"Xocalı faciəsi şəkillərdə" mövzusunda fotosərgi açılmışdır

"Xocalı Soyqırımını Tanıtma" İctimai Birliyi (İB) ilə Hollandiyada fəaliyyət göstərən Türklərin Soyqırımılarını Araşdırma vəqfi arasında bağlanmış müqaviləyə əsasən, 2010-cu ilin fevralında Haaqa şəhərində erməni qəsbkarlarının əzəli Azərbaycan torpaqlarında dinc əhaliyə qarşı törətdikləri soyqırımı faciəsi ilə bağlı beynəlxalq ictimai məhkəmənin keçirilməsi planlaşdırılmışdır.

Birliyin ictimaiyyətlə əlaqələr şöbəsindən bildirmişlər ki, bu ərəfədə qurumun fəalları Azərbaycanın şəhər və rayonlarında silsilə tədbirlər keçirir, təşkilatın maddi-texniki bazasını gücləndirmək üçün zəruri addımlar atırlar.

Belə tədbirlərdən biri də oktyabrın 27-də Salyan Şəhər Dövlət Rəsm Qalereyasında "Xocalı faciəsi şəkillərdə" mövzusunda keçirilmiş fotosərgi olmuşdur. Tədbirdə İB-nin sədri Şamil Sabiroğlu beynəlxalq ictimai məhkəməyə hazırlıq çərçivəsində keçirilən fotosərginin əhəmiyyətindən danışmışdır. Bildirmişdir ki, qurum Azərbaycan Mətbuat Şurası ilə birlikdə "Qarabağ mövzusunun və Xocalı soyqırımının mediada təbliğinə dəstək" layihəsini də həyata keçirir.

Çıxış edənlər ermənilərin əsrlər boyu Azərbaycan və türk xalqlarına qarşı həyata keçirdikləri soyqırımı siyasətinin dünya ictimaiyyətinə çatdırılmasında İB-yə uğurlar arzulamışlar.

Sonda Salyan şəhər 3 nömrəli orta məktəbin şagirdləri maraqlı ədəbi-bədii kompozisiya göstərmişlər

Azərbaycan.- 2009.- 29 oktyabr.- S. 5.