfidir. Belə keyfiyyət dünyanın hətta ən qabaqcıl ölkələrinə də müyəssər olmamışdır. Bu cəhətdən Azərbaycan hətta Avropa İttifaqı və Asiyanın yeni sənaye dövlətlərinə, habelə dünyanın bir sıra başqa inkişaf etmiş ölkələrinə nisbətən daha mükəmməl və etibarlı iqtisadi sistemə malikdir. Məsələ ondadır ki, hazırda dünyanın bir sıra nüfuzlu ölkələrinin iqtisadiyyatları möhkəm təməli olmayan dayaqlar üzərində qurulmuşdur. Həmin ölkələrin istehsal sahələri əsasən başqa yerlərdən gətirilən enerji-xammal əsasında inkişaf edir. Ölkələr arasında münasibətlərin hər hansı bir səbəbdən pozulması onların iqtisadiyyatını iflic vəziyyətinə salır.

Azərbaycanda isə milli mənafelərə cavab verən müstəqil inkişaf üçün bütün sərvətlər var. Onların hamısını sadalamaq mümkün olmadığından, ancaq əsaslarını (müstəqil ölkə iqtisadiyyatı üçün çox əhəmiyyətli sayılan) xatırlatmaq kifayət edər. Respublika böyük sənaye ehtiyatları olan yanacaq, zəngin alternativ enerji mənbələri, dəmir filizi, alüminium xammalı, mis, qızıl, gümüş, sink, molibden, bentonit, dolomit, müxtəlif kimya xammalı, 200-ə qədər təbii tikinti yataqları, habelə yüksək inkişaf etmiş aqrar sahə məhsulları (pambıq, ipək, yun, gön-dəri) və digər ehtiyatlara malikdir. Məhz bu baxımdan Azərbaycan müstəqil iqtisadiyyatın təşkilinin bütün əsas tələblərinə cavab verən yanacaq-enerji sənayesinin, qara və əlvan metallurgiyanın, maşınqayırmanın, kimya, tikinti, yüngül, yeyinti və digər istehsal sahələrinin yüksək səviyyədə inkişafına qadirdir.

Azərbaycanda təbii sərvətlərin çoxluğu və müxtəlifliyi, respublikanın son dərəcə əlverişli coğrafi mövqeyi, ölkənin yığcam ərazisində əhalinin nisbətən yüksək təbii artımı, onun məşğulluq siyasətinin səmərəli təmin edilməsi milli iqtisadiyyatın hərtərəfli inkişafını zəruri edir. Buna görə də düşünülmüş, elmi əsaslara söykənən Azərbaycan iqtisadiyyatının quruluşu, ilk növbədə, respublikanın ümdə problemləri ilə əlaqələndirilir, onun fəaliyyətinin yeni əhəmiyyətli keyfiyyət tərəfləri üzə çıxarılır. Məsələn, hazırda Azərbaycanda istehsal edilən məhsullar əsasən onun özündə istifadə olunur. Bu da kəskin dünya maliyyə böhranı fəsadlarının mənfi nəticələrinin Azərbaycan iqtisadiyyatına təsirini minimuma endirir.

Bununla yanaşı, Azərbaycan daha yüksək iqtisadi inkişaf üçün dünya birliyi ölkələrinin imkanlarından da səmərəli istifadə edilməsinə böyük önəm verir. Bu, respublikanın qlobal və regional səviyyədə mövqelərinin möhkəmlənməsinə, nüfuzunun artmasına, beynəlxalq aləmdə ölkənin iqtisadi əlaqələrinin genişlənməsinə imkan yaradır. Ölkə iqtisadiyyatının ümumi inkişaf səviyyəsi yerinə yetirdiyi əhəmiyyətli funksiyalar nəticəsində daha da yüksəlir, yeni inkişaf istiqamətləri yaranır. Müstəqillik dövründə inkişaf potensialı getdikcə artan Azərbaycan iqtisadiyyatı ilk dövrlər daha çox yüksək sosial tutumlu olmuşdursa, hazırda həm də investisiya yönümlüdür. Artıq bir neçə ildir ki, daxili investisiyalar xarici investisiyaları xeyli üstələyir. Son 5 ildə iqtisadiyyatın inkişafına qoyulan sərmayənin 53,2, bu ilin ötən 6 ayında isə 77 faizi əsas kapitala yönəldilmiş investisiyalar təşkil edir. Qabaqcıl dünya ölkələrinin təcrübəsindən məlumdur ki, onların iqtisadi modellərinin ən əhəmiyyətli tərəflərindən birini məhz bu cəhət təşkil edir. İqtisadi cəhətdən inkişaf etmiş ölkələrdə daxili investisiyaların böyük həcmi onlara, ilk növbədə, öz tələbatlarına uyğun istehsal sahələrini, infrastrukturun bütün əsas növlərini yaratmağa imkan verir. Bu amil Azərbaycanın həmahəng sosial-iqtisadi inkişafı, xüsusən keçmişdən miras qalmış məhsuldar qüvvələrin qeyri-bərabər ərazi təşkilinin nizamlanması baxımından son dərəcə əhəmiyyətlidir. Məhz bu baxımdan indi regionların inkişafında mümkün tarazlığı təmin etmək istiqamətində müəyyən addımlar atılır.

