Müdafiə Sənayesi Nazirliyində kollegiya iclası keçirilmişdir

Oktyabrın 26-da Müdafiə Sənayesi Nazirliyində nazir Yavər Camalovun sədrliyi ilə 2009-cu ilin doqquz ayının yekunlarına həsr olunmuş geniş kollegiya iclası keçirilmişdir.

Nazirliyin mətbuat xidmətindən bildirmişlər ki, nazir Yavər Camalov ümumilikdə ölkə iqtisadiyyatına toxunaraq dünyanın bir çox qabaqcıl ölkələrinin iqtisadi böhrandan əziyyət çəkdiyi bir dövrdə Azərbaycan iqtisadiyyatının uğurla inkişaf etdiyini bildirmişdir.

Prezident İlham Əliyevin rəhbərliyi altında həyata keçirilən uğurlu islahatlar nəticəsində cari ilin doqquz ayında ümumi daxili məhsulun 6,1 faiz artdığını vurğulayan nazir Yavər Camalov ötən dövrdə ölkənin müdafiə qüdrətinin möhkəmləndirilməsi istiqamətində nazirlik tərəfindən görülmüş işlər və onların əhəmiyyətindən danışmışdır.

Nazir müavinləri Yəhya Musayev və Tofiq Rəfiyev 2009-cu ilin doqquz ayı üzrə nazirliyin tabeliyindəki birlik və müəssisələrin istehsal, elm, maliyyə, sosial və digər sahələrdə fəaliyyətinin yekunları barədə məlumat vermişlər.

Sonra birlik və müəssisələrin fəaliyyəti haqqında müəssisə rəhbərlərinin hesabatları dinlənilmişdir.

Sonda Yavər Camalov oktyabrın 16-da Nazirlər Kabinetinin 2009-cu ilin doqquz ayının sosial-iqtisadi inkişafının yekunlarına həsr olunmuş geniş iclasında dövlətimizin başçısı İlham Əliyevin ordu quruculuğu ilə bağlı söylədiyi fikirləri bir daha iclas iştirakçılarına xatırlatmış və Müdafiə Sənayesi Nazirliyində 2009-cu ilin Dövlət Müdafiə Sifarişi Proqramının uğurla yerinə yetirilməsi ilə bağlı tapşırıqlarını vermişdir.

AzərTAc

Azərbaycan.- 2009.- 27 oktyabr.- S. 1.