Hacıqabul rayon Uşaq Tibb Mərkəzi istifadəyə verilmişdir

Sentyabrın 3-də Hacıqabul rayon Uşaq Tibb Mərkəzinin açılışı olmuşdur.

Azərbaycan Prezidenti İlham Əliyev mərasimdə iştirak etmişdir.

Mərasimə toplaşan səhiyyə işçiləri, ictimaiyyətin nümayəndələri dövlətimizin başçısını böyük hörmət və ehtiramla, hərarətli alqışlarla qarşıladılar.

Prezident İlham Əliyev uşaq xəstəliklərinin qarşısının alınması, profilaktikası məqsədi ilə tikilən mərkəzin açılışını bildirən lenti kəsdi və səhiyyə ocağı ilə yaxından tanış oldu.

Təməli 2007-ci ilin avqustunda Prezident İlham Əliyev tərəfindən qoyulan Hacıqabul rayon Uşaq Tibb Mərkəzinin ümumi sahəsi 5 min kvadratmetr, ikimərtəbəli binanın sahəsi isə 688 kvadratmetrdir. Müasir standartlara uyğun inşa edilmiş səhiyyə ocağının ayrıca qazanxanası, su anbarı və elektrikpaylayıcı generatoru vardır. Mərkəzin həyətyanı sahəsi abadlaşdırılmış, yaşıllıq zolağı salınmış, tibb müəssisəsinə gələn yola asfalt döşənmiş, yeni işıqlandırma sistemi quraşdırılmışdır.

Mərkəzin tikintisində yerli və xarici ölkələrdən gətirilmiş inşaat materiallarından və avadanlıqdan istifadə olunmuşdur. Ümumilikdə, 250 kvadratmetr əraziyə qranit, 150 kvadratmetr sahəyə isə mərmər döşənmişdir.

Uşaq Tibb Mərkəzinin birinci mərtəbəsində poliklinika, stomatologiya, cərrahiyyə, oftalmologiya, travmatologiya şöbələri, nevropatoloq, LOR həkim kabinetləri, manipulyasiya, peyvənd, masaj, fizioterapiya və yeniyetmələr otaqları yerləşir. İkinci mərtəbədəki 15 çarpayılıq stasionar şöbədə isə qəbul, prosedur otaqları, yeməkxana vardır.

Mərkəzdə uşaqlar üçün əyləncə otağı və bufet də fəaliyyət göstərir.

Dövlətimizin başçısına məlumat verildi ki, Uşaq Tibb Mərkəzində 17 həkim və 30 nəfərdən ibarət orta tibb heyətinin işləyəcəyi nəzərdə tutulmuşdur. Mərkəz Hacıqabul rayonu ilə yanaşı qonşu rayonların da əhalisinə xidmət göstərəcəkdir.

Mərkəzin fəaliyyəti ilə tanış olan dövlətimizin başçısı səhiyyə ocağının kollektivi ilə görüşdü. Prezident İlham ƏLİYEV onları təbrik edərək dedi:

- Bu gözəl Uşaq Tibb Mərkəzinin açılışı münasibətilə sizi ürəkdən təbrik edirəm, sizə uğurlar arzulayıram. Bu gözəl mərkəz ən yüksək standartlara malikdir. Dünyada mövcud olan ən gözəl avadanlıq burada vardır və quraşdırılıb. Mərkəz keyfiyyətlə tikilib və əminəm ki, uşaqlara burada çox gözəl tibbi xidmət göstəriləcəkdir. Hacıqabul rayonunda səhiyyə məsələlərinin həlli uğurla gedir.

Xəstəxana istifadəyə verilibdir, indi isə Uşaq Tibb Mərkəzi. Elə etməliyik ki, bütün rayonlarda, bütün yaşayış məntəqələrində, Azərbaycanda səhiyyənin səviyyəsi yüksək olsun və buna nail oluruq. Azərbaycanın müxtəlif yerlərində, müxtəlif bölgələrində ən müasir, gözəl xəstəxanalar tikilir, ən gözəl avadanlıqla təchiz edilir və insanlara yaxşı tibbi xidmət göstərilir.

Eyni zamanda, belə gözəl xəstəxananın həkimlərin iş şəraitinin yaxşılaşdırılması üçün də öz rolu olacaqdır. Çünki həkimlər də gərək yaxşı şəraitdə işləsinlər, xəstələr yaxşı tibbi xidmət almalıdırlar.

Azərbaycanda səhiyyə sistemində növbəti illərdə də vacib addımlar atılacaqdır. İldən-ilə səhiyyəyə ayrılan xərclər artır, infrastruktur yeniləşir, Bakıda və bütün bölgələrdə çox böyük elmi mərkəzlər yaradılır və bu proses davam edir. Biz elə etməliyik ki, növbəti bir neçə il ərzində Azərbaycanda səhiyyə sisteminin bütün infrastrukturunu lazımi səviyyəyə gətirək. Son illər ərzində görülmüş işlər deməyə əsas verir ki, biz buna nail olacağıq. Çünki görülən bütün işlər göz qabağındadır. Azərbaycanın ən ucqar rayonlarında ən müasir, dünya səviyyəli tibb ocaqları yaradılır. Bu, hər bir ölkənin ümumi inkişaf imkanlarını göstərir. Azərbaycanın səhiyyə sisteminə ayrılan vəsaitin və göstərilən diqqətin timsalında hamı görür ki, güclü iqtisadiyyat güclü sosial siyasətin təməlidir.