Ölkə iqtisadiyyatının hərtərəfli inkişafı baxımından qeyri-neft sektorunun respublika üçün xüsusi əhəmiyyət kəsb edən sahələrinin yaradılması prosesi son vaxtlar daha böyük miqyas almışdır. "Azərbaycan Respublikası regionlarının sosial-iqtisadi inkişafı (2004-2008-ci illər) Dövlət Proqramı"nın uğurla həyata keçirilməsi nəticəsində regionlarda infrastruktur müasir tələblər səviyyəsində yenidən qurulmuş, müxtəlif istehsal sahələri yaradılmışdır. Azərbaycan Prezidenti İlham Əliyevin 14 aprel 2009-cu il tarixli sərəncamı ilə təsdiq edilmiş "Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı" isə regionların növbəti mərhələdə inkişafına yeni imkanlar açmışdır. Ümumiyyətlə, cənab İlham Əliyev respublika iqtisadiyyatının hərtərəfli inkişafı üçün regionlarda məhsuldar qüvvələrin yerli imkanlar əsasında güclü artımına xüsusi əhəmiyyət verir. İldən-ilə iqtisadi potensialı və qüdrəti artan Azərbaycanın dünya birliyi ilə əlaqələri onun üçün münasib olan fəal inteqrasiya əsasında qurulur. Bu münasibətlər Azərbaycanın özünü təminetmə məqsədlərini yerinə yetirdikdən sonra əsas ixrac əməliyyatlarını gücləndirmək hesabına təmin edilir. Bu gün Azərbaycan iqtisadiyyatı əsas inkişaf tələblərinə görə dünya bazarından asılı deyildir. Əksinə, başqa ölkələr bir sıra mühüm strateji məhsulların təminatına görə Azərbaycandan bu və digər dərəcədə asılıdır.

Təbii qaz və enerji təminatına görə son illərə qədər başqa ölkələrdən asılı olan Azərbaycan istehsalı genişləndirməklə hazırda özünün enerji təhlükəsizliyini təmin etmişdir. 2008-ci ildə respublikamızda kondensat da daxil olmaqla, neft və qaz hasilatı 2000-ci ilə nisbətən 3 dəfə, elektrik enerjisi istehsalı 8 faiz artmışdır. Bir çox rayonlarda - Astarada, Xaçmazda, Şəkidə, Naxçıvanda və Şirvanda yeni elektrik stansiyaları istifadəyə verilmişdir. Hazırda Sumqayıt və Qubada da belə stansiyalar tikilir. Müstəqilliyin ilk illərində Naxçıvan Muxtar Respublikası əsasən Türkiyə və İrandan alınan elektrik enerjisi ilə təmin olunurdusa, hazırda buradan Türkiyəyə böyük miqdarda enerji ixrac edilir.

Azərbaycanın nəqliyyat təhlükəsizliyi də yüksək səviyyədə təmin olunur, ərzaq təhlükəsizliyi məsələsi həllini tapır. Respublikamız indi əsas kənd təsərrüfatı məhsulları ilə öz tələbatını ödəyir. Lakin bu cəhətdən ölkənin imkanları hələ xeyli böyükdür. Azərbaycan bir çox mühüm ərzaq məhsulları ilə ixrac imkanlarını artıra bilər. Bu sahədə respublikanın əlverişli imkanlarından bəhrələnmək üçün fermerlərin biliyini və ümumi səviyyəsini yüksəltmək, kənd təsərrüfatının idarəolunmasını təkmilləşdirmək yolu ilə əkinçilik mədəniyyətini elmi əsaslarla aparmaq, onun quruluşunu yaxşılaşdırmaq hesabına kənd təsərrüfatı sahələrinin məhsuldarlığını artırmaq qarşıda duran vacib məsələlərdəndir.

Geniş miqyas alan qloballaşma, müəyyən fasilələrlə təkrar olunan iqtisadi və maliyyə böhranları şəraitində planetin inkişaf qaydaları, habelə bununla əlaqədar yaşayış tərzi bir sıra istiqamətlərdə dəyişikliklərə məruz qalmışdır. Xüsusən, dünyada təbii sərvətlərin son dərəcə qeyri-bərabər paylandığı, onların getdikcə tükəndiyi bir şəraitdə bəşəriyyətin yüksək inkişafa və böyük rifaha göstərdiyi ümumi səylər artmışdır. Çağdaş dövrün əsas tələblərindən biri də ölkələr arasında səmərəli və etibarlı qarşılıqlı əlaqələri genişləndirməkdən ibarətdir. Azərbaycan bu cəhətdən beynəlxalq əlaqələrini getdikcə genişləndirir.

