"Dəyirmi masa" keçirilmişdir

Ağstafa şəhərindəki Heydər Əliyev Mərkəzinin konfrans zalında Azərbaycanın görkəmli şərqşünas alimi, Şərq-Qərb problematikasının sistemli şəkildə ilk tədqiqatçısı Aida xanım İmanquliyevanın anadan olmasının 70 illiyinə həsr olunmuş "dəyirmi masa" keçirilmişdir.

Rayon icra hakimiyyəti başçısının müavini Lalə Eyyubova Aida xanım İmanquliyevanın həyat və yaradıcılığından danışmışdır. O, görkəmli alimin şərqşünaslıq elminə töhfələrindən söz açmışdır.

Sonra rayon mədəniyyət və turizm şöbəsinin müdiri Gülgün Kərimov, "Ağstafa" qəzeti redaktorunun müavini Firdovsi Heydərli, şəhər 2 nömrəli orta məktəbinin müəllimləri Nigar Bezraşvard, Sevda Əliyeva və başqaları görkəmli şərqşünas alimin ərəb filologiyası sahəsində apardığı nəhəng elmi tədqiqat işlərindən söz açmışlar. Qeyd etmişlər ki, Aida İmanquliyeva həm keçmiş Sovet İttifaqında, həm də Azərbaycanda yeni ərəb ədəbiyyatı kursunun yaradıcılarından biri olmuşdur. Eyni zamanda, o, Azərbaycan oxucusunu ərəb ədəbiyyatı ilə tanış etmək üçün xeyli iş görmüş, bir sıra ərəb yazıçılarının əsərlərini dilimizə çevirmişdir.

AzərTAc

Azərbaycan.- 2009.- 22 oktyabr.- S. 6.