Azərbaycan iqtisadiyyatı çox güclüdür. Bu böhranlı aylara, - bütün dünyanı maliyyə böhranı bürüyüb, - baxmayaraq, Azərbaycan iqtisadiyyatı irəliyə gedir. Bu ilin altı ayında təxminən 4 faiz iqtisadi artım vardır. Bizim büdcə gəlirlərimiz də lazımi səviyyədədir, büdcə xərcləri də vaxtında icra olunur. Sosial siyasətin uğurla davam etdirilməsi üçün əlbəttə ki, Azərbaycanda iqtisadi islahatlar davam etdirilməlidir.

Son illər ərzində bütün bölgələrdə böyük quruculuq işləri aparılır. Bütün bölgələrdə müasir infrastruktur - məktəblər, tibb ocaqları, elektrik stansiyaları yaradılır, yollar, qaz xətləri, su kəmərləri çəkilir, yəni insanın yaşaması üçün hər şey edilir. Biz bu inkişafı Hacıqabul rayonunun timsalında da görürük. Rayonda son beş il ərzində müxtəlif məhsulların buraxılışı üç dəfə artıb, ümumi iqtisadi artım vardır. Bəzən bizdə - Azərbaycanda iqtisadi uğurlarımızı enerji sektoru ilə bağlayırlar. Amma baxın, Azərbaycanda qeyri-neft sektoru neft sektorundan daha böyük templərlə artır. Nə üçün?! Çünki biz öz imkanlarımızdan səmərəli istifadə edə bilmişik, infrastruktur layihələrinə vəsait ayırmışıq. Kənd təsərrüfatının, sahibkarlığın inkişafı üçün böyük vəsaitlər ayrılır, yardımlar edilir və beləliklə, Azərbaycan iqtisadiyyatı hərtərəfli inkişaf edir. Bu, hər bir ölkənin uğurunun təməlində dayanan məsələdir.

O ki qaldı sosial siyasətə, bu, artıq ölkələrin prioritetlərindən asılıdır. Biz bazar iqtisadiyyatı şəraitində yaşayırıq və bazar iqtisadiyyatının qanunları bəzən çox sərt olur. Ancaq biz bazar iqtisadiyyatının bütün prinsiplərini Azərbaycanda tətbiq etməklə yanaşı, elə etməliyik ki, güclü sosial müdafiə, sosial siyasət, insanlara qayğı olsun, belə gözəl tibb ocaqları tikilib istifadəyə verilsin. Bu da Azərbaycanda vardır və mən heç şübhə etmirəm ki, növbəti illərdə ölkəmiz daha da inkişaf edəcək, daha da güclənəcəkdir. Demək olar ki, dünyanı bürümüş maliyyə böhranı Azərbaycana çox az təsir göstərdi. Bunun da köklü səbəbləri var - düzgün iqtisadi siyasət, siyasi sabitlik, xalqla iqtidar arasında olan birlik və ölkəmizdə mövcud problemlərin vaxtında həlli.

Mən çox şadam ki, yenidən Hacıqabuldayam. Mən iki il bundan əvvəl sizinlə bərabər bu gözəl uşaq mərkəzinin təməlini qoymuşam və çox şadam ki, iki ildən sonra bu mərkəzin açılışında sizinlə bərabər iştirak edirəm. Sizi bu gözəl hadisə münasibətilə bir daha ürəkdən təbrik edirəm və sizə uğurlar arzulayıram.

* * *

Həkim Aynur Qasımzadə dövlətimizin başçısına təşəkkür edərək dedi:

- Cənab Prezident, icazə verin Sizi Hacıqabul sakinləri və tibb işçilərimiz adından salamlayım.

Cənab Prezident, xoş gəlmisiniz!

Bu gün rayonumuz sevinc içərisindədir. Xüsusilə, biz tibb işçilərinin sevinci hədsizdir.

Çünki bu gün rayonumuzda müasir avadanlıqla təchiz olunmuş bu möhtəşəm Uşaq Tibb Mərkəzinin açılışıdır.

Əziz Prezident, iki il əvvəl Sizin xeyir-duanızla təməli qoyulan və bu gün açılışına toplaşdığımız Uşaq Tibb Mərkəzinin bizlərə bəxş etdiyi sevinci heç vaxt unutmayacağıq. Mərkəzin "Uşaq ili" elan olunan 2009-cu ildə istifadəyə verilməsi bütün körpələr üçün ən böyük töhfədir. Bizlərə bəxş etdiyiniz sevincə görə bütün həkim ordusu adından, eləcə də rayonumuzun sakinləri adından Sizə dərin minnətdarlığımızı bildiririk.

Əziz Prezident, Sizin atdığınız hər bir addım, qəbul etdiyiniz hər bir qərar Azərbaycanın işıqlı gələcəyinə yönəlmişdir. Biz "gələcək" deyəndə sağlam körpələrimizi nəzərdə tuturuq. Bu gün biz bir həkim ordusu kimi söz veririk ki, bütün körpələrimizin sağlamlığı naminə hər bir çətinlikdən mərdliklə çıxacağıq. Əziz Prezident, mənə verilən bu imkandan istifadə edərək, səhiyyəmizin, təhsilimizin və mədəniyyətimizin inkişafına göstərdiyi misilsiz xidmətlərinə, nəcib əməllərinə görə bütün xalqın sevimlisi Heydər Əliyev Fondunun prezidenti Mehriban xanıma öz dərin təşəkkürümüzü bildiririk.

Əziz Prezident, Sizin tapşırığınız və böyük köməyinizlə inşa olunan bu müasir sağlamlıq ocağında müxtəlif uşaq xəstəliklərinin müalicəsi və diaqnostikası üçün hər cür imkan və şərait vardır. Biz hacıqabullular Sizi daim dəstəkləyir, hər addımınızı bəyənirik və Sizi çox sevirik.

* * *

Sonda Prezident İlham Əliyev kollektivlə xatirə şəkli çəkdirdi.

AzərTAc

Azərbaycan.- 2009.- 4 sentyabr.- S. 1, 2.