Azərbaycan-Misir əlaqələrinin inkişafı üçün geniş potensial imkanlar var

Əlaqələrimizin uzun tarixi var. Xalqlarımız əsrlər boyu əməkdaşlıq etmişlər. Lakin yalnız müstəqillikdən sonra Azərbaycan beynəlxalq birliyin üzvünə çevrildi və biz aramızda ikitərəfli münasibətlər qurmağa başladıq.

Bu günə qədər bizim çox yaxşı nailiyyətlərimiz, çox möhkəm siyasi dialoqumuz, güclü iqtisadi inkişaf üçün yaxşı perspektivlərimiz və humanitar sahədə əməkdaşlıq imkanlarımız olubdur.

İlham ƏLİYEV

Süətli inkişaf tempinə görə bir çox dövlətləri üstələyən Azərbaycanda bu gün aparılan məqsədyönlü, siyasət respublikamızın dünya dövlətləri arasında yerini daha da möhkəmləndirir. İstər ölkə daxilində, istərsə də respublikadan kənarda yürüdülən siyasət nəticəsində əldə edilən nailiyyətlər ardıcıl xarakter alır, əsası ümummilli lider Heydər Əliyev tərəfindən qoyulan inkişaf strategiyası uğurla həyata keçirilir. Azərbaycan Prezidenti İlham Əliyevin yürütdüyü dolğun siyasət və dünya ölkələri ilə əməkdaşlıq nəticəsində həm daxili, həm xarici imkanlarımız xeyli genişlənir. Son illər Azərbaycan beynəlxalq aləmdə özünə layiqli yer tutur. Müstəqillik əldə edildikdən sonra dünyanın inkişaf etmiş dövlətləri ilə əməkdaşlığın yaradılması xarici siyasətin əsas prioritetlərini təşkil edir. Bu baxımdan Misir Ərəb Respublikası da mühüm yerlərdən birini tutur. 1994-cü ildə ümummilli lider Heydər Əliyevin, 2007-ci ildə Azərbaycan Prezidenti İlham Əliyevin Misirə rəsmi səfərləri iki ölkə arasında siyasi, iqtisadi və mədəni əlaqələrin genişlənməsinə səbəb olub.

2007-ci ilin mayında Azərbaycan Prezidenti İlham Əliyev Misir Ərəb Respublikasına səfər etmişdi. Səfər zamanı Misir və Azərbaycan respublikaları arasında bir çox sənədlər imzalanmışdı. Azərbaycan Respublikasının Abşeron rayonu və Misir Ərəb Respublikasının Qalubiyyə vilayəti arasında dostluq və əməkdaşlığa dair anlaşma memorandumu da həmin sənədlərdəndir. Anlaşma protokolundan sonra Misirdən bir qrup nümayəndə heyəti Abşeron rayonunda olmuşdur. Memorandumun şərtlərindən biri də Misirdə Azərbaycan parkının yaradılması, orada ulu öndər Heydər Əliyevin abidə kompleksinin ucaldılması və həmin küçəyə ölkəmizin adının verilməsi idi. Eyni zamanda, Abşeron rayonunda Qalubiyyə küçəsi salınmalı, park yaradılmalı və orada Misir Prezidenti Hüsni Mübarəkin heykəli qoyulmalı idi. Artıq bu şərtlər yerinə yetirilib.

2008-ci ilin sentyabrında Abşeron rayonunda olarkən Misirin birinci xanımı Syuzan Mübarək bu şəhərdə Misirin Qalubiyyə şəhərinin adını daşıyan küçədə yerləşən Azərbaycan-Misir parkında oldu. Misirin birinci xanımı parkın mərkəzində Hüsni Mübarəkin şərəfinə ucaldılan abidəni ziyarət etdi, onun adını daşıyan Xırdalan şəhər 9 nömrəli ərəbtəmayüllü orta məktəbdə oldu. Syuzan Mübarək onun adını daşıyan bu təhsil ocağında olmasından fərəh duyduğunu deyərək ölkəsində də Azərbaycanın birinci xanımı Mehriban Əliyevanın adını daşıyacaq məktəbin inşa olunacağını söyləmişdi. Misirin birinci xanımı məmnun qaldığını bildirərək qeyd etmişdi ki, bu təhsil ocağı ölkələrimiz arasında əlaqələrin daha da inkişafına təkan verəcəkdir. Azərbaycanı Misirə sıx dostluq və qardaşlıq telləri bağlayır. Bu münasibətlərin təməli iki dahi şəxsiyyət - Azərbaycan xalqının ümummilli lideri Heydər Əliyev və Misir Prezidenti Hüsni Mübarək tərəfindən qoyulmuşdur.

Həmin dövrdən başlayaraq iki qardaş şəhər arasında yüksək səviyyəli səfərlər və görüşlər keçirilir. Belə görüşlərdən biri də Abşeron rayonunun icra başçısı Zakir Fərəcovun rəhbərlik etdiyi nümayəndə heyətinin bu günlərdə Misirə növbəti səfəridir.

