Gələcəyin xoş anlarına inam artır

Azərbaycan dünya miqyasında təkcə zəngin enerji ehtiyatlarına görə yox, həm də sürətli siyasi və iqtisadi inkişafa malik olan, bu və digər sahədə uğurlu islahatlar həyata keçirən, mühüm geostrateji əhəmiyyət daşıyan bir ölkə kimi tanınır. Ölkəmiz artıq regional yox, həm də beynəlxalq miqyasda öz sözünü deyən, mövqelərini milli maraqlar çərçivəsində tam müdafiə etməyi bacaran bir dövlət kimi xarakterizə olunur. Bütün bunlar isə Azərbaycanın ən ağrılı problemi sayılan Dağlıq Qarabağ münaqişəsi, eləcə də bunun nəticəsində öz doğma yurd-yuvalarından didərgin düşən insanların qarşılaşdığı çətinliklərin həlli istiqamətində müəəyən irəliləyişlərin əldə edilməsilə nəticələnir.

Hazırda Avropada qaçqın və məcburi köçkünlərin sayına görə ilk yerləri tutan Azərbaycanda bu kateqoriyadan olan insanların həyat şəraitinin yaxşılaşması, yaşadıqları problemlərin vaxtında çözülməsi dövlətin xüsusi diqqətindədir. Bunun ən bariz nümunəsi isə artıq Azərbaycanda bir dənə də olsun çadır şəhərciyinin qalmamasıdır. Hələ 2003-cü ildə "Azərbaycanda bir dənə də olsun çadır şəhərciyi qalmayacaq" - deyən Prezident İlham Əliyev bu vədinə cəmi 4 ildə əməl etdi, 12 çadır şəhərciyi ləğv olundu. Onların əvəzində isə qaçqın və məcburi köçkünlər üçün müasir binalar, evlər, məktəblər, tibb məntəqələri və digər sosial obyektləri olan qəsəbələr salındı. Belə qəsəbələrdə məskunlaşan məcburi köçkünlər üçün hər cür şərait yaradıldı və onlar əvvəlki kimi daim dövlətin qayğısı ilə əhatə olundu. Lazımi infrastrukturla təmin edilən bu qəsəbələrdə böyük hissəsi torpağa bağlı olan məcburi köçkünlərin əkin-biçinlə məşğul olması üçün onlara həyətyanı sahələr də ayrıldı.

Bu siyasət indi də Prezident İlham Əliyevin bilavasitə nəzarəti altında uğurla davam etdirilməkdə, məcburi köçkünlər üçün yeni yaşayış qəsəbələri salınmaqdadır. Bunun ən bariz nümunələrindən biri Prezident İlham Əliyevin daha 700-ə yaxın məcburi köçkün ailəsi üçün yeni çoxmərtəbəli yaşayış binalarının tikilməsinə dair cari ilin sentyabrın 2-də imzaladığı sərəncamdır. Qeyd edək ki, bu məqsədlə Azərbaycan Respublikasının 2009-cu il dövlət büdcəsində nəzərdə tutulmuş Azərbaycan Respublikası Prezidentinin Ehtiyat Fondundan Qaçqınların və Məcburi Köçkünlərin İşləri üzrə Dövlət Komitəsinə 3 milyon manat məbləğində vəsait ayrılmasına göstəriş verilmişdir. Yaxın perspektivdə artıq müxtəlif yataqxanalarda, bağçalarda, digər belə yerlərdə məskunlaşan məcburi köçkünlərin hamısının bu cür qəsəbələrdə məskunlaşması prosesinin tam başa çatdırılacağı gözlənilir.

2004-cü ildə qəbul edilmiş "Qaçqınların və məcburi köçkünlərin yaşayış şəratinin yaxşılaşdırılması və məşğulluğunun artırılması üzrə Dövlət Proqramı" və 2007-ci ildə həmin proqrama edilən əlavələr bu kateqoriyadan olan soydaşlarımızın yaşayış səviyyəsinin əhəmiyyətli dərəcədə yaxşılaşmasına xidmət etməkdədir. Belə ki, həmin proqram məcburi köçkünlərin mənzil problemlərini həll etməklə yanaşı, onların məşğulluq səviyyəsinin yüksəlməsini də təmin edir.

