Dövlət qayğısı idmançıları yeni qələbələrə ruhlandırır

 

İstənilən dövlətdə idmanın, bədən tərbiyəsinin inkişafı bu sahənin tərəqqisi üçün həyata keçirilən davamlı və məqsədyönlü tədbirlər sistemi ilə şərtlənir. İdman sahəsində qazanılan nailiyyətlər müasir dövrdə həm də dövlətlərin ümumi inkişaf səviyyəsini müəyyən edən əsas meyarlardan birinə çevrilmişdir. Azərbaycanda idman sahəsində davamlı olaraq qazanılan nailiyyətləri, ilk növbədə, milli genefondun qorunması baxımından vacib əhəmiyyət kəsb edən bu sahənin inkişafına göstərilən yüksək diqqət və qayğının bəhrəsi kimi dəyərləndirilir.

 

Son illərdə respublikada sosial-iqtisadi inkişaf meyillərinin güclənməsi cəmiyyətdə idmanın ayrı-ayrı növlərinin inkişafına və kütləviləşməsinə, habelə milli Olimpiya hərəkatının genişlənməsinə də ciddi təkan vermiş, xalqımız özünəməxsus ənənə və dəyərlər əsasında yeni milli fiziki tərbiyə və kamilləşmə sistemi yaratmışdır.

1997-ci ildən Milli Olimpiya Komitəsinin prezidenti kimi idmanın inkişafında misilsiz xidmətlər göstərmiş cənab İlham Əliyev 2003-cü ilin 15 oktyabrında dövlət başçısı seçildikdən sonra xalqın mənəvi və fiziki sağlamlığı baxımından strateji əhəmiyyət daşıyan bu sahəyə dövlət qayğısının gücləndirilməsini təmin etmiş, Azərbaycanın dünya idman ailəsinin bərabərhüquqlu üzvünə çevrilməsinə, kütləvi idman ölkəsi kimi məşhurlaşmasına nail olmuşdur. Ötən 6 ildə milli maraqlara əsaslanmaqla həyata keçirilən bu siyasət ölkədə Olimpiya hərəkatının genişlənməsi, idman və bədən tərbiyəsinin tərəqqisi və daha geniş coğrafi məkanda təbliği, eləcə də beynəlxalq yarışlarda uğurla çıxış edə biləcək yüksək səviyyəli idmançıların hazırlanması məqsədinə xidmət etmişdir.

"İdmana qoyulan sərmayə xalqın sağlamlığına qoyulan sərmayədir", - deyən Azərbaycan Prezidenti, MOK rəhbəri İlham Əliyev idmanın kütləviləşməsi məqsədilə son illərdə paytaxtda və respublikamızın ayrı-ayrı bölgələrində ən müasir tələblərə cavab verən 23 Olimpiya İdman Kompleksinin inşasına nail olmuşdur. 15-ə yaxın yeni Olimpiya İdman Kompleksinin tikintisinin davam etdirilməsi, eyni zamanda, təkcə son bir ildə Bakının Binəqədi rayonunda ən müasir tələblərə cavab verən Tennis Akademiyasının istifadəyə verilməsi, Mingəçevir şəhərində Avropada analoqu olmayan avarçəkmə bazasının inşası, Gimnastika Kompleksinin əsasının qoyulması, Daxili İşlər Nazirliyinin və Dövlət Sərhəd Xidmətinin idman müəssisələrinin inşası cənab İlham Əliyevin milli genefondun qorunması baxımından milli idman infrastrukturunun inkişafına necə böyük dəyər verdiyini bir daha təsdiqləyir.

Dövlət başçısı, MOK prezidenti İlham Əliyev Azərbaycan idmançılarının mötəbər beynəlxalq yarışlarda - Afina və Pekin Olimpiya oyunlarında layiqincə iştirakları və uğur qazanmaları naminə bütün lazımi tədbirləri görmüş, onların maddi-mənəvi stimullaşdırılmasını təmin etmişdir. Pekin Olimpiadasının nəticələri təsdiqlədi ki, Azərbaycanda idmançıların sosial vəziyyətinin, mənzil-məişət şəraitinin yaxşılaşdırılması istiqamətində həyata keçirilən tədbirlər praktik nəticələr verir. Bu mötəbər idman yarışında Azərbaycanın qızıl medalların sayına görə 39-cu, ümumi medalların sayına görə 27-ci yeri tutması göstərdi ki, ümumbəşəri dəyərlərin tərkib hissəsi olaraq respublikamızda idman və bədən tərbiyəsinin davamlı tərəqqisinə mühüm önəm verilir. Eyni zamanda, MOK rəhbərliyinin peşəkarlığı, təşkilatçılıq məharəti, qətiyyəti, iradəsi, qarşıya qoyulmuş məqsəd və vəzifəyə doğru addım-addım, təmkinlə irəliləmək bacarığı sayəsində Azərbaycan idmanı özünün yüksəliş dövrünü yaşayır.

