Xalqın Prezident İlham Əliyevə bəslədiyi misilsiz etimad YAP-ın nüfuzunu daha da möhkəmləndirən əsas amildir

- Əli müəllim, ölkəmiz yeni siyasi mövsümün astanasındadır. Oktyabrda parlamentin payız sessiyası başlayacaq, dekabrda bələdiyyə seçkiləri keçiriləcək. Bunlara keçməzdən öncə istərdik 2009-cu ilin geridə qoyduğumuz dövrünün siyasi-iqtisadi yekunları barədə qənaətlərinizi bölüşəsiniz...

- 2009-cu ilin arxada qalan dövrünü dəyərləndirmək istəsək, kifayət qədər ürəkaçan mənzərənin olduğunu görərik. İlk növbədə qeyd edilməlidir ki, bu dövr respublikamızın siyasi həyatı üçün xeyli uğurlu olub. Amma bu uğurlardan danışarkən öncə 2008-ci ilin oktyabrında keçirilmiş prezident seçkilərinə nəzər yetirməliyik. Çünki məhz ötənilki prezident seçkilərinin yaratdığı xoş ovqat 2009-cu ilin uğurlu siyasi həyatının başlaması üçün etibarlı təməl oldu. Bu mənada Azərbaycan vətəndaşlarının seçkilərdəki yüksək fəallığı və prezidentliyə namizəd cənab İlham Əliyevin seçicilər tərəfindən çox ciddi şəkildə dəstəklənməsi 2009-cu ilin siyasi ab-havasını şərtləndirən başlıca amildir.

Azərbaycan vətəndaşlarının növbəti dəfə də İlham Əliyevə inam ifadə etməsi çox ciddi əsaslara söykənirdi. Bu əsaslar Prezident İlham Əliyevin rəhbərliyi altında Azərbaycan iqtisadiyyatının sürətli inkişafı və bu yüksəliş əsasında həyatımızın köklü surətdə dəyişməsi ilə bilavasitə əlaqədardır. Cənab İlham Əliyevin birinci prezidentlik müddəti ölkəmizin tarixinə Azərbaycan iqtisadiyyatının dinamik və sürətli inkişaf dövrü kimi daxil oldu. İllik 25, 32, 34 faiz iqtisadi artımlar dünya iqtisadiyyatında çox nadir hallarda rast gəlinən inkişaf göstəriciləridir. Dinamik artımla müşahidə olunan bu iqtisadi göstəricilər Prezident İlham Əliyevin ilk beş il ərzində Azərbaycana layiqli rəhbərliyi sayəsində qazandığımız nailiyyətlərin yalnız bir qismi idi.

2008-ci il prezident seçkilərinin taleyini məhz bu uğurlar, xalqın Prezident İlham Əliyevin fəaliyyətinə verdiyi qiymət həll etdi. Eyni zamanda, vətəndaşlarımız qarşıdan gələn 5 il ərzində də Azərbaycanın inkişafına təminat olacağına inanaraq cənab İlham Əliyevi növbəti dəfə dəstəklədilər.

Belə bir əhvali-ruhiyyə və ovqatla Azərbaycan xalqı 2009-cu ilə qədəm qoydu. 2009-cu ildə ölkəmiz üçün siyasi fəallıq baxımından kifayət qədər yaddaqalandır. Bildiyiniz kimi, Azərbaycan Respublikasının Milli Məclisi Konstitusiyaya bir sıra dəyişikliklər edilməsi ilə əlaqədar referendum keçirilməsi üçün 2008-ci ilin sonuna yaxın qərar qəbul etmişdi. Həmin qərara əsasən, 2009-cu il mart ayının 18-də ölkəmizdə ümumxalq səsverməsi keçirildi, Konstitusiyamızın təkmilləşdirilməsini və xalqımızın maraqlarını özündə ehtiva edən əlavə və dəyişikliklər təsbit olundu. Referendumun uğurla başa çatması Azərbaycan vətəndaşlarının Prezident İlham Əliyevə dərin inamının, etimadının bilavasitə ifadəsi idi. Referendum bir yandan Azərbaycan qanunvericilik bazasının, Konstitusiyanın təkmilləşdirilməsi yönümündə atılan addım, digər tərəfdən isə, etiraf etmək lazımdır ki, iqtidarın həyata keçirdiyi siyasətə vətəndaşların inamını və etibarını özündə təcəssüm etdirən siyasi aksiya kimi müasir tariximizə həkk olundu.

