Rayon Mərkəzi Xəstəxanasının yeni binasında tikinti işlərinin gedişi ilə tanışlıq

Sentyabrın 18-də Prezident İlham Əliyev Qusar rayon Mərkəzi Xəstəxanasının yeni binasında tikinti işlərinin gedişi ilə tanış olmuşdur.

Binanın təməli ötən ilin sentyabrında Prezident İlham Əliyevin iştirakı ilə qoyulmuşdur. Xəstəxana binası müasir tələblərə cavab verən tibbi müəssisə kimi layihələndirilərək inşa edilir.

İnşaat işləri müasir texnologiya və qabaqcıl təcrübə əsasında həyata keçirilir.

Prezident İlham Əliyev xəstəxananın baş planına baxdı.

Bildirildi ki, 230 çarpayılıq xəstəxana 3,5 hektar ərazini əhatə edir. Burada cərrahiyyə, reanimasiya, diaqnostika, ultrasəs müayinəsi, stasionar diaqnostika, yoluxucu xəstəliklər və doğum şöbələri, vərəm dispanseri olacaqdır. Yeni səhiyyə ocağı ən müasir avadanlıqla təchiz ediləcəkdir. Tikinti işlərini Dövlət Neft Şirkətinin sifarişi ilə “Aristin” şirkəti həyata keçirir.

Xəstəxana dördmərtəbəli əsas korpusdan və yeddi köməkçi binadan ibarət olacaqdır.

Səhiyyə ocağı gələn il istifadəyə veriləcəkdir.

AzərTAc

Azərbaycan.- 2009.- 19 sentyabr.- S. 4.