Nümayəndə heyəti öncə 15 milyon əhalisi olan Qalubiyyə vilayətindəki 7 hektarlıq ərazidə salınan Azərbaycan- Misir dostluq parkına gələrək ümummilli lider Heydər Əliyevin abidəsini ziyarət etdi. Sonra nümayəndə heyəti Qalubiyyə şəhərində Heydər Əliyev Fondunun prezidenti, YUNESKO və İSESKO-nun xoşməramlı səfiri Mehriban xanım Əliyevanın adını daşıyacaq məktəbin açılışında iştirak etdi. Onu da qeyd edək ki, Misirdə ilk dəfədir xarici ölkə vətəndaşının adına məktəb inşa edilir. Üçnövbəli bu yaraşıqlı dördmərtəbəli təhsil ocağı Misirdə yeni tipli yeganə məktəbdir. Şəhərin görkəmli yerində inşa edilən 1600 yerlik bu təhsil müəssisəsində şagirdlərin təlim-tərbiyəsi ilə yüzdən artıq müəllimin çalışacağı bildirildi. O da nümayəndə heyətinin nəzərinə çatdırıldı ki, təhsil ocağında hazırlıq, əlil uşaqlar və ümumtəhsil şöbələri üç növbədə fəaliyyət göstərəcək. Məktəbdə sinif otaqları, kitabxana, müxtəlif fənlərin laboratoriyaları, kompüter otaqları, texniki avadanlıqlarla tam təmin edilmiş idman zalı var. Məktəbin foyesində Azərbaycan-Misir dostluğunu əks etdirən, Azərbaycan Prezidenti İlham Əliyev və Heydər Əliyev Fondunun prezidenti Mehriban xanım Əliyevanın elmə, təhsilə, mədəniyyətə, səhiyyəyə göstərdiyi diqqət və qayğını əks etdirən fotoşəkillər nümayiş olunur. Azərbaycan nümayəndə heyətinin rəhbəri Zakir Fərəcov çıxış edərək misirli həmkarlara respublikamızda aparılan quruculuq işləri barədə geniş məlumat verdi. Z.Fərəcov bildirdi ki, ümummilli lider Heydər Əliyevin əsasını qoyduğu ardıcıl inkişaf proqramı Azərbaycanda bu gün ölkə başçısı İlham Əliyev tərəfindən uğurla davam etdirilir. Məhz bunun nəticəsində respublikamız dünya birliyi dövlətləri arasında özünə layiqli yer tutur. Ölkənin inkişafına təkan verən dövlət proqramları, beynəlxalq tədbirlərdə yaxından iştirak, dünya miqyaslı layihələrdəki yeri respublikamızı regionun lider dövlətinə çevirmişdir. Müharibə şəraitində yaşamasına baxmayaraq, artıq öz yurd-yuvalarından qaçqın düşən ölkə vətəndaşları hərtərəfli təmin edilmiş qəsəbələrə köçürülmüşdür. Onların normal həyata başlamaları üçün yeni iş yerləri açılmışdır. Natiq Heydər Əliyev Fondunun prezidenti Mehriban Əliyevanın mədəniyyətlərin sivilizasiyasına verdiyi yüksək qiymətdən, respublikamızın mədəni, elmi inkişafındakı rolundan söz açdı. Dünya mədəniyyətinin bir parçası olan Azərbaycan muğamının inkişafına göstərdiyi qayğını diqqətə çatdıran Z.Fərəcov misirlilərin də ona ehtiramla yanaşmalarına görə mərasimə toplaşanlara minnətdarlığını bildirdi.

Daha sonra Azərbaycan nümayəndə heyəti və Qalubiyyə vilayətinin qubernatoru Ə. Hüseyn məktəbdə yaradılan şəraitlə yaxından tanış oldular. Məktəbdə təhsil alan şagirdlərlə səmimi söhbət aparıldı, kompüter və coğrafiya otaqlarına baxış keçirildi. Azərbaycan nümayəndə heyətinin rəhbəri Zakir Fərəcov şagirdlərə təhsillərində yeni uğurlar dilədi, respublikamızın inkişafını özündə əks etdirən fotoşəkilləri və azərbaycanca-ərəbcə lüğəti Qalubiyyə vilayətinin qubernatoru Ə.Hüseynə hədiyyə etdi. Qalubiyyə vilayətinin qubernatoru Ə.Hüseyn təhsil ocağına Azərbaycanın birinci xanımı Mehriban Əliyevanın adının verilməsi haqqında sərəncamı Zakir Fərəcova təqdim etdi.

* * *

Keçən il Türkiyənin Bursa vilayətinin Yıldırım bələdiyyəsi ilə Xırdalan bələdiyyəsi arasında qardaşlıq müqaviləsi imzalanmışdı. Bursa şəhərində ümummilli lider Heydər Əliyevin abidə kompleksinin ucaldılması qərara alınmışdı. Bir neçə gün əvvəl Abşeron Rayon İcra Hakimiyyətinin başçısı Zakir Fərəcovun rəhbərlik etdiyi nümayəndə heyəti Bursa şəhərinə səfər etmişdir. Qapalı Qaya yaşayış massivində 2,5 hektar ərazidə Heydər Əliyev parkı salınmışdır. Həmin parkda ulu öndər Heydər Əliyevin büstünün açılışı olmuşdur. Ümummilli liderin şərəfli ömür yolundan söz açan mərasim iştirakçıları türk-Azərbaycan dostluğunun əbədi olduğunu dönə-dönə vurğulamışdılar. Yıldırım bələdiyyəsinin sədri Özgən Kəskin çıxışında onu da bildirmişdi ki, yaxın gələcəkdə parkın bir hissəsinə görkəmli oftalmoloq akademik Zərifə Əliyevanın adı veriləcək. Tədbirdə o da vurğulanmışdı ki, iki qardaş xalqın dostluğunu heç bir qüvvə sarsıda bilməz.

Tədbirin sonunda xatirə şəkli çəkdirildi.

Akif ƏLİYEV

Azərbaycan.- 2009.- 20 oktyabr.- S. 8.