"Mətbuat nizamnaməsi"nin 90 illiyinə həsr olunmuş "dəyirmi masa"

Oktyabrın 30-da Azərbaycan Mətbuat Şurasında (AMŞ) Azərbaycan Xalq Cümhuriyyəti (AXC) parlamenti tərəfindən qəbul edilmiş "Mətbuat nizamnaməsi"nin 90 illiyi ilə bağlı "dəyirmi masa" keçirilmişdir.

AMŞ-nin sədri Əflatun Amaşov AXC parlamentinin 1919-cu ilin oktyabrında keçirilmiş iclaslarında yeddi günlük müzakirələrdən sonra qəbul edilmiş və olduqca mükəmməl hazırlanmış bu tarixi sənəd barədə məlumat vermişdir. Sənədə əsasən KİV-lər üzərində senzura ləğv olunmuşdur. Qəzetlərlə bağlı bütün problemlər isə məhkəmə vasitəsilə nizama salınmalı idi.

Tədbirdə çıxış edənlər - Bakı Dövlət Universitetinin professorları Şamil Vəliyev və Cahangir Məmmədli, "Azərbaycan" qəzetinin baş redaktoru, Milli Məclisin deputatı Bəxtiyar Sadıqov və başqaları 24 maddə və 2 fəsildən ibarət "Mətbuat nizamnaməsi"nin tarixi rolundan danışmışlar. Bildirilmişdir ki, bu sənəd Azərbaycanda XX əsr söz və fikir azadlığının əsasını qoymuşdur. Təklif olunmuşdur ki, milli mətbuatımıza dair ilk qanun olan "Mətbuat nizamnaməsi" şərhlərlə birlikdə kütləvi informasiya vasitələrində çap edilsin.

Azərbaycan.- 2009.- 31oktyabr.- S. 4.