Xarici İşlər Nazirliyində

Azərbaycanın Xarici İşlər Nazirliyinin mətbuat xidmətindən bildirmişlər ki, nazir Elmar Məmmədyarov ölkəmizdə səfərdə olan Yunanıstanın xarici işlər nazirinin müavini Spiridon Kuvelisi ilə görüşmüşdür.

Görüşdə Azərbaycan ilə Yunanıstan arasında əməkdaşlığın hazırkı vəziyyəti və inkişaf perspektivləri ilə bağlı fikir mübadiləsi aparılmışdır. Yüksək səviyyəli səfərlərin və siyasi dialoqun davam etdirilməsinin vacibliyini vurğulayan tərəflər, iqtisadi əməkdaşlığın genişləndirilməsi məqsədilə hökumətlərarası komissiya çərçivəsində konkret əməkdaşlıq imkanlarının müzakirəsinin, habelə biznes forumların keçirilməsinin əhəmiyyətini qeyd etmişlər.

Tərəflər Azərbaycan ilə Yunanıstan arasında nefq-qaz, xüsusilə bərpa olunan enerji sahəsində əməkdaşlığın perspektivləri, həmçinin regional enerji layihələri ətrafında fikir mübadiləsi aparmışlar.

Humanitar və təhsil sahəsində, xüsusilə iki ölkənin diplomatik akademiyaları çərçivəsində müxtəlif layihələrin həyata keçirilməsinin Azərbaycan ilə Yunanıstan arasında münasibətlərin daha da möhkəmləndirilməsinə öz töhfəsini verəcəyi vurğulanmışdır. Həmçinin mədəniyyətin xalqları birləşdirən bir amil olduğunu qeyd edən tərəflər bu sahədə müxtəlif tədbirlərin həyata keçirilməsi ətrafında fikir mübadiləsi aparmışlar.

Görüşdə, həmçinin qarşılıqlı maraq doğuran digər məsələlər də müzakirə olunmuşdur.

***

Xarici İşlər Nazirliyinin mətbuat xidmətindən bildirmişər ki, oktyabrın 23-də nazir Elmar Məmmədyarov ABŞ dövlət katibinin Avropa və Avrasiya məsələləri üzrə müşaviri xanım Tina Kaydanov ilə görüşmüşdür.

Ölkəmizə səfərindən məmnunluğunu bildirən xanım T.Kaydanov ABŞ administrasiyasının Azərbaycan ilə əməkdaşlığa böyük önəm verdiyini və münasibətlərin daha da inkişaf etdirilməsində maraqlı olduğunu qeyd etmişdir.

T.Kaydanov ABŞ-ın ATƏT-in Minsk qrupunun həmsədri kimi Ermənistan-Azərbaycan, Dağlıq Qarabağ münaqişəsinin tez bir zamanda həllində maraqlı olduğunu və bu istiqamətdə öz töhfəsini verməyə çalışdığını vurğulamışdır. Rəsmi Vaşinqton Ermənistan-Azərbaycan, Dağlıq Qarabağ münaqişəsi və Türkiyə-Ermənistan münasibətlərinin normallaşması proseslərinin hər ikisində müsbət irəliləyişin əldə olunmasına tərəfdardır.

ABŞ rəsmisi Azərbaycanın beynəlxalq antiterror əməliyyatlarına verdiyi töhfəsinin, habelə Əfqanıstanda sülhün və sabitliyin təmin olunması istiqamətində dəstəyinin ABŞ administrasiyası tərəfindən yüksək qiymətləndirildiyini vurğulamışdır.

Nazir E.Məmmədyarov Azərbaycanın ABŞ-la bütün sahələrdə sıx əməkdaşlıq etdiyini və bu əməkdaşlığın daha da dərinləşdirilməsində ölkəmizin maraqlı olduğunu qeyd etmişdir.

Ermənistan-Azərbaycan, Dağlıq Qarabağ münaqişəsinin həllinə dair aparılan danışıqlar prosesinə toxunan E.Məmmədyarov nizamlanma ilə bağlı ölkəmizin mövqeyi barədə məlumat vermişdir. Ermənistan-Azərbaycan, Dağlıq Qarabağ münaqişəsi və Türkiyə-Ermənistan münasibətlərinin normallaşmasının bir-biri ilə bağlılığını qeyd edən nazir proseslərin hər ikisində paralel olaraq irəliləyişin əldə edilməsinin zəruriliyini bildirmişdir.

E.Məmmədyarov regionda davamlı sülhün və sabitliyin bərqərar olunması üçün bütün kommunikasiyaların və yolların açılmasının vacibliyini qeyd etmiş, bunun üçün Azərbaycanın işğal edilmiş ərazilərindən Ermənistanın silahlı qüvvələrinin çıxarılmasının əsas şərt olduğunu vurğulamışdır.

Görüşdə qarşılıqlı maraq doğuran ikitərəfli, regional və qlobal mövzular ətrafında fikir mübadiləsi aparılmışdır.

***

Xarici İşlər Nazirliyinin mətbuat xidmətindən bildirmişər ki, nazir Elmar Məmmədyarov Misir Ərəb Respublikasının xarici işlər nazirinin köməkçisi, səfir Mohamed əl-Orabi ilə görüşmüşdür.

Görüşdə tərəflər bir gün əvvəl Bakıda keçirilmiş Qara Dəniz İqtisadi Əməkdaşlıq Təşkilatının Xarici İşlər Nazirləri Şurası iclasının nəticələrini müzakirə etmiş, təşkilatın fəaliyyəti və gələcək planlarına dair fikir mübadiləsi aparmışlar.

Qeyd olunmuşdur ki, Azərbaycan ilə Misir arasındakı münasibətlərin yüksək səviyyədə olması əlaqələrimizin daha da genişləndirilməsinə və dərinləşdirilməsinə yeni imkanlar açır. Hər iki ölkə enerji hasilatı və emalı sahəsində böyük təcrübəyə malik olduğundan bu və digər sahələrdə qarşılıqlı mübadilələrin ön plana çəkilməsi məqsədəuyğun olardı.

Tərəflər Cənubi Qafqazda və Orta Şərqdə gedən proseslər ətrafında da müzakirələr aparmışlar.

***

Azərbaycan Respublikasının xarici işlər naziri Elmar Məmmədyarov oktyabrın 23-də Moldova Respublikasının dövlət naziri Viktor Bodiu ilə görüşmüşdür.

Xarici İşlər Nazirliyinin (XİN) mətbuat xidmətindən bildirmişlər ki, görüşdə tərəflər ölkələrimiz arasındakı münasibətlərin yüksək səviyyədə olduğunu və əlaqələrin daha da inkişaf etdirilməsi üçün mövcud potensialdan daha səmərəli istifadə edilməsinin vacibliyini bildirmişlər. GUAM çərçivəsində həyata keçirilən layihələrin daha da intensivləşdirilməsinin vacibliyi və təşkilatın işinin real müsbət nəticə verdiyi vurğulanmışdır.

Moldova ilə Azərbaycanın oxşar problemlərlə üzləşdiyi və mövcud münaqişələrin qısa müddətdə beynəlxalq hüququn norma və prinsipləri əsasında ölkələrin beynəlxalq səviyyədə tanınmış sərhədləri çərçivəsində həllinin vacibliyi xüsusi qeyd edilmişdir.

Sonra tərəflər qarşılıqlı maraq doğuran bir sıra məsələlər ətrafında fikir mübadiləsi aparmışlar.

AzərTAc

Azərbaycan.- 2009.-24 oktyabr.- S. 3.