Azərbaycanın bütün bölgələrində quruculuq işləri davam etdirilir

Azərbaycan dövləti iqtisadi yüksəliş mərhələsini yaşayır. Ölkəmizdə böyük uzaqgörənliklə həyata keçirilən iqtisadi inkişaf xətti bugünkü uğurlarımızı şərtləndirmişdir. Qlobal enerji-kommunikasiya layihələrinin reallaşdırılması, əhalinin firavan həyatının təmin olunmasına hesablanan çoxsaylı dövlət proqramlarının uğurla icrası, özəl sektorun ildən-ilə inkişafı qarşıda daha böyük perspektivlər açır. Ölkəmizin bütün regionlarında davam etdirilən tikinti-abadlıq işləri Azərbaycanı daha da qüdrətli dövlətə çevirməkdədir.

Prezident İlham Əliyevin imzaladığı "Azərbaycan Respublikası regionlarının sosial-iqtisadi inkişafı Dövlət Proqramı (2009-2013-ci illər)" respublikamızda yeni bir inkişaf mərhələsinin əsasını qoydu. Dövlət proqramında ölkə iqtisadiyyatının mühüm sahəsi olan kənd təsərrüfatının dinamik inkişaf etdirilməsi, əhalinin sosial həyat səviyyəsinin daha da yüksəldilməsi, yeni infrastrukturların yaradılması istiqamətində kompleks tədbirlərin görülməsi nəzərdə tutulub. Regionların sosial-iqtisadi inkişafına dair II Dövlət Proqramının ugurla icrası növbəti beş ildə bölgələrdə yaşayan əhalinin maddi rifah halının, sosial-məişət şəraitinin əhəmiyyətli dərəcədə yaxşılaşdırılmasına imkan yaradacaqdır.

Dövlət proqramında hər bir iqtisadi rayonun spesifik xüsusiyyətləri nəzərə alınmış və buna adekvat tədbirlərin görülməsi nəzərdə tutulmuşdur. Sosial-iqtisadi sahədə davamlı inkişafı təmin etmək məqsədilə 2009-2013-cü illəri əhatə edən II Dövlət Proqramının təsdiq edilməsi qarşıdakı illərdə investisiya mühitinin daha da yaxşılaşdırılması, qeyri-neft sektorunun inkişafının sürətləndirilməsi, sahibkarlığa dövlət dəstəyinin gücləndirilməsi kimi mühüm vəzifələrin həyata keçirilməsinə əlverişli şərait yaradacaqdır.

Son illər xarici investisiyaların əsasən qeyri-neft sektoruna yönəldilməsi ölkəmizdə bu sahənin sürətli inkişafından xəbər verir. Dünya iqtisadiyyatına inteqrasiya yolu seçmiş Azərbaycan bu gün regionun lider dövləti olaraq iqtisadi potensialını ildən-ilə artırmaqla inkişaf etmiş ölkələr səviyyəsinə yüksəlməkdədir. Aqrar sektorun xarici ticarət dövriyyəsi 2006-cı ildə 706 milyon, 2007-ci ildə 1,2 milyard dollar təşkil edirdisə, 2008-ci ildə bu rəqəm 1,3 milyard dollara yaxın olmuşdur.

İnvestisiyaların təşviqi üçün respublikada münbit səraitin yaradılması, daxili və xarici sərmayəni stimullaşdıran səmərəli metodlardan istifadə edilməsi, xarici kapital qoyuluşunun başlıca istiqamətinin regionların, qeyri-neft sektorunun inkişafına yönəldilməsi istiqamətində görülən kompleks tədbirlər müsbət nəticələr vermişdir. Bu ilin yeddi ayında əsas kapitala yönəldilən daxili investisiyaların həcmi xarici investisiyaları üstələyib. Belə ki, əsas kapitala yönəldilən vəsaitin 82,7 faizini daxili, 17,3 faizini isə xarici investisiyalar təşkil edib. Daxili investisiya əvvəlki ilin müvafiq dövrünün səviyyəsinə nisbətən 6,8 faiz artıb və bu investisiyanın 69,7 faizi dövlət, 30,3 faizi qeyri-dövlət mülkiyyətinə məxsus müəssisələrin payına düşür.

Cari ilin yeddi ayında əsas kapitala yönəldilən ümumi investisiyanın 73,3 faizindən qeyri-neft, 26,7 faizindən isə neft bölmələrində istifadə edilib ki, bu da əvvəlki ilin müvafiq dövrü ilə müqayisədə qeyri-neft bölməsinə yönəldilən investisiyanın həcminin 4,5 faiz çoxalması deməkdir.