Fərəhlə qeyd etməliyik ki, başlıca siyasi hadisələr sayılan bütün bu uğurlar dünya iqtisadiyyatının qədəm qoyduğu tənəzzül və böhran dövründə Azərbaycan iqtisadiyyatının davamlılığının və bu dayanıqlılığının bilavasitə, qəti şəkildə özünü ifadə etməsi fonunda baş verdi. Bütövlükdə dünya üçün 2008-ci ilin ikinci yarısı və 2009-cu il kifayət qədər ciddi iqtisadi təlatümlərlə yadda qalıb. Beynəlxalq maliyyə və iqtisadi tənəzzülün dünyanın bir çox dövlətlərini lərzəyə salmasına baxmayaraq, Azərbaycan - artıq bunu qəti şəkildə ifadə etmək mümkündür - böhranın təsirlərinə və təzyiqlərinə nə qədər dayanıqlı olduğunu bu müddət ərzində təsdiqləyə bildi. Azərbaycan iqtisadiyyatı digər ölkələrdə müşahidə olunan sıxıntıları yaşamadı. Əksinə, bu il də davamlı olaraq inkişaf göstəricilərini nümayiş etdirdi. İndi dünyada çox az ölkəni nümunə gətirmək mümkündür ki, 2008-2009-cu illərin dərin maliyyə-iqtisadi böhranı dövründə yüksəliş nəticələrini göstərə bilib. Bu azsaylı ölkələrdən biri də Azərbaycandır.

Bunun özü Azərbaycanda həyata keçirilən iqtisadi siyasətin nə qədər ciddi və etibarlı dayaqlar üzərində qərar tutduğunu təsdiqləyir.

Təbii ki, Azərbaycanın ictimai-siyasi həyatını Qarabağ problemi ilə əlaqədar danışıqlar prosesindən və bu prosesin yaratdığı atmosferdən kənarda təsəvvür etmək mümkün deyil.

Güman edirəm ki, bu istiqamətdə də arxada qoyduğumuz dövr insanlarımızı bəzən həyəcanlandıran, amma bütövlükdə prosesin ümidverici istiqamətdə getdiyini təsdiqləyən hallarla yadda qalıb.

- Qarşıdan bələdiyyə seçkiləri gəlir. YAP-ın seçkilərlə bağlı hazırlıq işləri nə yerdədir və partiyanın şansını necə dəyərləndirirsiniz ?

- Siyasi hadisələr baxımından 2009-cu il zəngin və uğurlu illərdən biri kimi yadda qalacaq.

Əvvəldə, qeyd etdiyim kimi, 2009-cu ildə referendum uğurla keçirildi. Bu ilin sonunda isə ölkəmizdə yerli özünüidarəetmə orqanlarına növbəti seçkilər keçiriləcək. Yeni Azərbaycan Partiyası həmişə seçkilərə ciddi yanaşıb. Çünki demokratik cəmiyyətdə siyasi partiyanın qarşısında duran başlıca vəzifə və missiya seçkilərin keçirilməsində iştirak etmək və əgər imkanı çatarsa, seçkilərdən qalib çıxmaqdır. Buna görə istənilən seçkilərdə YAP yaxından iştirak edir, o cümlədən də bələdiyyə seçkilərində. Bələdiyyə seçkiləri özünün miqyası və kütləviliyi ilə digər seçkilərdən bir qədər fərqlənir. Buna görə də, həmişə olduğu kimi, YAP yenə də seçki kampaniyasına start verilməzdən xeyli qabaq hazırlıq işlərinə başlayıb. Partiyamızın bələdiyyə seçkiləri ilə bağlı konsepsiyası da hazırdır. Əsas çağırışlarımızı, seçki ilə bağlı mühüm fəaliyyət istiqamətlərimizi və hədəflərimizi müəyyənləşdirmişik.

Biz mütləq şəkildə belə bir mövqedən çıxış edirik ki, bələdiyyə seçkiləri yerli özünüidarə orqanlarına keçirilən seçki olduğu üçün seçki kampaniyasının bütün ağırlığı yerlərə düşür. Ona görə bu kampaniyanın bütün ağırlığını YAP-ın yerli strukturları öz üzərlərinə götürməli olacaqlar. Artıq YAP-ın bütün strukturları konsepsiyamızın həyata keçirilməsi işinə səfərbər ediliblər. Bir neçə rayon təşkilatında seçki qərargahları yaradılıb və bu proses davam etməkdədir.

Bu mənada, deyə bilərəm ki, YAP-ın yerli təşkilatları seçkilərlə bağlı konkret addımların atılması ilə əlaqədar hazırlıq yox, bilavasitə praktik işlərin keçirilməsi mərhələsindədir.

