Yadigar şəkil

Böyük sənətkar Şəmsi Bədəlbəyli ilə dəfələrlə görüşmüşəm. Lakin onlardan biri, qədim Gəncə və qardaşım Mobil Əhmədovla bağlı olduğuna görə daha çox yadımda qalıb.

1970-ci ildə Gəncədə Azərbaycan Dövlət Musiqili Komediya Teatrının qastrolu keçirilirdi. Hələ bir ay qabaqcadan afişaları vurulmuş, görkəmli aktyorlardan L.Abdullayevin, N.Zeynalovanın, M.Əhmədovun və başqalarının portretləri asılmışdı. Ona görə də iyulun 1-də mədəniyyət və istirahət parkının yay teatrı tamaşaçılarla dolmuşdu. Dahi Üzeyir bəyin "O olmasın, bu olsun" operettası göstərilməli idi. Saat doqquzun yarısı olsa da, tamaşanı aparacaq dirijor görünmürdü.

Vəziyyətdən çıxış yolu tapmaq lazım idi. Bu zaman Şəmsi Bədəlbəyli Sərvər rolunun ifaçısı Mobil Əhmədovdan soruşdu: "Mobil, sən tamaşada frakı nə vaxt geyinirsən?" Mobil cavab verdi ki, lap axırda. "Onda tez o frakı gətir bura".

Şəmsi müəllim frakı geyib pulta qalxdı və tamaşa başlandı. Hamı mat qalmışdı - teatrın direktoru və bədii rəhbəri Şəmsi Bədəlbəyli heç bir hazırlıq olmadan necə məharətlə dirijorluq edir! Əsərin üvertürası qurtaran kimi pərdə açıldı. Mobil Əhmədov öz növbəsində Sərvərin "Səfayi vəsli qədrin-hicrilə bimar olandan sor" beyti ilə başlanan ariyasını oxudu. Gəncəlilər öz həmyerlilərini - M.Əhmədovu sürəkli alqışladılar. Bundan istifadə edən Mobil "Füzuli, eşq zövqünü zövqü eşqi var olandan sor" beytini xüsusi vurğu ilə söyləyib əlini Şəmsi müəllimə tərəf uzatdı. Yəni, bu ifalar, bu hünər onun hünəridir. Hamı ayağa qalxaraq "bravo, mayestro" deyərək əl çaldılar. Şəmsi Bədəlbəyli Gəncədə bax, belə dirijorluq elədi.

Həmin unudulmaz günlərdən sizə təqdim elədiyim bu tarixi şəkil yadigar qaldı.

Bəşir ƏHMƏDOV,

Azərbaycan Aqrar Dövlət

Universitetinin müəllimi

Azərbaycan.- 2009.- 27 oktyabr.- S. 7.