Sənaye və Energetika Nazirliyində Yunanıstan xarici işlər nazirinin müavini ilə görüş olmuşdur

Sənaye və Energetika Nazirliyinin mətbuat xidmətindən bildirmişlər ki, Bakıda səfərdə olan Yunanıstan Respublikasının xarici işlər nazirinin müavini, Azərbaycan Respublikası hökuməti ilə Yunanıstan Respublikası hökuməti arasında iqtisadi, sənaye və texnoloji sahələrdə əməkdaşlıq üzrə birgə komissiyanın həmsədri Spiridon Kuvelis ilə nazirlikdə görüş olmuşdur.

Azərbaycan sənaye və energetika naziri Natiq Əliyev iki ölkə arasında əməkdaşlığın səviyyəsini yüksək qiymətləndirərək bildirmişdir ki, mövcud potensial daha ciddi nailiyyətlərin əldə olunmasına etibarlı zəmin yaradır. Nazir iki ölkə arasında enerji sahəsində əməkdaşlığın böyük əhəmiyyətə malik olduğunu qeyd etmişdir. Yunanıstan Avropa İttifaqının üzvü olan ilk ölkədir ki, Azərbaycan qazı buraya birbaşa ixrac olunur.

Nazir həmçinin bildirmişdir ki, Azərbaycan enerji ehtiyatlarının dünya bazarına çıxarılması üçün son illər böyük işlər görmüşdür və ölkəmiz Avropanın enerji təhlükəsizliyinin təmin olunmasında öz rolunu oynamağa hazırdır. "Şahdəniz" qaz yatağının istismarının ikinci mərhələsi çərçivəsində Azərbaycan qazının Yunanıstana nəql edilməsinin perspektivlərinə toxunan N.Əliyev bildirmişdir ki, Azərbaycan Yunanıstana ildə təxminən 1 milyard kubmetr qaz satmaq potensialına malikdir. Nazir bunun üçün ilk növbədə tranzitlə bağlı məsələlərə aydınlıq gətirilməsinin vacibliyini qeyd etmişdir.

Son illər aktual olan alternativ və bərpa olunan enerji mənbələrindən istifadə ilə əlaqədar Azərbaycanda görülən işlər barədə də qonağa ətraflı məlumat verilmişdir. Bildirilmişdir ki, Prezident İlham Əliyevin tapşırığı əsasında 2010-cu ildə alternativ və bərpa olunan enerji mənbələrindən istifadə üzrə dövlət vəsaiti hesabına bir sıra pilot layihələrin həyata keçirilməsi nəzərdə tutulur.

Spiridon Kuvelis onun hökumətinin Azərbaycanın tezliklə Yunanıstan bazarına böyük həcmdə mavi yanacaq nəql etməyə başlayacağına ümidvar olduğunu bildirmişdir. Nazir müavini qeyd etmişdir ki, Yunanıstan "Şahdəniz" layihəsinin ikinci mərhələsi çərçivəsində Azərbaycan qazının idxalında maraqlıdır.

Qonaq hazırda iki ölkə arasında əlaqələrin inkişafının yeni mərhələdə olduğunu vurğulamışdır. Hər iki ölkə prezidentlərinin qarşılıqlı səfərlərinin ikitərəfli əlaqələrin möhkəmlənməsinə müsbət təsir göstərdiyini qeyd edən qonaq Prezident İlham Əliyevin Yunanıstana rəsmi səfərinin Afina üçün böyük əhəmiyyət daşıdığını vurğulamışdır.

Müzakirələr zamanı Azərbaycan ilə Yunanıstan arasında hökumətlərarası komissiyanın növbəti iclasının keçirilməsi perspektivinə də toxunulmuş və onun 2010-cu ilin birinci rübündə keçirilməsi razılaşdırılmışdır. Bu məqsədlə müvafiq təkliflərə baxılması və hazırlıq işlərinin görülməsi üçün fikir mübadiləsi aparılmışdır.

Görüşdə qarşılıqlı maraq doğuran digər məsələlər də müzakirə olunmuşdur.

AzərTAc

Azərbaycan.- 2009.- 27 oktyabr.- S. 2.