İsveç qondarma "erməni soyqırımı"nı yenidən rədd edir

İsveçdə nəşr olunan gündəlik "Deens" qəzeti ölkənin nüfuzlu Sosial Demokrat Partiyasında ölkənin tanınmış siyasətçilərindən olan Klaas Nordmarkın rəhbərlik etdiyi fraksiyanın qondarma "erməni soyqırımı"nı bu yaxınlarda baş tutacaq toplantıda yenidən nəzərdən keçirməyi qərara alması barədə material dərc etmişdir. Qəzetin müxbiri Andreas Nisson bununla bağlı dərc etdirdiyi məqaləsində fraksiyanın "soyqırımı" tanıması istiqamətində atdığı addımı ölkə üçün təhqiramiz bir hadisə adlandırmışdır.

Jurnalist hələ keçən il ölkə parlamentində "soyqırımı" məsələsi müzakirə olunarkən 245 deputatın "soyqırımı"n tanınmasına "yox" dediyini, yalnız 37 parlament üzvünün onun lehinə səs verdiyini xatırlatmışdır.

Partiyada tanınmış şəxsiyyətlərin bir neçəsinin "soyqırımı" tanımaq barədə təkliflərinin geniş müzakirələrə səbəb olduğu məqalədə öz əksini tapmışdır. Amma partiya rəhbərliyinin bu təklifin konqresdə müzakirəyə çıxarılmasından tamamilə boyun qaçırdığı bildirilmişdir.

Təklifin əsas müəllifi olan K.Nordmark etiraf etmişdir ki, rəhbərliyin "soyqırımı" rədd etməsi onu və tərəfdarlarını tamamilə çıxılmaz vəziyyətdə qoymuşdur. İsveçli deputat öz təklifinə aydınlıq gətirərək bildirmişdir ki, o, keçən il Türkiyəyə səfər etmiş və "soyqırımı" ilə bağlı məsələlərlə yaxından tanış olmuşdur. O, partiyada "soyqırımı" məsələsini qaldırarkən heç də onun tanınması məqsədini güdmək istəmədiyini, sadəcə olaraq, ətraflı öyrənildikdən sonra bu məsələnin birdəfəlik tarixdən yığışdırılmasını istəyir.

İsveçdəki erməni icması məsələnin belə şəkil almasından və İsveç hökumətinin qondarma "erməni soyqırımı"nı tanımamasından narazılıqlarını ifadə etmişlər.

Əsgər Əliyev,

AzərTAc-ın xüsusi müxbiri

Paris

Azərbaycan.- 2009.- 31 oktyabr.- S. 7.