Bələdiyyələrə namizədliklərin irəli sürülməsi də əsas etibarilə yerlərdə olmalıdır. İrəli sürülən namizədlərin təşviqatı bələdiyyələrin yerləşdiyi ərazini və seçici kontingentini əhatə etməlidir. Namizədlərin təşviqat kampaniyasının da bütün ağırlığı yerli strukturların üzərinə düşür. Nəticə etibarilə bütün bunlar YAP-ın yerli strukturlarının üzərinə böyük məsuliyyət qoyur.

Görülən işlər YAP-ın bələdiyyə seçkiləri ilə əlaqədar hazırlığının yüksək səviyyədə olmasından xəbər verir. Malik olduğu təcrübə, təşkilati və insani resurslar YAP-ın bu seçkini də yüksək səviyyədə başa vurmasına imkan verəcək.

Bir məsələni də xüsusilə qeyd etmək lazımdır ki, hər bir seçkinin taleyini vətəndaşların seçkilərdə yaxından iştirak edən partiyaya və onun rəhbərliyinə münasibəti həll edir. YAP Prezident İlham Əliyevin rəhbərlik etdiyi siyasi təşkilatdır. Təbii ki, Azərbaycan vətəndaşlarının Prezident İlham Əliyevə olan etimadı və onun həyata keçirdiyi siyasətə göstərdiyi dəstək dövlət başçısının rəhbərlik etdiyi partiyanın da ictimai nüfuzuna transfer etmiş olur. Prezident İlham Əliyevə etimad göstərən insanlar, təbii olaraq, YAP-ı dəstəkləyirlər. Bütün seçkilərdə biz bu dəstəyi açıq şəkildə müşahidə etmişik. İnanırıq ki, qarşıdan gələn bələdiyyə seçkilərində də Prezident İlham Əliyevin siyasətini dəstəkləyən Azərbaycan vətəndaşları və seçiciləri onun rəhbərlik etdiyi partiyanı və onun seçki konsepsiyasını da dəstəkləyəcəklər. Prezident İlham Əliyevin təşəbbüsü ilə ölkəmizdə həyata keçirilən regionların sosial-iqtisadi inkişafı proqramının reallaşması nəticəsində əldə edilən yüksək göstəricilər, regionların inkişafı və simasının köklü surətdə dəyişməsi bələdiyyə seçkilərində YAP-ın irəli sürdüyü namizədlərin dəstəklənməsi üçün etibarlı zəmin yaradır. Çox vacib bir məqamı da unutmayaq: xalqın Prezident İlham Əliyevə bəslədiyi misilsiz etimad YAP-ın nüfuzunu daha da möhkəmləndirən əsas amildir.

- YAP-ın irəli sürəcəyi namizədlər hansı kriteriyalar üzrə müəyyənləşəcək?

- Bələdiyyə seçkilərində namizədlərin irəli sürülməsi zamanı biz vacib meyarları nəzərə almalı və həmin mövqedən çıxış etməliyik. Bələdiyyələr kifayət qədər kütləvi idarəetmə orqanıdır. Bu il 1700-dən yuxarı bələdiyyəyə seçkilər keçiriləcək. İrəli sürülən namizədlərin sayı isə təxminən 20 min nəfər civarında olacaq. Azərbaycan miqyasında bu, kifayət qədər kütləvi seçkidir. Bu mənada qarşımızda duran ən başlıca vəzifələrdən biri ondan ibarətdir ki, 20 min bələdiyyə üzvlüyünə Azərbaycanın bütün regionlarında ən layiqli insanların namizədliyini irəli sürək. Bu namizədlər özlərini həmin bələdiyyələrin əhatə etdiyi ərazilərdə müsbət imicləri ilə tanıtmış insanlar olmalıdır. Ona görə biz çalışırıq ki, gərək vətəndaşların etibar etdiyi, inandığı partiya üzvlərinin namizədliyi irəli sürülsün.

