Alla Puqaçova: Bakı dünyada ən beynəlmiləl şəhərdir

Bakıda səfərdə olan SSRİ-nin və Rusiya Federasiyasının xalq artisti Alla Puqaçova jurnalistlərə müsahibəsində demişdir ki, Bakıda olmağımdan çox şadam. Qayğısız gəncliyimin ən şirin və sevincli anları Azərbaycanda keçmişdir. Burada mənim çoxlu dostlarım olmuşdur. Azərbaycan xalqı öz qonaqpərvərliyi və genişürəkliliyi ilə məni hər zaman heyrətləndirmişdir. Mən həmişə demişəm ki, Bakı ən beynəlmiləl şəhərdir. İllər ötsə də, bu hiss məndə hələ də yaşayır.

Şəhərdə aparılan tikinti işləri məni heyran edir. Görülmüş işləri alqışlayır, Azərbaycan Prezidentinə təşəkkür edirəm. Qısa müddət ərzində Bakıda bu qədər dəyişikliyin olmasına ürəkdən sevinirəm. Şadam ki, sizin insanları yaxşı nümunə göstərirlər, gəncləriniz də çox fəaldırlar.

Bakıda verəcəyi konsertdən danışan A.Puqaçova bildirmişdir ki, konsertdən əvvəl tamaşaçı qarşısında böyük məsuliyyət hiss edirəm və onların ümidlərini doğrultmağa çalışacağam. Mənim çıxışım kiçik bir tamaşa kimi olacaq, ancaq istisna hal ola bilər. Tamaşaçılardan isə istəyim odur ki, Bakıda son konsertimdə ifa edəcəyim mahnıların hər birini ürəklərinə yazsınlar və ömürlük özlərində saxlasınlar. Bir daha vurğulamaq istərdim ki, bu, mənim Bakıda sonuncu çıxışımdır.

Ancaq səfərimin son olacağını demirəm, çünki qonaq kimi qəbul etsəniz, sevinə-sevinə yenə də gələrəm.

A.Puqaçova vurğulamışdır ki, ulu öndər Heydər Əliyevin iştirakı ilə keçirilən konsertlər ən yaddaqalan konsertlərim olmuşdur. O, zalda olanda mən daha da ruhlanırdım. Mən onu çox sevirdim, o çox gözəl insan idi.

Azərbaycan.- 2009.- 5 sentyabr.- S. 2.