Ədliyyə Nazirliyində

Ədliyyə naziri, Məhkəmə-Hüquq Şurasının sədri Fikrət Məmmədov oktyabrın 29-da Koreya Respublikasının Azərbaycanda fəaliyyət müddəti başa çatmış səfiri Lü Kvanq Çul ilə görüşmüşdür.

Ədliyyə Nazirliyinin mətbuat xidmətindən bildirmişlər ki, ölkələrimiz arasında dostluq və əməkdaşlıq münasibətlərinin uğurla inkişaf etdiyini bildirən nazir hüquqi sahədə əlaqələrin əhəmiyyətini, müqavilə-hüquq bazasının möhkəmləndirilməsi istiqamətində görülən tədbirlərin ölkələrimizin ədliyyə orqanları arasında əməkdaşlığın daha da dərinləşməsinə təkan verəcəyini vurğulamış, bu sahədə səfirin xidmətlərini qeyd etmişdir.

Koreya ilə Azərbaycan arasında səmərəli əməkdaşlığın həyata keçirildiyini bildirən səfir ölkəmizdə fəaliyyətdən məmnunluğunu ifadə etmiş, hüquqi sahədə qurulmuş əlaqələri yüksək dəyərləndirmiş və qarşılıqlı münasibətlərin gələcəkdə daha da genişlənəcəyinə əminliyini bildirmişdir.

Görüşdə əməkdaşlıq perspektivləri, o cümlədən hüquqi yardım, hakim və hakimliyə namizədlərin, habelə ədliyyə işçilərinin treninqi və tədris səfərlərinin təşkili, Ədliyyə Akademiyası ilə birgə tədbirlərin keçirilməsi, digər məsələlər barədə faydalı fikir mübadiləsi aparılmış, konkret təkliflər irəli sürülmüşdür.

Azərbaycan.- 2009.- 30 oktyabr.- S. 7.