Azərbaycanda artıq onuncu ildir ki, bələdiyyələr fəaliyyət göstərir. Bu müddətdə Azərbaycan vətəndaşlarının bələdiyyələrə olan münasibəti də tələbkarlığın artması baxımından dəyişibdir. Bu günə qədər biz bələdiyyələrin təcrübə toplaması və özünü ifadə etməsi mərhələsini yaşadığını qeyd edirdik. Artıq on yaşı keçəndən sonra bələdiyyələr özünü tanıtmaq və yaxud ifadə etmək mərhələsində olan yerli özünüidarəetmə orqanı kimi dəyərləndirilə bilməz. Onlar artıq insanların məişətinin yaxşılaşmasına, bölgələrdə problemlərin səmərəli şəkildə həllinin tapılmasına xidmət edən konkret layihələr irəli sürüb həyata keçirməlidirlər. Bu prizmadan yanaşdıqda indiki mərhələdə bələdiyyələrin qarşısında daha məsuliyyətli vəzifələr durur. Çünki, qeyd etdiyim kimi, vətəndaşlar bələdiyyələrə daha böyük tələbkarlıqla yanaşmağa başlayıblar. Demək, biz bələdiyyələrə namizədlər irəli sürərkən bu meyar mütləq şəkildə nəzərə alınmalıdır ki, onlar vətəndaşların bələdiyyələrə olan tələbkarlığına uyğun şəkildə fəaliyyət göstərə bilməlidirlər.

Bu gün ölkədə bələdiyyələrin fəaliyyət əmsalının yüksəldilməsi ilə əlaqədar ictimai düşüncədə çox ciddi müzakirələr getməkdədir. Bələdiyyələrin daha səmərəli fəaliyyət göstərə bilmələri, qarşılarında duran vəzifələri daha yaxşı və keyfiyyətli yerinə yetirmələri üçün qanunvericilik bazası daim təkmilləşdirilir. Ona görə bələdiyyələrə namizədlikləri irəli sürülən insanlar həm də bu vəzifələrin yerinə yetirilməsinə hazırlıqlı adamlar olmalıdır. Onlar bələdiyyə üzvü seçildikdən sonra təcrübə qazanmalı yox, artıq bu təcrübəyə yiyələnmiş insanlar olmalıdır. Bələdiyyələr beş il ərzində fəaliyyət göstərir və bu müddəti bələdiyyə üzvü özünün təcrübə toplaması üçün seçilən vaxt kimi dəyərləndirə bilməz. Bələdiyyələrə seçilən insanlar ilk gündən səmərəli fəaliyyət göstərməyə hazır olmalıdırlar. Çox vacib meyarlardan biri də bundan ibarətdir.
Bələdiyyələrə etimadın artırılması da seçiləcək bələdiyyə üzvlərinin qarşısında duran əsas vəzifələrdən biridir. Elə vətəndaşların namizədliyini irəli sürməliyik ki, onlara seçicilər tərəfindən yüksək etimad göstərilsin, inanılmış insanlar olsunlar.

Digər tərəfdən, bələdiyyələrə namizədliklər irəli sürülərkən gənclərə və qadınlara daha cəsarətlə üstünlük verməyə çalışmaq lazımdır. Bu gün bələdiyyə üzvlərinin cəmi 3,8 faizini qadınlar, 5,5 faizini isə gənclər təşkil edir. Azərbaycan gəncləri və qadınları öz potensiallarına uyğun olaraq bələdiyyələrdə təmsil olunmağa layiqdirlər. Konkret olaraq, YAP-ın üzvü olan qadınların və gənclərin say etibarilə və vətəndaş fəallığı baxımından bələdiyyələrdə daha çox sayda təmsil olunmağa imkanları var. Biz daha cəsarətlə həm qadınların, həm gənclərin bələdiyyələrdə təmsil olunmaq üçün namizədliklərini irəli sürəcəyik.

- Bəs müxalifətin şansı? Amma deyəsən, bəzi müxalifət partiyaları seçkilərə qatılmaq istəmirlər?

- 2004-cü ildə keçirilən bələdiyyə seçkilərində partiya olaraq yalnız YAP iştirak etdi. O zaman bəzi müxalifət partiyalarının seçkidə iştirak etməməsi məsələsi müzakirə olunurdu.

Həmin partiyalar bu müzakirələrdə iştirak etsələr də, seçkilərə qatılmadılar. Əgər siyasi partiya özünə hörmət edirsə, gücünə inanırsa, istənilən seçkidə, o cümlədən kütləviliyi ilə fərqlənən bələdiyyə seçkilərində mütləq şəkildə iştirak etməlidir. Çünki bələdiyyə seçkilərinə qatılmayan partiya ən azı bölgələrdə hansı nüfuza və ictimai çəkiyə malik olmasını müəyyənləşdirə bilməz. Özünə hörmət edən partiya qarşıdan gələn bələdiyyə seçkilərində iştirak edib, nə dərəcədə siyasi səhnədə yer tutmağa iddialı olduğunu və buna nə qədər hüququnun çatdığını sübut etməyə cəhd göstərməlidir.

