Milli Olimpiya Komitəsində Dünya Pauerliftinq Konqresinin prezidenti ilə görüş keçirilmişdir

Sentyabrın 5-də Milli Olimpiya Komitəsinin vitse-prezidenti Çingiz Hüseynzadə ölkəmizdə səfərdə olan Dünya Pauerliftinq Konqresinin prezidenti Mayk Sviney ilə görüşmüşdür.

Mayk Sviney Azərbaycanda idmanın inkişafı üçün hər cür şəraitin yaradıldığını vurğulamışdır. Ölkəmizin idman aləmində artan nüfuzundan danışan qonaq bir sıra mötəbər beynəlxalq yarışların keçirilməsi üçün Azərbaycanda əlverişli imkanların olduğunu söyləmişdir.

Çingiz Hüseynzadə Azərbaycanda idmanın bütün növlərinə dövlət tərəfindən yüksək diqqət göstərildiyini, gənclərin fiziki sağlamlığı üçün ölkəmizin hər yerində lazımi idman infrastrukturunun yaradıldığını bildirmişdir. Vitse-prezident Dünya Pauerliftinq Konqresi ilə Azərbaycanın müvafiq idman qurumlarının əməkdaşlığının gələcəkdə daha da genişlənəcəyinə ümidvar olduğunu vurğulamışdır.

Görüşdə iştirak edən Azərbaycan Pauerliftinq Federasiyasının prezidenti Ələddin Əliyev isə ölkəmizdə son illər gənclər arasında pauerliftinq idman növünə marağın artdığını bildirmiş və bu sahədə görüləcək işləri də diqqətə çatdırmışdır.

Həmçinin görüşdə idman sahəsində əməkdaşlığın perspektivləri barədə geniş fikir mübadiləsi aparılmışdır.

AzərTAc

Azərbaycan.- 2009.- 6 sentyabr.- S. 2.