Ədliyyə Akademiyası hakimliyə namizədləri kursa cəlb edir

Mətbuatda xəbər verildiyi kimi, çoxmərhələli şəffaf və mütərəqqi prosedurlar əsasında keçirilən hakim vəzifəsinə namizədlərin seçimi zamanı test, yazılı və şifahi imtahanlardan uğur qazanmış 80 nəfər növbəti mərhələyə - ilkin uzunmüddətli tədris kurslarına buraxılmışdır.

Hakimliyə namizədlərin tədrisi Ədliyyə Akademiyasına həvalə olunmuşdur.

Ədliyyə Nazirliyinin mətbuat xidmətindən bildirmişlər ki, oktyabrın 19-da həmin kursun təntənəli açılışı olmuşdur. Tədbirdə ilk mühazirə ilə çıxış edən Məhkəmə-Hüquq Şurasının sədri, ədliyyə naziri Fikrət Məmmədov ümummilli lider Heydər Əliyev tərəfindən əsası qoyulmuş və Prezident İlham Əliyevin rəhbərliyi ilə həyata keçirilən uğurlu məhkəmə-hüquq islahatlarından danışaraq, məhkəmə sisteminin müasirləşdirilməsi, hakimlərin müstəqilliyinin təmin olunması, əhalinin məhkəmələrə inamının gücləndirilməsi və müraciət imkanlarının asanlaşdırılması üzrə işləri xüsusi vurğulamışdır. F.Məmmədov ilk dəfə olaraq Ədliyyə Akademiyasında ədliyyə işçilərinin, vəkillərin, prokurorların peşəyə buraxılışı məqsədi ilə icbari təlimlərin, həmçinin hakimlərin davamlı və hakimliyə namizədlərin uzunmüddətli tədris kurslarının təşkil olunmasının əhəmiyyətini qeyd etmişdir. Bu tədbirlərin hüquqi xidmətlərin keyfiyyətinin artırılmasına, ədalət mühakiməsinin ən yüksək səviyyədə həyata keçirilməsinə xidmət edəcəyini bildirərək, kursa başlayan hakimliyə namizədlərə uğurlar arzulamışdır.

Akademiyada tədris olunacaq kursun proqramı müasir metodika və beynəlxalq təcrübə nəzərə alınmaqla hazırlanmışdır. Namizədlərin hakim olmaq üçün lazımi biliyə və peşə hazırlığına yiyələnmələrinə xüsusi diqqət yetirilərək, proqrama ən aktual, o cümlədən insan haqları, xüsusilə, İnsan Hüquqları üzrə Avropa Məhkəməsinin presedentləri, habelə məhkəmə etikası, korrupsiya ilə mübarizə, milli qanunvericiliyin yenilikləri və digər məsələlərə dair mövzular daxil edilmişdir. Müxtəlif məhkəmələrdə bir neçə aylıq staj keçilməsi də nəzərdə tutulur.

Kursda yüksək məhkəmə hakimlərinin, görkəmli alimlərin, zəngin biliyə və təcrübəyə malik olan şəxslərin, habelə nüfuzlu xarici mütəxəssislərin mühazirələri təşkil olunacaqdır. Kurs çərçivəsində hakimliyə namizədlərin xarici ölkələrdə təcrübə keçməsi də planlaşdırılır.

Azərbaycan.- 2009.- 20 oktyabr.- S. 6.