Naxçıvan Muxtar Respublikası Ali Məclisində görüş

Naxçıvan Muxtar Respublikası Ali Məclisinin sədri Vasif Talıbov Norveç Krallığının Azərbaycandakı səfiri Yon Ramberq və səfərdə onu müşayiət edən heyətlə görüşmüşdür.
Qonaqları səmimiyyətlə salamlayan Ali Məclisin sədri Azərbaycanın ayrılmaz hissəsi olan Naxçıvan Muxtar Respublikasının statusu, inzibati idarəetmə quruluşu, coğrafi mövqeyi, əhalinin məşğulluğu, elm, təhsil müəssisələri barədə məlumat vermişdir.

Ali Məclisin sədri Naxçıvan Muxtar Respublikasının 18 il əvvəl Ermənistan tərəfindən blokadaya alındığını, 400 min əhalisi olan muxtar respublikanın Azərbaycanın digər regionları ilə əlaqəsinin yalnız hava yolu ilə həyata keçirildiyini bildirmişdir.

Qeyd olunmuşdur ki, blokadanın vurduğu maddi və mənəvi zərərə baxmayaraq, muxtar respublika özü-özünü ərzaq və bir sıra mühüm sənaye məhsulları ilə təmin edir. Muxtar respublika Avropa Şurası Yerli və Regional Hakimiyyətlər Konqresində təmsil olunur.

Beynəlxalq təşkilatlarla əlaqəsi mövcuddur, özünün parlamenti və Konstitusiyası vardır.

Səfir Yon Ramberq Azərbaycan Respublikası Milli Elmlər Akademiyasının Naxçıvan Bölməsi və Norveçin "Tekna" təşkilatı tərəfindən birgə keçirilən seminarda iştirak etmək, bu tədbirdə sertifikatların təqdimatı, həmçinin muxtar respublikanın təhsil sistemi ilə tanış olmaq üçün Naxçıvana səfər etdiyini bildirmişdir.

Azərbaycanın bu qədim diyarına ilk dəfə Naxçıvan Muxtar Respublikasının 85 illik yubiley tədbirlərində iştirak etmək üçün gəldiyini xatırladan səfir ötən qısa müddət ərzində şəhərin daha da abadlaşmasının, gözəlləşməsinin onlarda xoş təəssürat yaratdığını vurğulamış, səmimi görüşə görə minnətdarlıq etmişdir.

Qonaqlar ikigünlük səfər müddətində Naxçıvan Dövlət Universitetinə də gedəcək, muxtar respublikanın bir sıra sənaye-istehsal müəssisələrinə baxacaq, Naxçıvan şəhərinin görməli yerləri ilə tanış olacaqlar.

AzərTAc

Azərbaycan.- 2009.- 17 sentyabr.- S. 4.