Muzeydə anım günü

Azərbaycanın ilk qadın təyyarəçisi Leyla Ələsgər qızı Məmmədbəyovanın anadan olmasının 100 ili tamam olmuşdur. O, 1930-1931-ci illərdə Bakı aviasiya məktəbində təyyarəçi-təlimatçı ixtisasına yiyələnərək Bakı aeroklubunda fəaliyyət göstərmişdir. 1932-ci ildə Moskva Mərkəzi Aviasiya Məktəbində təhsilini davam etdirmişdir. İlk dəfə paraşütlə tullanmağı da Moskvada, Tuşino aerodromunda həyata keçirmişdir. SSRİ məkanında qadınlar arasında paraşütlə tullanma yarışlarında L.Məmməbdəyova ikinci yeri tutmuşdur...

Böyük Vətən müharibəsi cəbhələrində döyüşmək L.Məmmədbəyovaya qismət olmamışdır. Lakin 1942-ci ildə o, digər iki aviamütəxəssislə (Sarenko qardaşları) birlikdə OADKYC-in nəzdində planet-paraşütçü klubunu yaratmışdır. Müharibə illərində bu klub 4000-dən çox paraşütçü-desant, yüzlərlə təyyarəçi hazırlamışdır. Onun məzunları arasında Sovet İttifaqı Qəhrəmanı Adil Quliyev də var idiE

Oktyabrın 21-də L.Məmmədbəyovanın yubileyi münasibətilə Mülki Aivasiya Muzeyində xatirə tədbiri keçirilmişdir. Tədbirdə Milli Aviasiya Akademiyasının müəllim və tələbələri ilə yanaşı, yubilyarın yaxın qohumları və həmyerliləri, habelə onu yaxşı tanıyan incəsənət işçiləri iştirak etmişlər.

Xatirə mərasimini giriş sözü ilə açan muzeyin direktoru Ş.Axundov yubilyarın şücaət yoluna nəzər salmış, L.Məmmədbəyova ilə bağlı nadir eksponatlardan və mətbuatda daim əksini tapan materiallardan danışmışdır. Qonaqlardan akademik V.Məmmədəliyev, Veteranlar Şurasının sədri Ə.Baxışov, qocaman ictimai xadim Ə.Nəzərli, Müdafiə Nazirliyinin zabiti, şair-publisist A.Qurbani, kino xadimlərindən N.Rzayev, A.Kazımov mərasimdə çıxış edərək ilk qadın təyyarəçimiz barədə xatirələrini söyləmişlər. Yubilyarın oğlu X.Məmmədbəyov ailə üzvləri adından akademiyanın və muzeyin rəhbərliyinə, bu gözəl tədbirin təşkilində əməyi olan bütün əməkdaşlara təşəkkürünü bildirmişdir.

Xatirə mərasimi genişmiqyaslı fotosərgi və sənədli filmlərdən fraqmentlərlə müşayiət olunmuşdur.

Y.KƏRİMOV

Azərbaycan.- 2009.- 22 oktyabr.- S. 6.