Təhlükəsizliyimizin keşiyində dayananlara həsr edilmiş miniatür kitab

"İndiqo" nəşriyyatında çapdan çıxmış yeni miniatür kitab Azərbaycan milli təhlükəsizlik orqanlarının 90 illiyinə həsr edilmişdir. Bu nəşr Azərbaycan Respublikası Milli Təhlükəsizlik Nazirliyi və Respublika "Kitab" cəmiyyəti tərəfindən hazırlanmışdır.

"Azərbaycan Respublikası milli təhlükəsizlik orqanları-90" adlanan miniatür (40 x 45 mm) kitabda təhlükəsizliyimizin və ölkədə sabitliyin keşiyində sayıq dayanan orqanların fəaliyyətinin mahiyyətini təşkil edən maraqlı materiallar toplanmışdır.

Kitabın forzasında verilmiş Azərbaycanın xəritəsində ölkəmizin tarixi və mədəni abidələri əks edilmişdir. Kitabın ilk səhifələrində ulu öndər, ölkəmizdə milli təhlükəsizlik orqanlarının formalaşmasında çox böyük rol oynamış Heydər Əliyevin və onun işini uğurla davam etdirən Prezident İlham Əliyevin portretləri, ölkəmizin təhlükəsizliyinin etibarlı qarantı olan bu mühüm xidmətin əhəmiyyəti barədə ümummilli liderin və dövlətimizin başçısının söylədikləri dəyərli fikirlər verilmişdir.

Məlum olduğu kimi, 1997-ci ildə Prezident Heydər Əliyevin Sərəncamı ilə (Sərəncamın mətni kitabda verilir) mart ayının 28-i milli təhlükəsizlik orqanlarının peşə bayramı günü elan edilmişdir. Bu il martın 28-də xalqımız Azərbaycanda xüsusi xidmət orqanlarının yaradılmasının 90 illiyini qeyd etdi. Bu münasibətlə Prezident İlham Əliyevin milli təhlükəsizlik orqanlarının şəxsi heyətinə müraciəti də miniatür nəşrə daxil edilmişdir. Müraciətdə qeyd edilir ki, xüsusi xidmət orqanları Azərbaycanın siyasi və iqtisadi maraqlarının təmin edilməsində konstitusiya quruluşunun müdafiəsində, kəşfiyyat və əks-kəşfiyyat sahəsində, transmilli cinayətkarlığa qarşı mübarizədə və bir sıra başqa sahələrdə böyük uğurlar qazanmışlar.

Dövlətimizin başçısı xarici ölkələrin xüsusi xidmət orqanlarının bu yubiley mərasiminə gəlmiş yüksək vəzifəli nümayəndələri ilə görüşmüşdür. Görüşdə Azərbaycan Respublikası xüsusi xidmət orqanlarının uğurlu fəaliyyəti və beynəlxalq əməkdaşlığın mühüm rolu barədə söhbət olmuşdur. Rusiya Federal Təhlükəsizlik Xidmətinin direktoru, ordu generalı Aleksandr Bortnikov həmin görüşdəki çıxışında görkəmli dövlət xadimi və siyasi xadim, unudulmaz Heydər Əliyevin xatirəsinə ehtiramını bildirərək vurğulamışdır ki, Azərbaycan xalqının ümummilli lideri bütün ölkələrin təhlükəsizlik orqanlarının ilk növbədə beynəlxalq terrorizmə qarşı mübarizə sahəsində sıx əməkdaşlığına böyük əhəmiyyət verirdi.

345 səhifəlik miniatür nəşrdə xüsusi xidmət orqanlarının 90 illik yubileyinə həsr edilmiş təntənəli mərasimdə Azərbaycan milli təhlükəsizlik naziri Eldar Mahmudovun çıxışının mətni verilmişdir. Nazir ölkəmizdə xüsusi xidmət orqanlarının yaradılması tarixindən bəhs edərək Azərbaycan xalqının ümummilli liderinin bu orqanların təşəkkülündə əvəzsiz rolunu qeyd etmiş, bu sahədə yaranmış nəcib ənənələrə əməl etməyin, onları davam etdirməyin və zənginləşdirməyin vacibliyini vurğulamışdır.

Kitaba daxil edilmiş digər çıxışlar, o cümlədən Azərbaycan milli təhlükəsizlik orqanlarının veteranı Zülfüqar Tağıyevin çıxışı da böyük maraqla qarşılanmışdı.

Təntənəli yubiley mərasiminin iştirakçıları Azərbaycan Respublikasının Prezidenti, Ali Baş Komandan İlham Əliyevə müraciət qəbul etmişdilər. Miniatür kitabda həmin müraciətin mətni verilmişdir.

Yeni nəşrdə Milli Təhlükəsizlik Nazirliyinin N saylı hərbi hissəsində ulu öndər Heydər Əliyevin abidəsinin açılışı münasibətilə keçirilmiş mərasim, hərbi hissənin Döyüş Bayrağının təntənəli şəkildə meydana gətirilməsi, habelə Prezident İlham Əliyevin Milli Təhlükəsizlik Nazirliyinin Mədəniyyət Mərkəzinin əsaslı təmir edilmiş binası ilə tanış olması haqqında da məlumat verilir.

Azərbaycan və rus dillərində 150 nüsxə tirajla çap olunmuş miniatür kitab yüksək zövqlə seçilmiş 36 rəngli fotoşəkil ilə illüstrasiya edilmişdir.

Əminik ki, "Kitab" cəmiyyətinin yorulmaz sədri, Milli Təhlükəsizlik Nazirliyi yanında fəaliyyət göstərən dövlət komissiyalarından birinin üzvü Zərifə Salahovanın fəal iştirakı ilə hazırlanmış yeni nəşr miniatür kitab həvəskarlarının böyük marağına səbəb olacaqdır.

AzərTAc

Azərbaycan.- 2009.- 6 sentyabr.- S. 2.