Bütün bunlar bir daha son 6 ildə qaçqınların və məcburi köçkünlərin problemlərinin həllində nə dərəcədə böyük irəliləyişlərin əldə olunduğunu əyani surətdə göz önündə canlandırır. Bu qəbildən olan insanların ən böyük istəyi öz doğma torpaqlarına qayıtmaqdır. Onlar Prezident İlham Əliyevin bu istiqamətdə həyata keçirdiyi uğurlu siyasətin məntiqi nəticəsi olaraq tezliklə arzularına çatacaqlarına çox inanırlar. Elə bu səbəbdəndir ki, məcburi köçkünlər birmənalı şəkildə Prezident İlham Əliyevin həyata keçirdiyi siyasəti tam dəstəkləyirlər.

Məcburi köçkünlər özlərinin də mütəşəkkil bir qüvvə kimi üzləşdikləri problemlərin dünyaya çatdırılması üçün fəaliyyət göstərməkdə və bu istiqamətdə dövlət başçısının hərtərəfli qayğısını, dəstəyini hiss etməkdədirlər. Cari ilin iyununda qurultayını keçirən Dağlıq Qarabağ Bölgəsi Azərbaycanlı İcması Birliyinin fəaliyyəti bunu təsdiqləyir. Birliyin icmadaxili və beynəlxalq ictimaiyyət arasında genişmiqyaslı fəaliyyətinin daha səmərəli qurulması üçün mənzil-qərargahının əsaslı təmiri və zəruri avadanlıqlarla təchiz edilməsi məqsədilə Prezident İlham Əliyev cari ilin avqustun 31-də sərəncam imzalayıb. Bu, məcburi köçkünlər tərəfindən böyük sevinclə qarşılanıb. Xatırladaq ki, həmin sərəncama əsasən, 2009-cu il dövlət büdcəsində nəzərdə tutulmuş Azərbaycan Respublikası Prezidentinin Ehtiyat Fondundan "Azərbaycan Respublikası Dağlıq Qarabağ bölgəsinin azərbaycanlı icması" ictimai birliyinin mənzil-qərargahının əsaslı təmiri və zəruri avadanlıqlarla təchiz edilməsi məqsədilə 2 milyon manat məbləğində vəsait ayrılmışdır. İcmanın fəaliyyətinə hüquqi statusun verilməsi onun beynəlxalq miqyasda fəal şəkildə təşkilatlanmasına, erməni lobbisinin qərəzli təbliğat kampaniyasına qarşı effektiv mübarizə aparmasına imkan yaradır. İcma Dağlıq Qarabağ azərbaycanlılarının üzləşdikləri acınacaqlı vəziyyət barədə, eyni zamanda Ermənistanın azərbaycanlılara və türklərə qarşı tarixən törəkdikləri soyqırımı cinayətləri ilə bağlı məlumatların dünya birliyinə çatdırılmasını qarşısına əsas məqsəd qoyub. Bu istiqamətdə fəaliyyət üçün isə qeyd olunduğu kimi, icmaya dövlət tərəfindən ən yüksək səviyyədə xüsusi qayğı göstərilir.

Beləliklə, qeyd edilənlərdən bir daha aydın olur ki, qaçqınların və məcburi köçkünlərin yaşayış şəraiti son 6 ildə əhəmiyyətli dərəcədə yaxşılaşmış, onlar daim Prezident İlham Əliyevin göstərdiyi qayğı və diqqətlə əhatə olunmuşlar. Ən əsası isə odur ki, bu insanlar tezliklə öz doğma torpaqlarına qayıdacaqlarına böyük ümid bəsləyirlər. Onlar ölkə Prezidentinə - Ali Baş Komandana tam inanır, öz yurdlarına qayıdacaqları günün uzaqda olmadığını yaxşı bilirlər.

Rasim BAYRAMOV

Azərbaycan.- 2009.- 28 oktyabr.- S. 1.