Türkiyənin səfiri "Azərbaycan"ın qonağı oldu

Dünən Türkiyə Respublikasının ölkəmizdəki fövqəladə və səlahiyyətli səfiri Hulusi Kılıç redaksiyamızda olmuşdur."Azərbaycan" qəzetinin Baş redaktoru, Milli Məclisin deputatı Bəxtiyar Sadıqov qonağı salamlayaraq qardaş Türkiyənin hər zaman Azərbaycanın yanında olduğunu, ölkəmizin çətin durumlarında maddi və mənəvi yardımını əsirgəmədiyini vurğuladı. Baş redaktor dedi: "Azərbaycan" qəzeti 1918-ci ildə yeni qurulan Azərbaycan Xalq Cümhuriyyətinin Osmanlı dövləti ilə münasibətlərinin yarandığı və çiçəkləndiyi bir vaxtda nəşrə başlayıb. Sovet hakimiyyəti illərində isə Azərbaycanla Türkiyənin arasına dəmir pərdə çəkildi, "Azərbaycan" qəzetinin isə nəşri dayandırıldı. Ölkəmiz ötən əsrin axırlarında dövlət müstəqilliyini bərpa etdikdən sonra onu ilk olaraq Türkiyə tanıdı. Nəşri bərpa olunan "Azərbaycan" qəzeti isə öz səhifələrində iki qardaş ölkə arasında münasibətlərə həmişə geniş yer verir. Azərbaycanı Türkiyədən, Türkiyəni isə Azərbaycandan ayırmaq qeyri-mümkündür.

"Azərbaycan" qəzeti Azərbaycan-Türkiyə münasibətlərinin işıqlandırılmasında məhz bu mövqedən çıxış edir".

Təməlində qırılmaz dostluq və qardaşlıq telləri dayanan Azərbaycan-Türkiyə münasibətlərinin çoxşaxəli olduğunu deyən Baş redaktor əlaqələrimizin həm də strateji önəm daşıdığını vurğuladı. Azərbaycanın təşəbbüsü ilə bölgədə uğurla reallaşan qlobal enerji və iqtisadi layihələrdə qardaş ölkə də yaxından iştirak edir. Bəxtiyar Sadıqov mədəniyyət, din və dil birliyi kimi sarsılmaz tellərlə bir-birinə bağlı olan qardaş Azərbaycan və Türkiyə dövlətlərinin müasir dünya nizamında daha sıx əməkdaşlığının və birlik nümayiş etdirməsinin bu gün daha mühüm əhəmiyyət kəsb etdiyini diqqətə çatdırdı.

Baş redaktor sözünə davam edərək dedi ki, Türkiyə ilə Azərbaycanın bir-birinə qırılmaz tellərlə bağlandığını, bütün məsələlərdə həmrəy olduğunu təsdiqləyən amillərdən biri rəsmi Ankaranın Ermənistan-Azərbaycan, Dağlıq Qarabağ münaqişəsinin həlli ilə bağlı tutduğu mövqedir. Qardaş Türkiyə ilk gündən ölkəmizin haqq işini qətiyyətlə dəstəkləyir və bu münaqişədə tutduğu prinsipial mövqe cəmiyyətimizdə böyük razılıqla qarşılanır.

Ölkəmizin önəmli mətbu nəşrlərindən olan "Azərbaycan" qəzetinin qonağı olmaqdan məmnunluğunu ifadə edən səfir Hulusi Kılıç öncə redaksiyanın fəaliyyətinə uğurlar arzuladı. Ulu öndər Heydər Əliyevin "Türkiyə ilə Azərbaycan bir millət, iki dövlətdir" kəlamını sitat gətirən səfir azərbaycanlıların Çanaqqala döyüşlərində şəhid olmasını, Nuru paşanın komandanlığı ilə 8 minlik türk ordusunun Azərbaycana gəlişini iki qardaş ölkənin tarixində parlaq və qürurverici səhifələr olduğunu söylədi.

Səfir Hulusi Kılıç daha sonra bildirdi ki, Azərbaycanın işğal olunmuş torpaqları azad edilməyincə Türkiyə Ermənistanla sərhədləri açmayacaq. Bunu Türkiyənin Baş naziri Rəcəb Tayyib Ərdoğan Azərbaycana son səfəri zamanı bir daha bəyan edib. Türkiyə xalqı Azərbaycanın torpaqları azad edilməyincə sərhədlərin açılmasına qarşıdır. Türkiyə atdığı hər addımda Azərbaycanı düşünür. Çünki Azərbaycanın maraqları Türkiyənin maraqlarıdır.

Görüş zamanı ikitərəfli əlaqələrin daha da sıxlaşdırılması, o cümlədən iki ölkənin kütləvi informasiya vasitələri arasında əməkdaşlığın genişləndirilməsi ilə bağlı fikir mübadiləsi aparıldı.

Rəşad CƏFƏRLİ

Azərbaycan.- 2009.- 2 sentyabr.- S. 10.