Amma bu o qədər də asan məsələ deyil. Çünki ən azı çoxlu sayda bələdiyyə üzvlüyünə namizəd irəli sürmək lazımdır. Görəsən, seçkilərdə iştirak etmək istəməyən həmin partiyaların sosial bazası buna imkan verirmi? Üstəlik, irəli sürülən namizədlərin seçki kampaniyasını da təşkil etmək lazımdır. Həmin partiyaların namizədlərinin seçki kampaniyalarının həyata keçirilməsində iştirak edə biləcək insanları varmı? Bunlar müxalifət partiyalarının qarşısında duran əsas vəzifələrdir. Seçki kampaniyası ərəfəsində olduğumuza görə, ayrı-ayrı siyasi partiyaların nəyə, hansı gücə və resursa malik olduqları barədə fikirlər söyləmək istəməzdim.

Amma yenə də özünə hörmət edən bütün siyasi partiyaları bələdiyyə seçkilərində iştirak etməyə səsləyirəm. Bu, ən azı partiyaların nə dərəcədə Azərbaycan ictimaiyyəti tərəfindən dəstəkləndiyini müəyyənləşdirən bir barometrdir ki, bundan da istifadə etmək lazımdır.

- "Siyasi partiyalar haqqında" qanunun təkmilləşdirilməsi və ya yeni qanunun qəbulu ilə bağlı müzakirələr getdikcə qızışmaqdadır. Bu barədə fikirlərinizi bilmək maraqlı olardı.

- Bu gün Azərbaycanın siyasi mühiti kifayət qədər fəaldır. Bu fəallığın kökündə Azərbaycanda siyasi fəaliyyət üçün yaradılmış demokratik, insan hüquq və azadlıqlarının bütün parametrlərinin təmin edilməsi əsasında formalaşmış mühit dayanır. Təbii ki, Azərbaycanın siyasi həyatında partiyalar əhəmiyyətli rol oynayırlar: həm bilavasitə seçkilərdə iştirak edərək, həm ictimai-siyasi həyatımızda gündəmdə duran məsələlərlə əlaqədar mövqelərini ifadə edərək, həm də özlərinin mövcudluqlarını təsdiq etmək üçün müxtəlif addımlar ataraq. Belə bir mühitdə siyasi partiyalar özlərinə layiq yer tutmağa çalışırlar.

"Siyasi partiyalar haqqında" qanunun qəbul olunmasından uzun bir zaman keçib. Bu mənada müəyyən qədər "Siyasi partiyalar haqqında" qanunun dəyişdirilməsini istəyən insanların haqlı olduğunu düşünmək mümkündür. Mənim mövqeyim isə bundan ibarətdir ki, heç bir halda sadəcə qanunu dəyişdirmək və yaxud təzələmək xatirinə addım atmaq düzgün olmazdı. Həyat daim dəyişir. Bu gün qəbul olunan qanunın bir müddətdən sonra dəyişilməsinə ehtiyac yaranır.

Heç bir qanun həyatdan qabaq gedə bilməz. İstənilən halda qanun həyatın müəyyənləşdirdiyi, irəli sürdüyü tələblərə uyğun şəkildə olur. Uyğun olmadıqda, bu istiqamətdə hansısa addımlar atılır. Bu gün reallıq, gerçəklik bundan ibarətdir ki, "Siyasi partiyalar haqqında" qanunun qəbul olunmasından sonra Azərbaycanda siyasi partiyalarla bağlı həm təsəvvürlər əhəmiyyətli dərəcədə dəyişib, həm də partiyaların mövqelərində çox ciddi dəyişikliklər baş veribdir. Bütün bunlar "Siyasi partiyalar haqqında" qanuna yeni baxışları meydana gətirib.

