Qırmızı qəsəbədə sakinlərlə görüş

Sentyabrın 18-də Qusara səfərini başa çatdıran Prezident İlham Əliyev yolüstü Qubanın Qırmızı qəsəbəsində yəhudi icmasının nümayəndələri ilə görüşmüşdür.

Dövlətimizin başçısını mehribanlıqla qarşılayan qəsəbə sakinləri Qubanın inkişafına göstərdiyi diqqət və qayğıya görə Prezidentə təşəkkür etdilər.

Prezident İlham ƏLİYEV dedi:

– Qubada gözəl, ən müasir səviyyədə xəstəxana, Müalicə-Diaqnostika Mərkəzi, yanında sizin istifadə etdiyiniz idman kompleksi istifadəyə verilmişdir. Bu gün elektrik stansiyası işə salındı.

SAKİNLƏR: Abadlıq işlərini görürsünüz.

Prezident İlham ƏLİYEV:

– Görürəm yaxşıdır. Qəsəbə də abadlaşıb, meydan da dəyişib.

Sakinlər Qubanın inkişafına göstərdiyi diqqət və qayğıya görə dövlətimizin başçısına minnətdarlıq etdilər. Onlar Prezident İlham Əliyevin tez-tez Qubaya səfər etməsindən, dövlətimizin başçısının hər səfərində rayonda yeni obyektlərin istifadəyə verilməsindən məmnunluqlarını bildirdilər.

Qubada quruculuq işlərindən razılığını bildirən Prezident İlham Əliyev dedi ki, qəsəbədə də abadlıq işləri gedir. Təzə yaşayış binaları, banklar tikilir. Qəsəbə doğrudan da gözəlləşir. Elə bil ki, bu meydan da böyüyübdür. Bütün bölgələr çalışmalıdır ki, paytaxta oxşasınlar. Əlbəttə ki, öz xüsusiyyətini saxlamaqla. Bir daha sizi təbrik edirəm. Bayramınızı təbrik edirəm. Cansağlığı arzulayıram.

Qəsəbə sakinləri dövlətimizin başçısını hərarətlə yola saldılar.

Sonra şəhərin mərkəzinə toplaşan Quba ictimaiyyətinin nümayəndələri dövlətimizin başçısını hörmət və ehtiramla yola saldılar. Onlar bir daha ölkəmizin inkişafı istiqamətində həyata keçirdiyi tədbirlərə görə Prezident İlham Əliyevə minnətdarlıqlarını bildirdilər.

Bununla da dövlətimizin başçısının Quba və Qusar rayonlarına səfəri başa çatmışdır.

AzərTAc

Azərbaycan.- 2009.-19 sentyabr.- S. 5.