Azərbaycanın xarici işlər naziri Nyu-Yorkda işgüzar səfərdədir

Xarici İşlər Nazirliyinin mətbuat xidmətindən bildirmişlər ki, sentyabrın 22-də nazir Elmar Məmmədyarov dünyanın ən nüfuzlu təhsil müəssisələrindən olan Nyu-Yorkdakı Kolumbiya Universitetinin Beynəlxalq və İctimai Məsələlər Məktəbində (SİPA) "Azərbaycanın xarici siyasəti: təsir edən amillər və prioritetlər" mövzusunda çıxış etmişdir.

Nazir E.Məmmədyarov təqdimatında Ermənistan-Azərbaycan, Dağlıq Qarabağ münaqişəsinin acı nəticələri, problemin həll olunmamasının regional və beynəlxalq vəziyyətə təsiri, nizamlanma prosesi və bununla bağlı ölkəmizin mövqeyi haqqında danışmışdır.

E.Məmmədyarov xarici siyasətimizə təsir edən digər amillər kimi Azərbaycanın geosiyasi mövqeyini və zəngin təbii ehtiyatlarını qeyd etmişdir. Nazir dövlət rəhbərliyi tərəfindən bu iki amildən istifadə edərək ölkənin regional və beynəlxalq əməkdaşlığının, iqtisadi inkişafının və sosial rifahının təmin edilməsi istiqamətində həyata keçirilən strategiya barədə, habelə Azərbaycanın təşəbbüskarı və iştirakçısı olduğu regional və beynəlxalq əhəmiyyətli enerji və infrastruktur layihələri haqqında məlumat vermişdir.

Ölkəmizin xarici siyasət idarəsinin rəhbəri beynəlxalq təhlükəsizliyin və asayişin təmin olunmasına Azərbaycanın verdiyi töhfə, əsasən də Əfqanıstan və İraqda beynəlxalq sülhyaratma əməliyyatları çərçivəsində apardığı fəaliyyəti, habelə həyata keçirdiyi mülki-infrastruktur, humanitar layihələr barədə danışmışdır.

Nazir E.Məmmədyarov, həmçinin Azərbaycanın Avratlantika strukturları, xüsusilə də NATO və Avropa İttifaqı ilə əməkdaşlıq çərçivəsində mövcud planlar və proqramlar barədə məlumat vermişdir.

Sonra o, iştirakçıların çoxsaylı suallarını cavablandırmışdır.

Tədbiri ABŞ-ın sabiq dövlət katibi Madlen Olbraytın yeni müstəqil dövlətlər üzrə xüsusi elçisi, SİPA-nın professoru, səfir Stefen Sestanoviç aparmışdır.

Həmin gün nazir E.Məmmədyarov Sloveniyanın xarici işlər naziri Samuel Sboqan ilə görüşmüşdür. Görüşdə Azərbaycan ilə Sloveniya arasında münasibətlərin hazırkı vəziyyəti və inkişaf perspektivləri, beynəlxalq təşkilatlar, o cümlədən BMT, habelə Azərbaycan-Avropa İttifaqı, xüsusilə də Aİ-nin "Şərq tərəfdaşlığı" proqramı çərçivəsində əməkdaşlıq barədə fikir mübadiləsi aparılmışdır.

Görüşdə Cənubi Qafqaz regionundakı vəziyyət də əsas müzakirə mövzusu olmuşdur.

Ermənistan-Azərbaycan, Dağlıq Qarabağ münaqişəsinə toxunan nazir E.Məmmədyarov problemin həlli ilə bağlı danışıqlar prosesi və nizamlanmaya dair ölkəmizin mövqeyi barədə məlumat vermişdir.

Bundan əlavə, sentyabrın 22-də E.Məmmədyarov Avropa İttifaqı Şurasının Cənubi Qafqaz üzrə xüsusi nümayəndəsi Piter Semnebi ilə görüşmüşdür.

Görüşdə Azərbaycan ilə Aİ arasında müxtəlif sahələr üzrə münasibətlərin hazırkı vəziyyəti və inkişaf perspektivləri, Aİ-nin "Şərq tərəfdaşlığı" proqramı çərçivəsində əməkdaşlıq, Ermənistan-Azərbaycan, Dağlıq Qarabağ münaqişəsinin nizamlanması, Cənubi Qafqazdakı vəziyyət, habelə enerji və digər mövzular üzrə məsələlər müzakirə olunmuşdur.

Azərbaycan.- 2009.- 24 sentyabr.- S. 3.