Biz siyasi partiyalar haqqında qanunda hansı dəyişiklikləri etməliyik? Bu dəyişikliklər hansı meyarlar əsasında olmalıdır? Bu dəyişiklikləri edərkən Azərbaycanın siyasi mühitində siyasi partiyaların rolunu necə müəyyənləşdirmək niyyətindəyik? "Siyasi partiyalar haqqında" qanunu həyatımızın həm bugünkü, həm də perspektiv tələbləri baxımından dəyişdirməyə və bu dəyişikliklərin çox etibarlı kriteriyalarını müəyyənləşdirməyə hazırıqmı? Bu suala cavab verə bilərikmi ki, "Siyasi partiyalar haqqında" qanunu dəyişdirdikdən bir il ötdükdən sonra ona yeni dəyişikliklərin edilməsinə zərurət yaranmayacaq? Hazırda bu məsələlər Azərbaycanın siyasi mühitində aktiv müzakirə olunmaqdadır və son qənaətlər hələ müəyyənləşdirilməyib. Ona görə "Siyasi partiyalar haqqında" qanunu bu gün dəyişdirməliyik, yoxsa bu diskussiyalar davam etməlidir və bu addımı hamını qane edə biləcək yekun rəy və qənaət formalaşandan sonra atmalıyıq" sualına cavabı hələ tam tapmamışıq. "Siyasi partiyalar haqqında" qanunun təkmilləşdirilməsinə ehtiyac olduğunu qeyd etməklə yanaşı, bu istiqamətdə diskussiyaların aparılmasının davam etdirilməsinin tərəfdarıyam.

- Milli Məclisdə Yeni Azərbaycan Partiyasını təmsil edən deputatlar hər zaman maraqlı təşəbbüslər, vacib təkliflərlə çıxış edirlər. Bəs payız sessiyasında hakim partiyanın deputatları hansı təşəbbüslərlə çıxış etməyi planlaşdırırlar?

- Partiya olaraq bizim bütün diqqətimiz hazırda dekabr ayında keçiriləcək seçkilərə yönəlib. Gələn ay bələdiyyə seçkilərinə start veriləcək. Azərbaycanın qanunvericiliyinə uyğun olaraq seçkinin keçirilməsindən iki ay yarım əvvəl ona rəsmi şəkildə start verilir. Ona görə də bu payız sessiyası müddəti bizim üçün daha çox diqqətin bələdiyyə seçkilərinin keçirilməsinə yönəldilməsi ilə səciyyəvi olacaq.

Oktyabrda həm də Milli Məclisin payız sessiyası öz işinə başlayacaq. Milli Məclisin 2009-cu il yaz sessiyası kifayət qədər məzmunlu oldu. Uzun müddət idi ki, müzakirə olunan və ictimaiyyəti düşündürən "Təhsil haqqında" qanun ötən sessiya qəbul olundu və artıq qüvvəyə minib. Yaz sessiyasında Mənzil Məcəlləsi və digər çox əhəmiyyətli qanunvericilik aktları təsdiq olundu.

Güman edirəm ki, 2009-cu ilin payız sessiyası da məzmunlu olacaq. Bir neçə çox vacib qanun layihəsi müzakirəyə çıxarılacaq. Bütün bunlarla yanaşı, bir daha qeyd etmək istəyirəm ki, 2009-cu ilin payızında diqqətimiz daha çox bələdiyyə seçkilərinə yönələcək. Yerdə qalan digər məsələlər isə iş prosesində məlum olacaq.

- Türkiyə-Ermənistan əlaqələrinin qurulması ilə bağlı müzakirələr yenə gündəmdədir. Bu müzakirələr Azərbaycana nə vəd edə bilər?

- Hər halda hadisələr və kütləvi informasiya vasitələri ilə sızdırılan məlumatlar ondan xəbər verir ki, Qafqazda mövqelərin möhkəmləndirilməsi yönümündə ayrı-ayrı böyük güclərin səyləri yeni mərhələyə daxil olub. Vaxtilə Qafqazda mövqelərin möhkəmləndirilməsi burada münaqişələrin yaradılması vasitəsilə öz həllini tapırdı. Məsələn, Ermənistan-Azərbaycan, Dağlıq Qarabağ münaqişəsinin meydana gəlməsi ayrı-ayrı beynəlxalq güclərin Qafqazda mövqelərini möhkəmləndirmək yönündə həyata keçirdikləri siyasətin nəticəsidir. İndi mövqelərin möhkəmləndirilməsində başqa vasitədən istifadə olunur. Bu gün Dağlıq Qarabağ münaqişəsinin həlli vasitəsilə ayrı-ayrı beynəlxalq güclər Qafqazda mövqelərini möhkəmləndirməyə çalışırlar.

Yenə də obyekt qismində Dağlıq Qarabağ münaqişəsi dayanıb. Bu baxımdan əgər beynəlxalq güclər Qafqazda mövqelərini möhkəmləndirməyi Dağlıq Qarabağ probleminin nizama salınması vasitəsilə reallaşdırmağa çalışırlarsa, hesab edirəm ki, Azərbaycan bundan faydalanmağa çalışmalıdır. Belə ki, vaxtilə böyük güclərin siyasətlərindən Ermənistan Azərbaycan torpaqlarını işğal etmək üçün faydalana bilib. İndi isə Azərbaycan üçün bu imkandan faydalanmağa unikal şans yaranıb.

