Bakıda Xəzər dənizinin təhlükəsizlik məsələlərinə həsr olunmuş konfrans işinə başlamışdır

Oktyabrın 22-də Bakıda Azərbaycan, Rusiya, Qazaxıstan, Türkmənistan və İranın xarici işlər nazirlərinin müavinlərinin iştirakı ilə Xəzər dənizinin təhlükəsizlik məsələlərinin müzakirəsinə həsr olunmuş konfrans işə başlamışdır. İki gün davam edəcək tədbirdə ilk dəfə olaraq "Xəzər hövzəsində təhlükəsizliyin təmin olunmasına dair Saziş Layihəsi"nin əsas prinsipləri müzakirə olunacaqdır.

Azərbaycan xarici işlər nazirinin müavini Xələf Xələfov görüşü açaraq demişdir ki, Xəzərin hüquqi statusunun tam müəyyənləşdirilməsi ilə bağlı regional perspektivlərin müzakirəsi baxımından bu konfrans mühüm əhəmiyyət kəsb edir. Xəzər hövzəsində təhlükəsizliyin təminatına dair Saziş Layihəsinin Azərbaycanın təşəbbüsü ilə hazırlandığını vurğulayan X.Xələfov dənizin su səthinin beynəlxalq hüquq normaları çərçivəsində bölünməsinin layihənin əsas tərkib hissələrindən biri olduğunu qeyd etmişdir. Region dövlətlərinin xarici siyasətdə ümumi razılığa gəlmələrinə imkan yaradan amillərdən biri də son illər Xəzər regionunda həyata keçirilən Qərbyönümlü beynəlxalq əməkdaşlıq layihələrinin çoxalmasıdır.

X.Xələfov saziş layihəsi çərçivəsində qarşılıqlı əməkdaşlığın əsas prinsiplərinin artıq razılaşdırıldığını vurğulamış və qeyd etmişdir ki, bugünkü görüş bu istiqamətdə keçiriləcək tədbirlərin birincisidir. Nazir müavini iclasın sonunda yekun layihənin əldə olunacağına ümidvar olduğunu bildirmişdir.

Bildirilmişdir ki, Xəzər dənizinin təhlükəsizlik məsələsi sonuncu dəfə 2007-ci ildə keçirilmiş Tehran sammitində müzakirə olunmuşdur. Həmin toplantıda qəbul olunmuş qərarlar əsasında bugünədək xeyli iş görülmüş, beynəlxalq layihələr həyata keçirilmişdir.

İşçi qrupun gündəliyinə Xəzərin ekologiyası, su resurslarının qorunması, nəqliyyat və digər iqtisadi layihələrin gücləndirilməsi kimi məsələlər daxil edilmişdir.

Daha sonra görüş mətbuat üçün qapalı davam etdirilmişdir.

AzərTAc

Azərbaycan.- 2009.- 23 oktyabr.- S. 4.