QİƏT Parlament Assambleyasının komitə iclaslarında Ermənistanın Azərbaycanın ekologiyasına vurduğu ziyanla bağlı məsələ qaldırılmışdır

Ermənilərin işğal altında saxladığı Azərbaycan ərazilərində yanğınlar törətməsi, regiondakı çayları insan səhhəti üçün zərərli maddələrlə çirkləndirməsi bölgəni ekoloji fəlakətə aparır.

Bu barədə Azərbaycan Respublikası Milli Məclisinin deputatları Qara Dəniz İqtisadi Əməkdaşlıq Təşkilatı Parlament Assambleyasının (QİƏT PA) iqtisadiyyat, ticarət, texnologiya və ekologiya məsələləri, həmçinin mədəniyyət, təhsil və sosial məsələlər komitələrinin Yunanıstanın Soloniki şəhərində keçirilən iclaslarında məlumat vermişlər.

İclaslarda üzv dövlətlərdə ekoloji şüur və davranışın formalaşdırılması, Qara dəniz regionunda su sərvətlərindən istifadə, bu sahədə qanunvericilik bazasının möhkəmləndirilməsi məsələləri müzakirə olunmuşdur.

Milli Məclisin deputatları çıxış edərək Azərbaycanın ekologiyanın qorunması ilə bağlı gördüyü işlər, həyata keçirdiyi layihələrlə yanaşı, Ermənistanın nəinki Azərbaycanın, bütövlükdə regionun ekologiyasına vurduğu ziyan, bölgədəki çayları zəhərli maddələr, tullantılarla çirkləndirməsi barədə məlumatları diqqətə çatdırmışlar.

Qurumun Baş Assambleyasının ümumi iclası noyabrda Moskvada keçiriləcəkdir. Azərbaycan nümayəndə heyətinin üzvü, deputat Jalə Əliyeva bildirmişdir ki, bütün bu məsələlər həmin toplantıda daha geniş şəkildə müzakirə olunacaqdır. Deputat demişdir ki, Azərbaycan nümayəndə heyətinin qaldırdığı məsələlərə qurumda həssaslıqla yanaşılmışdır. Bu da Azərbaycanın Qara dəniz regionunda nüfuzunun getdikcə daha da artması ilə bağlıdır. Mədəniyyət, təhsil və sosial məsələlər komitəsinin Yunanıstandakı toplantısında keçirilən seçkilər zamanı ölkəmizin iki il müddətinə sədr müavinliyinə namizədliyinin irəli sürülməsi və yekdilliklə dəstəklənməsi bunu bir daha təsdiqləyir.

Jalə Əliyeva bu komitənin sədrinin müavini seçilmişdir.

AzərTAc

Azərbaycan.- 2009.-28 oktyabr.- S. 2.