O ki qaldı Türkiyə ilə Ermənistan arasında diplomatik əlaqələrin qurulması yönündə başlanan müzakirələrin perspektivlərinə, təbii ki, biz bunu Ermənistan-Azərbaycan, Dağlıq Qarabağ münaqişəsinin nizama salınması ilə bilavasitə əlaqələndiririk. Əgər Türkiyə ilə Ermənistan arasında münasibətlərin normallaşması və bunun ardınca sərhədlərin açılması Dağlıq Qarabağ münaqişəsinin nizama salınması ilə paralel gedəcəksə və bu iki məsələ bir-biri ilə bağlı olacaqsa, biz buna pozitiv yanaşırıq. Bizim buna ümidlər bəsləməyimizə də ciddi əsaslar var. Bu əsasların ən birincisi Türkiyə ilə Azərbaycanın qardaşlığıdır. Digəri isə, Türkiyənin Baş naziri Rəcəb Tayyib Ərdoğanın Bakıda, Azərbaycan parlamentində çıxışı zamanı "Dağlıq Qarabağ münaqişəsi həll olunmadan sərhədlər açılmayacaq", - deyə verdiyi bəyanatdır. Biz bu bəyanata hörmətlə yanaşırıq. Güman edirəm ki, bu bəyanatın sahibləri də onun nə dərəcədə yüksək tribunadan səsləndirildiyini və nə dərəcədə dəyərə malik olduğunu dərk edir və sadəcə bəyanat xatirinə verilmədiyinin fərqindədirlər. Əgər bu iki proses paralel gedəcəksə, bir-biri ilə əlaqəli, bağlı şəkildə çözümlənməyə çalışılacaqsa, Azərbaycan bunu normal hesab edir. Əks halda bu, Azərbaycanın milli maraqlarına böyük zərbə vurulmasına yönəldilmiş hərəkət olacaqdır. Əlbəttə, biz bunu qəbul etmək istəmirik.

Digər tərəfdən, beynəlxalq güclərin Cənubi Qafqazla əlaqədar, bütövlükdə buradakı siyasi güclərin konstruksiyasının dəyişdirilməsi ilə əlaqədar böyük layihələr üzərində düşündükləri barədə informasiyalar yayılmaqdadır. Amma istənilən halda Azərbaycan özünün milli maraqlarını qoruması üçün kifayət qədər ciddi və təsirli rıçaqlara malikdir. Azərbaycanın həm regional müstəvidə, həm Avropa müstəvisində kifayət qədər möhkəmlənmiş mövqeyi var.

Azərbaycan həm də öz əhəmiyyətini əsaslı şəkildə artırmış və bunu sübut etmiş bir dövlətdir. Bütün bunların hamısı nəzərə alınmadan, Dağlıq Qarabağ münaqişəsi çözülmədən Qafqazda əhəmiyyətli bir dəyişiklik, o cümlədən bu regionda beynəlxalq iştirakçıların mövqelərinin konstruksiyasında dəyişikliklərin edilməsinə imkan verəcək addımın atılmasını qeyri-real hesab edirəm. Qafqazda sülh də, sabitlik də, əməkdaşlıq da yalnız və yalnız Dağlıq Qarabağ münaqişəsinin çözülməsindən asılıdır. Qafqazda sülhün yaranmasına, sabitliyin təmin olunmasına, əməkdaşlığın qurulmasına yönələn layihələr o zaman həyata keçirilə biləcək ki, Dağlıq Qarabağ münaqişəsi ədalətli şəkildə həllini tapsın: Azərbaycanın pozulmuş hüquqları bərpa edilsin, işğal olunmuş torpaqları geri qaytarılsın. Bundan sonra o layihələrin həyata keçirilməsi üçün zəmin yaradılmış olacaq.

- Bu gün YAP qarşısında duran vəzifələri necə yerinə yetirir, partiyanın yerli təşkilatlarının durumu nə yerdədir?

- YAP vəzifələrinin öhdəsindən uğurla gəlir. İstər seçkilərin keçirilməsi, istər partiyanın nüfuzunun gücləndirilməsi, həyata keçirilən siyasətin insanlar tərəfindən daha yaxşı qəbul olunması və təşviq edilməsi istiqamətində YAP bütün vəzifələrini ardıcıl şəkildə uğurla yerinə yetirir.

