Naxçıvan Muxtar Respublikası Ali Məclisində müşavirə

Naxçıvan Muxtar Respublikası Ali Məclisində 2009-2010-cu tədris ilində ali məktəblərə qəbulun yekunu, təhsilin vəziyyəti və qarşıda duran vəzifələrlə əlaqədar müşavirə keçirilmişdir.

Naxçıvan Muxtar Respublikasının təhsil naziri Piri Nağıyev muxtar respublikanın təhsil sistemində aparılan islahatlardan, həyata keçirilən quruculuq işlərindən danışmış, ali məktəblərə qəbulun yekunu barədə məlumat vermişdir.

Naxçıvan Muxtar Respublikası Ali Məclisinin sədri Vasif Talıbov müşavirədə çıxış edərək demişdir: Verilən məlumatlar göstərir ki, təhsilin səviyyəsi ildən-ilə artır, inkişaf vardır. Qəbul imtahanlarında yüksək nəticə göstərən tələbələrin sayı ildən-ilə artmaqdadır. Bu onunla əlaqədardır ki, əsası ümummilli liderimiz Heydər Əliyev tərəfindən qoyulan təhsil islahatını Prezident İlham Əliyev uğurla davam etdirir. İndi dünyanın əksər ölkələrindən fərqli olaraq Azərbaycanda təhsil pulsuzdur. Məktəblər dövlət tərəfindən tikilir, dərsliklərlə, bədii ədəbiyyatlarla, kompüterlərlə təmin olunur, internetə qoşulur. Fərqlənən müəllimlərin əməyi, məktəblərin fəaliyyəti qiymətləndirilir.

Əgər keçən il 15 orta məktəbin məzunlarından ali məktəblərə qəbul olunmamışdısa, bu il onların sayı 10-a enmişdir.

Müşavirədə ümumtəhsil məktəblərinin kompüter texnologiyaları ilə təminatı da müzakirə olunmuş, təhsil ocaqlarında kompüterlə yanaşı, elektron lövhələrin qurulması mühüm vəzifələrdən biri kimi irəli sürülmüşdür. Qeyd olunmuşdur ki, Azərbaycan Respublikası Prezidentinin 2004-cü il 21 avqust tarixli sərəncamı ilə təsdiq edilmiş "Azərbaycan Respublikasında ümumtəhsil məktəblərinin informasiya və kommunikasiya texnologiyaları ilə təminatı Dövlət Proqramının icrası ilə əlaqədar muxtar respublikanın ümumtəhsil məktəblərində oxuyan hər 23 şagird 1 kompüter dəsti ilə təmin edilmişdir. Ümumilikdə muxtar respublikanın ümumtəhsil məktəblərinə 2335 kompüter dəsti verilmişdir ki, bunların 1179-u və ya 50,5 faizi internetə qoşulmuşdur. Muxtar respublikanın ümumtəhsil məktəblərində kompüterləşdirmə davam etdirilməli, hər 18 şagird 1 kompüterlə təmin olunmalıdır.

Ali Məclisin sədri Vasif Talıbov müşavirəyə yekun vuraraq demişdir ki, bizim gələcəyimiz bu gün yetişdirilən gənc nəsildən asılı olacaqdır. Biz savadlı kadr, yaxşı mütəxəssis, sənət, peşə sahəsi yetişdirmək istəyiriksə yaxşı təhsil verməli, öyrətməliyik. Təhsilin səviyyəsinin, bu sahədə nizam-intizamın yüksəldilməsi hər birimizin gündəlik fəaliyyətində əsas yer tutmalıdır.

AzərTAc

Azərbaycan.- 2009.- 12 sentyabr.- S. 3.