Dövlət başçısı İlham Əliyev ölkədə tarixi ənənələri olan idman klub və cəmiyyətlərinin hərtərəfli dəstəklənməsi və inkişafı, onların maddi-texniki bazasının möhkəmləndirilməsi istiqamətində də məqsədyönlü tədbirlər həyata keçirir. Azərbaycan Respublikası Dövlət Neft Şirkətinin Sosial İnkişaf İdarəsinin nəzdində fəaliyyət göstərən, təxminən 70 il ərzində respublikada adlı-sanlı idmançıların yetişdirilməsində əvəzsiz xidmətləri olan "Neftçi" İdman-Sağlamlıq Mərkəzi də ölkə rəhbərliyinin idmana davamlı diqqət və qayğısını fəaliyyətində daim hiss edir. Azərbaycanda bədən tərbiyəsinin, idmanın geniş təbliğində, inkişafında və kütləviləşməsində əhəmiyyətli rol oynayan mərkəz son illərdə əsaslı təmir edilmiş, ən müasir idman inventarı, qurğuları və avadanlıqları ilə təchiz olunmuşdur. Burada təkcə neft-qaz sənayesi işçilərinin deyil, ümumilikdə ölkənin bütün perspektivli idmançılarının idmanla məşğul olması üçün hər cür şərait yaradılmışdır.

Zəngin idman ənənələrinə malik mərkəzdə hələ çox illər bundan əvvəl təkcə respublikamızda deyil, keçmiş SSRİ-də, hətta Avropada və dünyada məşhur olan futbolçular, atletlər, güləşçilər, ağırlıqqaldıranlar, üzgüçülər, boksçular, voleybolçular və digər idmançılar yetişmişlər. İstər keçmiş ittifaq dövründə, istərsə də müstəqillik illərində mərkəzin təmsilçiləri Azərbaycan idmanının tarixinə şanlı səhifələr yazmış, milli Olimpiya tariximizə möhürlərini vurmuşlar. Müxtəlif illərdə olimpiadaların mükafatçıları - atlet Yuri Konovalov, beşnövçü Viktor Mineyev, voleybolçular İnna Rıskal və Vera Lantratova, sərbəst güləşçi Namiq Abdullayev, yunan-Roma güləşçisi Fərid Mansurov, boksçu Vüqar Ələkbərov, güllə atıcısı İradə Aşumova, paralimpiya oyunlarının qalibləri Gündüz İsmayılov, İlham Zəkiyev, Oleq Panyutin, Zeynəddin Bilalov, Yuriy Qornak, Aleksandr Polişuk, Yelena Taranova bu mərkəzin yetirmələridir. Eyni zamanda, ayrı-ayrı idman növləri üzrə Avropa və dünya çempionatlarının, kuboklarının, eləcə də Olimpiya oyunlarının mükafatçıları - Mehman Əzizov, Nicat Şıxəlizadə, Elnur Məmmədli, Kifayət Qasımova, Rövşən Bayramov, Vitali Rəhimov, Elman Əsgərov, Ruslan Xairov, Yelena Cemayeva, Teymur Rəcəbov, Eltac Səfərli, Vüqar Həşimov, Vasif Durarbəyli, Canna Muradqızı, Ramil Quliyev, Aliyə Qarayeva və onlarla bu kimi idmançıların da adını bu sırada fərəhlə sadalamaq olar.

Pekin Yay Olimpiya Oyunlarına "Neftçi" İSM-in idmançıları 22 lisenziya qazanmışlar. Bundan əlavə, Paralimpiya Oyunlarına da qazanılmış bütün lisenziyalar "Neftçi" İSM-in idmançılarına aiddir. Bir müddət əvvəl Yerevanda keçirilən cüdo üzrə dünya çempionatında fəxri kürsüyə qalxaraq Azərbaycanın üçrəngli bayrağını ucaldan, düşmən torpağında himnini səsləndirən fədakar cüdoçumuz Elmar Qasımov da məhz "Neftçi" İSM-də yüksək səviyyəli idmançı kimi formalaşmışdır.

