Moskvada dahi Müslüm Maqomayevin xatirəsinə həsr olunmuş gecə keçirilmişdir

Bir il əvvəl görkəmli musiqiçi, əfsanəvi müğənni, milyonların sevimlisi Müslüm Maqomayev dünyasını dəyişmişdir... Maqomayevin təkrarolunmaz bariton səsi və misilsiz artistlik bacarığı milyonlarla dinləyicinin qəlbini fəth etmişdir. Onun səs diapazonu o qədər geniş idi ki, uzun illər və elə indi də Maqomayevin adı yüksək incəsənətin rəmzinə çevrilmişdir.

Oktyabrın 25-də Moskvanın "Crocus Citi Hall" salonunda dahi musiqiçinin xatirəsinə həsr olunmuş gecə keçirilmişdir. Gecədə müğənninin doğmaları, dostları və parlaq istedadının pərəstişkarları toplaşmışdılar.

Müslüm Maqomayevin yaxın dostu, "Krokus" şirkətlər qrupunun rəhbəri Araz Ağalarovun təşkil etdiyi konsert əfsanəvi müğənninin şərəfinə açılmış yeni konsert salonunda ilk rəsmi tədbir olmuşdur. 6,2 min nəfərlik salonun girəcəyində A.Ağalarovun "Böyük müğənni və mənim dostum Müslüm Maqomayevin xatirəsinə" sözləri yazılmışdır.

Gecənin aparıcısı Svetlana Morqunova demişdir: "Bir il əvvəl, ölkə saatların əqrəblərini geri çəkəndə Müslüm Maqomayevin ürəyi əbədi susmuşdu. Böyük artistin və müğənninin qayıdacağına və bu möcüzənin yenidən davam edəcəyinə ümidlərimiz də sönmüşdü. Yalnız itirəndən sonra anladıq ki, Müslüm Maqomayev bizim hamımıza necə lazım idi. Mən onun səsinə laqeyd qalan adam tanımıram. Maqomayevin gedişi ilə təkcə vaxt dəyişmədi, indiki şou-biznesi o zamanlar "incəsənət" adlandırılan məfhumdan ayıran pərdə də yırtıldı. Kral taxt-tacını heç kimə vermədən əsl kral kimi getdi. Ona görə yox ki, bildiklərini özündən sonrakı nəslə ötürmək istəmirdi, sadəcə, buna layiq olanı yox idi... Zamanı dayandırmaq mümkün deyil, başqaları gələcək, lakin o xoşbəxt anlarımızla qırılmaz surətdə bağlı olan günlər bir daha qayıtmayacaqdır. Musiqiyə sonsuz sadiq Orfeyin səsi xatirələrimizdə, qəlbimizdə əbədi səslənəcəkdir".

Geniş ekranda Müslüm Maqomayevin videokadrları nümayiş etdirilir, onun ifasında mahnılar səslənirdi. Toplaşanlar milyonların qəlbini fəth etmiş "Sən mənim melodiyamsan" mahnısını ayaqüstə dinləmişlər. Royal arxasında bəstəkar Aleksandra Paxmutova əyləşmişdi. Onun digər məşhur mahnıları, teatr kompozisiyaları və hətta "Bremen musiqiçiləri" cizgi filmindən mahnılar tamaşaçılar tərəfindən hərarətlə qarşılanmışdır. Maqomayevin memuarlarından parçalar oxunmuşdur.

Səhnədən klassik və müasir musiqi, o cümlədən əfsanəvi həmvətənimizin çox sevdiyi italyan ariya və mahnıları səslənirdi. Onları təkcə məşhur Rusiya və Azərbaycan opera müğənniləri deyil, həm də gənc estrada müğənniləri ifa etmişlər.

Dahi müğənniyə həsr etdiyi mahnısını ifa edən gənc Emin Ağalarovu isə ailə arxivində saxlanılan videoçəkiliş vasitəsilə Müslüm Maqomayev özü təqdim etmişdir. O, royal arxasında oturaraq hələ uşaqlıqdan tanıdığı istedadlı və perspektivli gənci təqdim edir.

Konsertdə azərbaycanlı ifaçılar Elçin Əzimov, Dinara Əliyeva, Samir Cəfərov, Rusiya müğənniləri Nikolay Baskov, İosif Kobzon, Yevgeni Nesterenko, Paata Burçuladze iştirak etmişlər. Larisa Dolina, Tamara Qverdsiteri, Filipp Kerkorov, Dima Bilan, Valeriya, Valeri Sütkin, "Kvatro" ansamblı da Müslüm Maqomayevin xatirəsini anmışlar. Rusiya Dövlət Televiziyası və Radiosu Simfonik Orkestri, Pyatnitski adına Xor və Rəqs Ansamblında çıxış etmişdir.

Azərbaycanın mədəniyyət və turizm naziri Əbülfəs Qarayev, Müslüm Maqomayevin xanımı Tamara Sinyavskaya, Heydər Əliyev Fondunun Rusiya Federasiyasındakı nümayəndəliyinin rəhbəri Leyla Əliyeva, "Krokus" qrupunun başçısı Araz Ağalarov, Bakı Musiqi Akademiyasının rektoru Fərhad Bədəlbəyli, Azərbaycan Rəssamlar İttifaqının sədri Fərhad Xəlilov, Rusiya dövlət hakimiyyəti və ictimaiyyətinin nümayəndələri konsertdə olmuşlar.

Konsertin sonunda Araz Ağalarov səhnəyə qalxaraq dostu və görkəmli müğənni Müslüm Maqomayevin xatirəsi önündə baş əymişdir. Sonra konsert salonunun həndəvərində atəşfəşanlıq təşkil olunmuşdur.

Asya HACIZADƏ,

AzərTAc-ın xüsusi müxbiri

Moskva

Azərbaycan.- 2009.- 27 oktyabr.- S. 2.