İsmayıl Serageldinə AMEA Tarix İnstitutunun fəxri doktoru diplomu təqdim edilmişdir

Sentyabrın 15-də AMEA-nın A.A.Bakıxanov adına Tarix İnstitutunda Misir Ərəb Respublikasının İsgəndəriyyə kitabxanasının direktoru İsmayıl Serageldinə bu elmi qurumun fəxri doktoru diplomu təqdim olunmuşdur.

İnstitut Elmi Şurasının bu münasibətlə keçirilən iclasında Azərbaycan-Misir Parlament Dostluq Qrupunun rəhbəri, Milli Məclisin deputatı Miri Qənbərov, qrupun üzvü deputat Qənirə Paşayeva, AMEA-nın vitse-prezidenti akademik Nailə Vəlixanlı, Misirin Azərbaycandakı səfiri Sabir Əbdülqədir Mənsur iştirak etmişlər.

İnstitutun direktoru, AMEA-nın müxbir üzvü, Milli Məclisin deputatı Yaqub Mahmudov doktor İsmayıl Serageldini səmimi salamlamış, Azərbaycan-Misir münasibətlərinin yüksələn xətlə inkişaf etdiyini xatırlatmış, əlaqələrin möhkəmlənməsində dövlət başçılarının rolunu vurğulamışdır. Qonağın bioqrafiyasından söz açan Y.Mahmudov demişdir ki, o, Qahirə Universitetində bakalavr, Harvard Universitetində magistr diplomları almış, sonuncu təhsil ocağında doktorluq müdafiə etmişdir. Hazırda İsgəndəriyyə kitabxanasının direktoru, Misir Prezidentinin bu kitabxana üzrə xüsusi nümayəndəsi, müvafiq 7 elmi araşdırma institutunun və 3 muzeyin rəhbəri, Misir Milli Məclisinin senatoru, Afrika Biotexnologiya Panelinin həmsədri, BMT baş katibinin Sivilizasiyalar Alyansı Ali Qrupunun üzvü, Dünya Bankının xüsusi məsləhətçisi (1992-2000-ci illərdə birinci vitse-prezidenti), XXI əsr Dünya Su Komissiyasının rəhbəri, Misir Mədəniyyət Şurasının xüsusi nümayəndəsidir. Dünyanın müxtəlif ölkələrinin 21 universitetinin fəxri doktoru, İnkişaf Etməkdə Olan Ölkələrin Elmlər Akademiyasının (İtaliya) vitse-prezidenti, 10-dan artıq akademiyanın üzvü, 60-a yaxın kitabın, 200-dən çox məqalənin müəllifidir.

Yaqub Mahmudov institut Elmi Şurasının 2009-cu il 11 sentyabr tarixli qərarını səsləndirmiş və fəxri doktor diplomunu İsmayıl Serageldinə təqdim etmişdir. Qonağa rəhbərlik etdiyi kitabxanada saxlanmaq üçün Qarabağın tarixinə dair 6 dildə çap edilmiş monoqrafiya, Azərbaycan və ingilis dillərində Naxçıvan tarixi, Azərbaycana aid Britaniya arxivindən götürülmüş sənədlər, Ermənistan ərazisində hökumətin qərarı ilə dəyişdirilmiş Azərbaycan yer adları kitabları da verilmişdir.

Doktor İ.Serageldin qeyd etmişdir ki, Azərbaycan qısa müddətdə demokratik dövlət qurmuş, lakin işğala məruz qalmışdır. Belə bir şəraitdə tarixini yaradır. AMEA-nın Tarix İnstitutu həqiqətin bağçasıdır. Əminəm ki, mənə verilən kitablarda həqiqət əks olunmuşdur. Mən bu həqiqətlərin dünya ictimaiyyətinə çatdırılması üçün internetin və rəhbərlik etdiyim kitabxananın imkanlarından səmərəli istifadə edəcəyəm.

Qonaq öz ölkəsi ilə Azərbaycan arasındakı əlaqələrin əhəmiyyətini vurğulamış, yüksək ad üçün təşəkkür etmişdir.

Yaqub Mahmudov məlumat vermişdir ki, AMEA-nın A.A.Bakıxanov adına Tarix İnstitutu ilə Misir Ərəb Respublikası İskəndəriyyə kitabxanası arasında elmi əməkdaşlıq haqqında müqavilə imzalanması nəzərdə tutulur.

İsgəndəriyyə kitabxanası dünyanın 100-dən artıq ölkəsinin, o cümlədən Azərbaycanın tanınmış kitabxanaları ilə əməkdaşlıq edir.

Azərbaycan.- 2009.- 16 sentyabr.- S. 5.