Aleksandr LUKAŞENKO: "Belarus ilə Azərbaycanın münasibətlərində qapalı mövzu yoxdur"

Oktyabrın 23-də Belarus Prezidenti Aleksandr Lukaşenko Azərbaycanın Baş nazirinin birinci müavini Yaqub Eyyubovla görüşdə bildirmişdir ki, Belarus ilə Azərbaycanın münasibətlərində qapalı mövzu yoxdur.

Prezident qeyd etmişdir ki, Belarus və Azərbaycan xalqları arasında qardaşlıq və dostluq münasibətləri mövcuddur. Çünki belarusların azərbaycanlılara qarşı heç bir iddiası olmadığı kimi, azərbaycanlıların da belaruslara qarşı heç bir iddiası yoxdur.

O, həmçinin bildirmişdir ki, Azərbaycanla əməkdaşlıq etmək Belarus üçün çox sərfəlidir, çünki bu iki ölkənin iqtisadiyyatları kəsişmir və bir-birini tamamlayır. O demişdir: "Biz xarici iqtisadi fəaliyyətimizi şaxələndirməyə və Azərbaycana istiqamətlənməyə məmnuniyyətlə hazırıq və artıq bu yöndə iş aparırıq".

Belarus lideri Azərbaycan Prezidenti İlham Əliyevlə onun arasında sıx dostluq münasibətləri olmasına toxunaraq vurğulamışdır: "Biz onun atası Heydər Əliyevlə də yaxın dost idik. Onunla çox səmimi münasibətlərimiz vardı".

Prezident vurğulamışdır ki, Belarusun Azərbaycanla əməkdaşlıq etməsi təkcə Azərbaycanın böyük potensiala malik olması ilə deyil, həm də onunla əlaqədardır ki, Azərbaycan rəhbərliyinin də bu cür əməkdaşlığa maraq göstərməsi göz qabağındadır. Aleksandr Lukaşenko demişdir: "Azərbaycanın problemləri olduğunu bilirəm, onun əsas probleminin nədən ibarət olduğunu da bilirəm, lakin zənnimcə, onların hamısı həll ediləcəkdir. Sizin malik olduğunuz potensial hər hansı problemləri həll etməyinizə imkan verir".

Prezident onu da qeyd etmişdir ki, Yaqub Eyyubovun Belarusa səfəri bir sıra mühüm layihəni araşdırmağa imkan verəcəkdir.

Yaqub Eyyubov bildirmişdir ki, regionda böyük nüfuza malik olan Belarus Azərbaycan üçün mühüm strateji tərəfdaşdır. Belarusda istehsal edilən kənd təsərrüfatı texnikasının keyfiyyəti barədə yüksək fikir söyləyən Baş nazirin birinci müavini Azərbaycanda MTZ traktorlarının yığılmasını xatırladaraq demişdir: "Biz çalışırıq ki, əməkdaşlığımız daha da dərinləşsin, əmtəə dövriyyəsinin həcmi artsın". Yaqub Eyyubov daha sonra demişdir: "Belarusda istehsal edilən texnika sayəsində biz məhsulun həcmini artırmağa nail olmuşuq, bu gün biz üçüncü ölkələrdə satılmaq üçün həmin texnikanı birgə istehsal etmək barədə razılığa gələcəyik".

AzərTAc

Azərbaycan.- 2009.- 24 oktyabr.- S. 1.