Azərbaycanla Ukrayna arasında əlaqələrin daha da genişləndirilməsi üçün geniş imkanlar var

Oktyabrın 20-də Milli Məclis Sədrinin birinci müavini, parlamentin Təhlükəsizlik və müdafiə komitəsinin sədri Ziyafət Əsgərov ölkəmizdə səfərdə olan Ukraynanın Sum vilayətinin nümayəndə heyəti ilə görüşdü. Qonaqları salamlayan Ziyafət Əsgərov Azərbaycanla Ukrayna arasında əlaqələrin çox yüksək səviyyədə olduğunu qeyd etdi. Ziyafət Əsgərov Azərbaycan-Ukrayna əlaqələrinin strateji tərəfdaşlıq səviyyəsinə çatmasında dövlət başçılarının siyasi iradəsini xüsusi qeyd etdi.

Görüşdə bildirildi ki, ölkələrimiz arasında əlaqələrin daha da genişləndirilməsi üçün geniş imkanlar var. Dövlətlərimizin başçılarının qarşılıqlı səfərləri zamanı imzalanmış çoxsaylı sənədlər münasibətlərimizin hərtəfərli inkişafı üçün möhkəm hüquqi baza və zəmin yaradıb.

Ziyafət Əsgərov Milli Məclisin fəaliyyəti barədə də qonaqlara ətraflı məlumat verdi. Bildirdi ki, Milli Məclisdə formalaşdırılan ən böyük işçi qruplarından biri Azərbaycan-Ukrayna parlamentlərarası əlaqələr üzrədir.

Görüş və yüksək qonaqpərvərlik üçün təşəkkürünü bildirən Ukraynanın Sum vilayəti sovetinin sədri Vladimir Tokar dedi ki, Ukrayna Azərbaycan ilə əlaqələrin daha da genişləndirilməsində maraqlıdır. Səfərin əsas məqsədi də ikitərəfli, qarşılıqlı əməkdaşlığın daha da genişləndirilməsi, iqtisadi, mədəni, ticarət əlaqələrinin inkişaf perspektivinə dair fikir mübadiləsi aparmaqdır. Nümayəndə heyəti artıq Mingəçevirdə olub və səmərəli görüşlər keçirib.

Azərbaycanda orta təhsil aldığını qeyd edən Vladimir Tokar bildirdi ki, Bakı, eləcə də Azərbaycanın bölgələri misilsiz inkişaf edib. Ölkənin hər yerində tikinti-quruculuq işləri həyata keçirilir. Bu, ölkənin güclü iqtisadi inkişafından xəbər verir.

Görüşdə hər iki ölkənin ayrı-ayrı regionları arasında əlaqələrin inkişafının, qarşılıqı səfərlərin intensivləşdirilməsinin vacibliyi qeyd olundu, qarşılıqlı maraq doğuran məsələlər ətrafında geniş fikir mübadiləsi aparıldı.

Azərbaycan.- 2009.- 21 oktyabr.- S. 5.