Nazirlər Kabinetinin 2009-cu ilin birinci yarısının sosial-iqtisadi inkişafının yekunlarına həsr olunmuş iclasında Azərbaycan Prezidenti İlham Əliyev demişdir: "Biz artıq uzun illərdir ki, dünyada etibarlı tərəfdaş kimi qəbul edilirik, beynəlxalq təşkilatlarla əməkdaşlığımız uğurludur və qarşılıqlı maraqlar üzərində qurulmuşdur. Biz bütün ölkələrlə münasibətlərimizi qarşılıqlı maraqlar, qarşılıqlı hörmət, bir-birimizin daxili işlərinə qarışmamaq prinsipləri əsasında qururuq və əminəm ki, bu, beynəlxalq əlaqələrdə yeganə mümkün olan prinsipdir".

Xarici iqtisadi əlaqələrin səmərəli qurulması əsasında bir çox ölkələr öz zəruri tələblərinə müvafiq istehsal sahələrini yaratmaq üçün vacib xammal və materiallara olan ehtiyaclarını ödəyir, yeni texnologiyalarla təmin olunur, habelə investisiyaları cəlb edə bilərlər. Azərbaycan müstəqillik illərində daxili imkanlardan düzgün istifadə etməklə milli mənafelərə cavab verən sərbəst iqtisadiyyatını yaratmaqla yanaşı, dünya birliyinin nüfuzlu və yüksək etibar qazanmış ölkəsinə çevrilmişdir. Bunu Azərbaycana səfər edən dövlət və hökumət başçılarının, beynəlxalq qurumların, xarici şirkətlərin rəhbərlərinin, ekspertlərin qənaətləri, qlobal maliyyə böhranının təsirinin respublikamızda ciddi hiss olunmaması ilə bağlı fikirləri də təsdiqləyir. Dünya Bankının "Doung Business" hesabatında Azərbaycanın islahatçı ölkə kimi tanınması və bugünlərdə Dünya İqtisadi Forumunun, Dünya Bankının, habelə Beynəlxalq Maliyyə Korporasiyasının hazırladığı "Sahibkarlıq fəaliyyəti üçün əlverişli şərait" reytinqinə görə Azərbaycanın 183 ölkə arasında 38-ci yeri tutması onun beynəlxalq aləmdə cəlbediciliyini daha da artırmışdır.

Azərbaycan yüksək iqtisadi göstəricilərə və digər üstünlüklərə malik dövlət kimi ümumi tərəqqiyə və əmin-amanlığa xidmət edən əməkdaşlığı daim genişləndirmək əzmindədir. Respublikamızla əlaqədar bəzi taleyüklü məsələlərin həllində obyektiv mövqedən çıxış etməyən, ikili standartlara yol verən Avropanın bir sıra dövlətlərindən fərqli olaraq, Azərbaycan ədalətli əməkdaşlığın sarsılmaz qaydalarına riayət edərək ümumi əmin-amanlıq naminə beynəlxalq vəzifələrini ləyaqətlə yerinə yetirir. Ölkə başçısı İlham Əliyev 27 yanvar 2009-cu ildə Budapeşt enerji sammitində çıxış edərkən Avropada səmərəli enerji sistemi yaradılmasının əhəmiyyətindən söz açmışdır: "Bizim enerji siyasətimiz və fəlsəfəmiz ondan ibarətdir ki, enerji məsələləri xalqları ayırmalı deyil, birləşdirməlidir. Enerji məsələləri siyasi təzyiq və böhtan aləti kimi istifadə edilməli deyildir. Bizim siyasətimiz, təcrübəmiz və Azərbaycan tərəfindən atılmış praktiki addımlar, - əminəm ki, istehsalçılarımız və tranzit ölkələr bunu etiraf edə bilərlər - göstərir ki, tərəfdaşlığa və dərhal maliyyə nəticələrinə yönəlmiş siyasət bir çox uğurlar göstərəcəkdir".

Azərbaycan həmişə yüksək qiymətləndirdiyi beynəlxalq əməkdaşlıq ənənələrinə bundan sonra da sadiq qalacaqdır. Hazırda dünyanın üzləşdiyi böyük problemlərdən biri Avropanı etibarlı enerji mənbələri ilə təmin etməkdən ibarətdir. Azərbaycan sülh və dostluğa söykənən davranış qaydalarına, qəbul edilmiş ümumi tərəfdaşlıq prinsiplərinə sadiq qalaraq bu sahədə öz imkanlarından maksimum səmərəli istifadə etmək əzmindədir.

Asəf NADİROV,

akademik

Azərbaycan.- 2009.- 20 oktyabr.- S. 4.