Bu gün respublikada ən böyük idman cəmiyyətlərindən biri kimi yüksək dərəcəli, peşəkar idmançıların hazırlığında öncül mövqeyə malik "Neftçi" İSM-də idmanın 26 növü üzrə gün ərzində 5000-dən çox yeniyetmə gənc, qızlar, qadınlar və kişilər 180 peşəkar məşqçi-müəllimin nəzarəti altında müxtəlif idman növləri üzrə məşğul olurlar. Mərkəzin 12 idman müəssisəsi - T.İsmayılov adına Olimpiya Təlim-İdman Kompleksi, İ.Qayıbov adına və Qaradağ təlim-idman bazaları, Qış Üzgüçülük Hovuzu, Təlim-Məşq Kompleksi, "Məşəl" İdman Kompleksi, Bibiheybət, Pirallahı, Qaraçuxur, Siyəzən, Şirvan stadionları və İdman Zalı Kompleksi mövcuddur.

Mərkəzin idmançıları, məşqçiləri, hakimləri və mütəxəssisləri müxtəlif beynəlxalq yarışlara, təlim-məşq toplantılarına və seminarlara ezam olunur, yüksək nailiyyətlərə görə mükafatlandırılırlar. Milli Olimpiya Komitəsi, Gənclər və İdman Nazirliyi, yerli, beynəlxalq federasiyalar, eləcə də digər idman təşkilatları ilə sıx əlaqələr qurulur və əməkdaşlıq edilir. Xüsusi vurğulamaq istərdim ki, 2009-cu il fəaliyyətinin səmərəliliyinin artırılması, qazanılmış medalların kəmiyyət və keyfiyyət nisbəti baxımından "Neftçi" İSM üçün uğurlu olmuşdur. ARDNŞ strukturuna daxil olan neft və qaz sənayesi müəssisələrində çalışan işçilərə, onların ailə üzvlərinə müasir tələblərə cavab verən bədən tərbiyəsi və idman xidmətlərinin göstərilməsi məqsədilə il boyu respublikanın əlamətdar günlərinə və bayramlarına həsr olunmuş mini-futbol, voleybol, şahmat, dama, turizm və başqa növlər üzrə kütləvi idman tədbirləri keçirilmiş, həmin yarışlara 1000-dən çox neftçi qatılmışdır. Eyni zamanda, 2009-cu ilin 9 ayında mərkəzin 5 idman növü üzrə müxtəlif yaş qruplarında açıq birincilikləri keçirilmiş, bu yarışlarda 600-dək yeniyetmə və gənc iştirak etmişdir. Mərkəzdə uşaqların və gənclərin futbola marağının gücləndirilməsi, səviyyəli futbolçuların yetişdirilməsi istiqamətində də məqsədyönlü tədbirlər həyata keçirilir.

Hesabat dövründə "Neftçi" İSM-in idmançıları 200-dən artıq müxtəlif səviyyəli yarışlarda iştirak edərək 1372 medal qazanmışlar. Mərkəzin idmançıları 2009-cu ilin 9 ayında dünya, Avropa və respublika səviyyəli çempionatlarda, kuboklarda, birinciliklərdə ümumilikdə 537 qızıl, 375 gümüş, 460 bürünc medal qazanmışlar. Bütün bunlar "Neftçi" İSM-in respublikamızın idman uğurlarındakı müstəsna rolunu bir daha nümayiş etdirir.

2003-cü ilin 31 oktyabrında xalqa və dövlətə sədaqət andı içərək səlahiyyətlərinin icrasına başlayan dövlət başçısı İlham Əliyevin son altı illik qayğısı nəticəsində "Neftçi" İSM respublika idmanının əsas lokomotivlərindən birinə çevrilmiş, qarşıya qoyduğu məqsədlərə doğru inamla irəliləmişdir. Dövlətin bu sahəyə həssas münasibəti və diqqəti hər bir vətənpərvər Azərbaycan idmançısını yeni-yeni qələbələrə səsləndirir, onların üzərinə böyük mənəvi məsuliyyət qoyur. İdman mərkəzi olaraq bizim də əsas hədəfimiz 2012-ci ildə Londonda keçiriləcək Olimpiya oyunlarına daha çox lisenziya qazanmaq, respublikamızı bu mötəbər idman yarışında layiqincə təmsil etməkdir.

 

 

Sadıq SADIQOV,

"Neftçi" İdman Sağlamlıq

Mərkəzinin icraçı direktoru

 

Azərbaycan.- 2009.- 31oktyabr.- S. 5.