Hazırda ən böyük göstəricilərimizdən biri YAP-ın sıralarının gündən-günə genişlənməsidir. İndi YAP-ın sıralarında cəmləşən insanların sayı 490 minə yaxınlaşıb. Bu il ərzindəki dinamika belə bir fikri söyləməyə ciddi əsas verir ki, bir neçə aydan sonra, ola bilsin, ilin sonuna və yaxud, 2010-cu ilin əvvəllərinə YAP üzvlərinin sayı yarım milyona çatacaq. Güman edirəm ki, bu, sadəcə statistika deyil. Bu, Azərbaycan vətəndaşlarının Prezident İlham Əliyevin həyata keçirdiyi siyasətə münasibətidir. Prezident İlham Əliyevin siyasətini dəyərləndirərək dəstəkləyən insanların bir qismi, siyasətlə daha çox maraqlananlar, siyasətə qoşulmaq istəyənlərsə məhz YAP-ın sıralarına üzv yazılırlar. Öz siyasi baxışlarını və siyasi perspektivlərini YAP-la əlaqələndirirlər. Bu, YAP-ın həm ictimai nüfuzunu, həm ictimaiyyət tərəfindən dəstəklənməsini, həm də öz qarşısında duran vəzifələrin yerinə yetirilməsinə nə dərəcədə nail olmasını çox açıq şəkildə göstərir. YAP-ın Azərbaycanın bütün regionlarında təşkilatları var. Bu təşkilatlar səmərəli şəkildə fəaliyyət göstərirlər. Partiyanın qarşıya qoyduğu vəzifələrin yerlərdə həyata keçirilməsi istiqamətində çox əhəmiyyətli praktik addımlar atırlar.

YAP-da daxili demokratiya və nizam-intizam üzvi surətdə bir-biri ilə bağlıdır. YAP Azərbaycanda mövcud olan partiyaların ən demokratikidir. Öz daxili demokratiyasının qayğısına YAP qədər qalan başqa partiya yoxdur. İkinci tərəfdən, YAP-da daxili partiya nizam-intizamı da digər təşkilatlarda müşahidə olunmayan formada yaradılıb. Bu iki vacib elementin YAP-da üzvi surətdə qovuşması partiyamızın bütövlükdə və ayrı-ayrılıqda hər bir regionda uğurlarını təmin edən şərtlərdən biridir.

Yerli təşkilatlarla mərkəzi icra katibliyi arasında müntəzəm, demokratik və nizam-intizama əsaslanan əlaqələr var. Operativlik kifayət qədər yüksək səviyyədədir. YAP İdarə Heyətinin istənilən qərarı yerli təşkilatlar tərəfindən operativ şəkildə həyata keçirilir. Digər tərəfdən, yerli təşkilatların üzləşdiyi istənilən problemin vaxtında icra katibliyi və idarə heyəti qarşısında qaldırılması və həll edilməsi ilə əlaqədar praktiki addımların atılması sahəsində də kifayət qədər yüksək operativlik mövcuddur. Partiya nizamnaməsinin müəyyənləşdirdiyi tələblərin yerinə yetirilməsi ilə bağlı problemimiz yoxdur.

Partiya intizamını daha da yüksəltmək və yerli strukturların nizamnamənin tələblərinə uyğun şəkildə fəaliyyət göstərdiyinə bir daha əmin olmaq məqsədilə YAP-ın mərkəzi nəzarət-təftiş qrupu bir neçə ay bundan əvvəl on rayon təşkilatında təftiş aparıb. Həmin təftişin nəticələri də bütövlükdə yuxarıda söylədiyimiz fikirləri irəli sürməyə əsas verir. Təbii ki, iş olan yerdə nöqsan da olur. Ortaya çıxan nöqsanlar barədə vaxtında konkret tədbirlər görülür. Amma həmişə olduğu kimi, bu gün də belə bir mövqedə dayanmışıq ki, əldə olunan nailiyyətlər, uğurlar, qələbələr heç bir halda arxayınlıq üçün əsas verməməlidir. Siyasət arxayınlığı sevmədiyindən YAP-da da arxayınlıq əhvali-ruhiyyəsi yoxdur. Həyat daim yeni-yeni vəzifələr irəli sürür və həmin vəzifələri yerinə yetirmək üçün YAP daim mübariz əhvali-ruhiyyədədir. O cümlədən, 2009-cu ilin də ovqatı və əhvali-ruhiyyəsi bundan ibarətdir.

Rəşad CƏFƏRLİ

Azərbaycan.- 2009.- 15 sentyabr.- S. 4.