Azərbaycan ordusu istənilən ekstremal şəraitdə düşməni məhv etməyə qadirdir

Sentyabrın 4-də Azərbaycan Müdafiə Nazirliyinin mətbuat xidmətinin rəisi, polkovnik-leytenant Eldar Sabiroğlu kütləvi informasiya vasitələrinin nümayəndələri üçün mətbuat konfransı keçirdi. Müdafiə Nazirliyi rəhbərliyinin KİV-lə əlaqələrin dərinləşdirilməsinə böyük önəm verdiyini deyən Eldar Sabiroğlu axırıncı mətbuat konfransından ötən müddət ərzində orduda görülmüş işlərlə bağlı məlumatları diqqətə çatdırdı.

Müdafiə Nazirliyinin qoşun növlərinin və birləşmələrinin müasir hərbi texnika və silah-sursatla təchizatı prosesinin uğurla davam etdiyini deyən Eldar Sabiroğlu qeyd etdi ki, bu gün Azərbaycan Silahlı Qüvvələri Cənubi Qafqazın ən güclü və qüdrətli ordusudur. Bunu beynəlxalq təşkilatlar, hərbi institutlar və ekspertlər də təsdiq edirlər.

Eldar Sabiroğlu bildirdi ki ki, Azərbaycan ordusunda 2007-ci ildən başlayan struktur dəyişikliklərinin nəticəsində onun quru qoşunları, hərbi dəniz və hərbi hava qüvvələri müasir standartlara uyğunlaşdırılmışdır. Bu dəyişikliklər ordunun çevik və operativ idarə edilməsində müsbət rol oynayır. Müdafiə Nazirliyi Aparatında həyata keçirilən struktur dəyişiklikləri isə başa çatmaq üzrədir.

Eldar Sabiroğlu bu il iyunun 24-də - Azərbaycan Silahlı Qüvvələrinin yaradılmasının 91-ci ildönümü ərəfəsində keçirilən irimiqyaslı birgə əməliyyat-taktiki təlimindən də ətraflı söz açdı. Bildirdi ki, təlimi ölkə Prezidenti, Ali Baş Komandan İlham Əliyev izləyib və bunu çox yüksək qiymətləndirib. Təlimdə 4 min nəfərdən çox şəxsi heyət, 99 tank, 55 zirehli döyüş maşını, 123 artilleriya sistemi, 12 döyüş təyyarəsi, 12 döyüş vertolyotu və 5 nəqliyyat döyüş vertolyotu iştirak edib. Bu təlim bir daha göstərdi ki, Azərbaycan ordusunun döyüş hazırlığı həqiqətən yüksək səviyyədəddir, istənilən ekstremal şəraitdə düşməni məhv etməyə qadirdir. Təlimin əsas mərhələsində birləşmə və hissələrin döyüş tətbiqi və silah sistemlərinin real atışları həyata keçirilmiş, müxtəlif güc strukturlarının birləşmə və hissələri arasında qarşılıqlı əlaqə nümayiş etdirilmişdir.

Mətbuat konfransında bildirildi ki, Azərbaycan ordusunun beynəlxalq əlaqələri də yüksələn xətlə inkişaf etməkdədir. Azərbaycanın dünyanın 52 ölkəsi ilə hərbi sahədə əlaqəsi var. Bu, çox böyük göstəricidir. 26 ölkə ilə hərbi sahədə müxtəlif sənədlər imzalanıb. Bu onu sübut edir ki, Azərbaycan ordusu müasir standartlara yiyələnməklə və beynəlxalq əlaqələrini inkişaf etdirməklə müasir hərbi təcrübələrin əldə edilməsində misilsiz uğurlar qazanmışdır. Hazırda 23-ə yaxın ölkə ilə hərbi sahədə sənədlərin razılaşdırılması prosesi gedir. Yaxın vaxtlarda bu sənədlərin bir neçəsi reallaşacaq.

Ötən müddətdə Azərbaycan Müdafiə Nazirliyinin hərbçiləri "Sülh naminə tərəfdaşlıq" proqramı və "Fərdi tərəfdaşlığın əməliyyat planı" çərçivəsində keçirilən tədbirlərdə da fəal iştirak ediblər.