Prezident İlham Əliyevin apardığı iqtisadi siyasətin məqsədyönlülüyü, obyektiv gerçəkliyə adekvatlığı, bu siyasətin ölkənin milli mənafelərini əks etdirməsi respublikanın hər bir vətəndaşında gələcəyə böyük inam və əminlik yaradır. Ölkə başçısının bölgələrə hər səfəri, görülən işlərlə tanış olması və qarşıya çıxan məsələlərin yerindəcə həlli üçün müvafiq tapşırıq və tövsiyələrini verməsi vətəndaşlar tərəfindən böyük ruh yüksəkliyi ilə qarşılanmaqdadır.

Ölkə başçısının bu günlərdə Hacıqabul rayonuna səfəri də mühüm sosial obyektlərin açılışı ilə əlamətdar olmuşdur. Prezident İlham Əliyev Hacıqabul rayonunda Uşaq Tibb Mərkəzinin, kərpic zavodunun açılışında iştirak etmiş, əsaslı yenidənqurma və bərpa işlərindən sonra istifadəyə verilən rayon mədəniyyət evi ilə tanış olmuş və xoş təəssüratlarını bölüşmüşdür. 2007-ci ilin avqustunda tikintisinə başlanan və müasir tələblər səviyyəsində inşası uğurla başa çatdırılan Uşaq Tibb Mərkəzi Hacıqabul rayonu ilə yanaşı, qonşu rayonların da əhalisinə yüksək tibbi xidmət göstərəcəkdir.
Hacıqabul Kərpic Zavodu ən müasir avdanlıqlarla təchiz olunmuşdur. İllik istehsal gücü 30 milyon şərti kərpic olan zavodda gün ərzində 8 çeşiddə 300 ton bişmiş kərpic istehsal olunur. Qeyd edək ki, Azərbaycanda ilk dəfə bu müəssisədə istehsal ediləcək böyük ölçülərdə və yeni növ kərpiclər həm divar, həm də tavan üçün nəzərdə tutulur. Zavodun bütün fəaliyyəti mərkəzləşdirilmiş proqramla robotlar vasitəsilə həyata keçirilir. Hacıqabulda istifadəyə verilən sosial obyektlərdə insanlar yüksək maaşlı işlə təmin edilmişlər. Prezident İlham Əliyev Hacıqabul rayonuna səfəri zamanı bildirmişdir: "Azərbaycan iqtisadiyyatı çox güclüdür. Bu böhranlı aylara - bütün dünyanı maliyyə böhranı bürüyüb - baxmayaraq, Azərbaycan iqtisadiyyatı irəliyə gedir. Bu ilin altı ayında təxminən 4 faiz iqtisadi artım vardır. Bizim büdcə gəlirlərimiz də lazımi səviyyədədir, büdcə xərcləri də vaxtında icra olunur. Sosial siyasətin uğurla davam etdirilməsi üçün, əlbəttə ki, Azərbaycanda iqtisadi islahatlar davam etdirilməlidir. Son illər ərzində bütün bölgələrdə böyük quruculuq işləri aparılır. Bütün bölgələrdə müasir infrastruktur - məktəblər, tibb ocaqları, elektrik stansiyaları yaradılır, yollar, qaz xətləri, su kəmərləri çəkilir, yəni, insanın yaşaması üçün hər şey edilir. Biz bu inkişafı Hacıqabul rayonunun timsalında da görürük. Rayonda son beş il ərzində müxtəlif məhsulların buraxılışı üç dəfə artıb, ümumi iqtisadi artım vardır. Bəzən bizdə - Azərbaycanda iqtisadi uğurlarımızı enerji sektoru ilə bağlayırlar. Amma baxın, Azərbaycanda qeyri-neft sektoru neft sektorundan daha böyük templərlə artır. Nə üçün?! Çünki biz öz imkanlarımızdan səmərəli istifadə edə bilmişik, infrastruktur layihələrinə vəsait ayırmışıq. Kənd təsərrüfatının, sahibkarlığın inkişafı üçün böyük vəsaitlər ayrılır, yardımlar edilir və beləliklə, Azərbaycan iqtisadiyyatı hərtərəfli inkişaf edir. Bu, hər bir ölkənin uğurunun təməlində dayanan məsələdir".

Azərbaycanın bütün bölgələrinin tarazlı inkişafı aparılan iqtisadi siyasət xəttinin düzgünlüyündən xəbər verir. Dünyanı cənginə almış maliyyə böhranına baxmayaraq, Azərbaycan iqtisadiyyatında artım tempinin qorunub saxlanması görülən qabaqlayıcı tədbirlər nəticəsində mümkün olmuşdur. İqtisadiyyatımızda qarşıdakı illərdə də inkişafın davamlı olacağı barədə nüfuzlu beynəlxalq qurumların verdikləri proqnozlar bir daha bu iqtisadi siyasətə alternativin olmadığını sübuta yetirir.

E.HACIALIYEV

Azərbaycan.- 2009.- 9 sentyabr.- S. 1.