Azərbaycan ilə Avropa Şurası arasında çox gözəl münasibətlər formalaşmışdır

Sentyabrın 11-də Milli Məclis Sədrinin birinci müavini Ziyafət Əsgərov ölkəmizdə səfərdə olan Avropa Şurası Yerli və Regional Hakimiyyətlər Konqresinin sədri vəzifəsini icra edən Yan Mikallefin rəhbərlik etdiyi nümayəndə heyəti ilə görüşmüşdür.

Qonaqları Azərbaycan parlamentində salamlamaqdan məmnun olduğunu bildirən Z.Əsgərov, ölkəmizlə Avropa Şurası arasında çox gözəl münasibətlərin formalaşdığını vurğulamış bu səfərin ikitərəfli əməkdaşlığın daha da inkişaf etdirilməsinə təkan verəcəyini söyləmişdir.

Azərbaycanın hakimiyyət orqanlarının, o cümlədən parlamentin yerli demokratiyanın inkişafına mühüm əhəmiyyət verdiklərini diqqətə çatdıran Milli Məclis Sədrinin birinci müavini, cari ilin dekabrında ölkəmizdə keçiriləcək bələdiyyə seçkilərinin bu istiqamətdə uğurlu addım olacağını bildirmişdir.

Milli Məclis Sədrinin birinci müavini Azərbaycanda bu il martın 18-də keçirilmiş referendumun nəticələrinə uyğun olaraq, Konstitusiyaya bir sıra əlavələrin və dəyişikliklərin edildiyini avropalı qonaqların diqqətinə çatdırmışdır. Vurğulamışdır ki, bunlardan biri yerli demokratiyanın inkişafı məsələsi ilə bağlıdır. Konstitusiyaya edilmiş dəyişikliklərə əsasən, bundan sonra bələdiyyələr ölkənin qanunverici orqanı olan Milli Məclis qarşısında hesabat verəcəklər. Eyni zamanda, referendumun nəticələrinə uyğun olaraq, ölkədə bələdiyyələrin birləşdirilməsi prosesi gedir. Biz hesab edirik ki, kiçik bələdiyyələrin böyük yerli özünüidarəetmə orqanlarına birləşdirilməsi ölkədə yerli demokratiyanın daha da inkişafına təkan verəcəkdir.

Ziyafət Əsgərov demişdir ki, Azərbaycan Avropa Şurasına üzv qəbul olunarkən bu nüfuzlu beynəlxalq qurum qarşısında götürdüyü öhdəliklərin böyük əksəriyyətini artıq yerinə yetirmişdir. Qalan bəzi öhdəliklərin reallaşdırılması istiqamətində fəal iş aparıldığını deyən Z.Əsgərov buna bariz nümunə kimi "Alvernativ xidmət haqqında" qanun layihəsini göstərmişdir. Bildirmişdir ki, artıq bu qanun layihəsinə bir sıra əlaqədar yerli orqanlar müsbət rəy vermişlər və yaxın vaxtlarda sənəd münasibət bildirmək üçün Avropa Şurasının Venesiya Komissiyasına göndəriləcəkdir.

Milli Məclis Sədrinin birinci müavini Azərbaycanın qarşıdakı parlament seçkilərində Avropa Şurası Yerli və Regional Hakimiyyətlər Konqresinin tövsiyələrini yerinə yetirməyə hazır olduğunu vurğulamışdır.

Nümayəndə heyətinin rəhbəri Yan Mikallef səmimi görüşə görə minnətdarlığını bildirərək təmsil etdiyi qurumun Azərbaycanda yerli demokratiyanın inkişafı istiqamətində atılan addımları yüksək qiymətləndirdiyini söyləmişdir. Qonaq Avropa Şurası Yerli və Regional Hakimiyyətlər Konqresinin Azərbaycanda bu ilin sonunda keçiriləcək bələdiyyə seçkilərini izləmək niyyətində olduğunu diqqətə çatdırmışdır. Vurğulamışdır ki, əgər Azərbaycanın hakimiyyət orqanlarının müsbət rəyi olsa, təmsil etdiyi qurum seçkiqabağı proseslərdə iştirak etməyə də hazırdır.

Görüşdə Azərbaycan ilə Avropa Şurası arasında əməkdaşlığın inkişaf perspektivləri, eləcə də qarşılıqlı maraq doğuran digər aktual məsələlər ətrafında geniş fikir mübadiləsi aparılmışdır.

***

Avropa Şurası Yerli və Regional Hakimiyyətlər Konqresinin sədri vəzifəsini icra edən Yan Mikallefin rəhbərlik etdiyi nümayəndə heyəti həmin gün Milli Məclisin Beynəlxalq münasibətlər və parlamentlərarası əlaqələr komitəsinin sədrı Səməd Seyidov ilə də görüşmüşdür.

AzərTAc

Azərbaycan.- 2009.- 11 sentyabr.- S. 2.