Mətbuat konfransında hərbi təhsil məsələlərinə də toxunuldu. Eldar Sabiroğlu bildirdi ki, hazırda ölkəmizdə hərbi təhsil effektiv inkişaf mərhələsinə qədəm qoymuşdur. Bunun nəticəsidir ki, Azərbaycanın bütün hərbi təhsil müəssisələrində - Heydər Əliyev adına Azərbaycan Ali Hərbi Məktəbində, Hərbi Dənizçilik Məktəbində və Hərbi Təyyarəçilik Məktəbində azərbaycanlılarla yanaşı müxtəlif dövlətlərdən olan kursantlar da təhsil alırlar. Bu, çox qürurverici bir haldır.

İnanırıq ki, gələcəkdə Azərbaycanın hərbi təhsilinə xarici ölkələrdə maraq daha da artacaq.

Son aylarda cəbhə xəttində erməni birləşmələri tərəfindən atəşkəsin müntəzəm olaraq pozulması davam edib. Ermənilər 199 dəfə Azərbaycan Silahlı Qüvvələrinin mövqelərini atəşə tutmuşlar. Atəşkəs rejiminin pozulması intensiv şəkildə cəbhənin Xocavənd, Goranboy, Ağdam və Tərtər istiqamətlərində baş verib.

Ötən aylarda ATƏT-in fəaliyyətdə olan sədrinin şəxsi nümayəndəsinin bilavasitə iştirakı ilə qoşunların təmas xəttində 4 dəfə monitorinq keçirilib. Ağdamın Mərzili və Əfətli, Füzulinin Qaraxanbəyli və Goranboyun Borsunlu kəndləri yaxınlığında keçirilən monitorinqlər insidentsiz başa çatıb.

Eldar Sabiroğlu ötən müddət ərzində bəzi təəssüfləndirici hadisələrin də baş verdiyini diqqətə çatdırdı.

Müdafiə Nazirliyinin daim deputatlar və qeyri-hökumət təşkilatlarının nümayəndələri ilə də sıx əməkdaşlığın qurulmasına böyük önəm verdiyini və onların cəbhə xəttindəki hərbi hissələrə səfərlərini təşkil etdiyini deyən Eldar Sabiroğlunun sözlərinə görə, bu yaxınlarda əsasən müxalifəti təmsil edən deputatlar və QHT təmsilçiləri N saylı hərbi hissədə olub və oradan çox gözəl təəssüratla ayrılıblar. Diqqəti cəlb edən əsas məqam ondan ibarətdir ki, deputatlar və QHT təmsilçiləri hansı hərbi hissəyə getmələrini özləri müəyyənləşdirirlər. "Müdafiə Nazirliyi bu cür əməkdaşlığın gələcəkdə daha da inkişaf etdirilməsinə çalışacaq. Yaxın günlərdə isə jurnalistlərin cəbhə xəttindəki hərbi hissələrə səfərinin təşkil edilməsi nəzərdə tutulur. Nazirlik buna vacib məsələ kimi baxır. Biz istəyirik ki, mətbuatla Müdafiə Nazirliyi arasında elə körpü yaradılsın ki, onu istənilən inciklik nə zəiflədə, nə də uçura bilsin" - deyə Eldar Sabiroğlu əlavə etdi.

Eldar Sabiroğlu onu da bildirdi ki, bu gün Azərbaycan ordusunun güclənməsini şərtləndirən əsas amil ölkəmizin iqtisadi qüdrətinin artmasıdır. Azərbaycan ordusu getdikcə inkişaf edəcək və hədəfdə duran əsas məsələ torpaqlarımızın işğaldan azad edilməsidir. Bunun məsuliyyəti Azərbaycan əsgərlərinin çiyinləri üzərindədir. Hələlik siyasi danışıqlar gedir və ümid edirik ki, bu uğurla yekunlaşacaq. Əks təqdirdə Azərbaycan ordusu öz üzərinə düşən vəzifəni dövlətimizin lazım bildiyi anda mütləq yerinə yetirəcəkdir. Buna heç bir şübhə olmamalıdır.

Rəşad CƏFƏRLİ

Azərbaycan.- 2009.- 5 sentyabr.- S. 2.