Azərbaycanın xarici işlər naziri ABŞ-da bir sıra görüşlər keçirmişdir

Azərbaycanın Xarici İşlər Nazirliyinin mətbuat xidmətindən bildirmişlər ki, Nyu-Yorka səfəri çərçivəsində sentyabrın 23-də nazir Elmar Məmmədyarov israilli həmkarı Aviqdor Liberman ilə görüşmüşdür.

Görüşdə Azərbaycan ilə İsrail arasında əlaqələrin hazırkı vəziyyəti və inkişaf perspektivləri, regional məsələlər müzakirə olunmuşdur.

Nazir E.Məmmədyarov Ermənistan-Azərbaycan, Dağlıq Qarabağ münaqişəsinin nizamlanması prosesi və münaqişənin həlli ilə bağlı ölkəmizin mövqeyi barədə məlumat vermişdir.

Görüşdə, həmçinin, ABŞ-dakı Azərbaycan və yəhudi icmaları arasında əməkdaşlığın indiki vəziyyətinə və inkişaf istiqamətlərinə dair fikir mübadiləsi aparılmışdır.

Həmin gün nazir E.Məmmədyarov Avropa İttifaqının xarici əlaqələr və Avropa qonşuluq siyasəti üzrə komissarı xanım Benita Ferrero-Valdner ilə görüşmüşdür.

Azərbaycan ilə Avropa İttifaqı arasında əməkdaşlığın hazırkı vəziyyəti və gələcək inkişafı məsələlərinin müzakirə olunduğu görüşdə B.Ferrero-Valdner Avropa İttifaqının ölkəmizlə münasibətlərin dərinləşməsinə böyük önəm verdiyini vurğulamış, respublikamızla mövcud əməkdaşlıq proqramlarının, xüsusilə də "Şərq tərəfdaşlığı" təşəbbüsü çərçivəsində əlaqələrin hər iki tərəfə böyük fayda gətirdiyini bildirmişdir.

Azərbaycanın Avropanın enerji təhlükəsizliyində vacib rol oynadığını qeyd edən B.Ferrero-Valdner Aİ-Azərbaycan əməkdaşlığında energetika sektorunun əhəmiyyətini vurğulamışdır. Komissar bildirmişdir ki, Avropa Komissiyası Azərbaycan ilə assosiativ müqaviləni imzalamaq qərarını vermiş və bu yaxınlarda müvafiq mandat hazır olacaqdır.

Nazir E.Məmmədyarov ölkəmizin Aİ ilə əməkdaşlığının gündən-günə daha da səmərəli xarakter aldığından məmnunluğunu bildirmiş, mövcud və nəzərdə tutulan təşəbbüslərin əlaqələrin genişləndirilməsinə töhfə verəcəyini vurğulamışdır. Regional təhlükəsizlik məsələlərinə toxunan nazir Ermənistan-Azərbaycan, Dağlıq Qarabağ münaqişəsinin ölkəmizin ərazi bütövlüyü çərçivəsində həllinin vacibliyini bildirmiş, nizamlama prosesinin hazırkı vəziyyəti və Azərbaycanın mövqeyi barədə məlumat vermişdir.

Dağlıq Qarabağ münaqişəsinin tezliklə nizamlanmasının vacibliyini bildirən B.Ferrero-Valdner Avropa Komissiyasının bu istiqamətdə töhfə verməyə hazır olduğunu vurğulamışdır.
Bundan əlavə, sentyabrın 23-də E.Məmmədyarov Avstriyanın xarici işlər naziri Mixael Şpindelegger ilə görüşmüşdür.

Görüşdə ölkələrimiz arasında əməkdaşlığın hazırkı vəziyyəti müzakirə olunmuş, habelə siyasi, iqtisadi, humanitar sahələrdə əlaqələrin daha da genişləndirilməsinə dair fikir mübadiləsi aparılmışdır.

Avstriyalı nazir ölkəsinin Azərbaycan ilə əməkdaşlığa böyük önəm verdiyini və Avstriya hökumətinin Azərbaycanda səfirlik açmaq qərarının bunun göstəricisi olduğunu demişdir.

Əməkdaşlıqda energetika sektorunun vacibliyini vurğulayan M.Şpindelegger Avstriyanın ölkəmizlə mütəmadi siyasi dialoqun aparılmasında, Cənubi Qafqazda gedən proseslərlə daha yaxından tanış olmaqda, əlaqələrin qeyri-enerji sektorunda da inkişaf etdirilməsində maraqlı olduğunu bildirmişdir.

Nazir E.Məmmədyarov əməkdaşlığın genişləndirilməsinin əhəmiyyətini vurğulayaraq bildirmişdir ki, Azərbaycanda Avstriyanın diplomatik nümayəndəliyinin, habelə bu ölkənin nüfuzlu AMV şirkətinin təmsilçiliyinin açılması onu göstərir ki, Avstriya əlaqələrin inkişafında maraqlıdır.

E.Məmmədyarov ölkələrimizin xarici işlər nazirlikləri arasında mütəmadi siyasi məsləhətləşmələrin aparılmasının vacibliyini vurğulamışdır.

Görüşdə Azərbaycan ilə Avstriya arasında beynəlxalq təşkilatlar, o cümlədən BMT çərçivəsində əməkdaşlıq və maraq doğuran digər məsələlər müzakirə olunmuşdur.

Müxtəlif beynəlxalq tədbirlərdə olduğu kimi, BMT Baş Məclisinin sessiyası çərçivəsində də Azərbaycanın xarici işlər naziri E.Məmmədyarov türkiyəli həmkarı Əhməd Davutoğlu ilə də görüşmüşdür.

Ölkələrimiz arasında əməkdaşlığın bütün istiqamətlərinin müzakirə olunduğu görüşdə Ermənistan-Azərbaycan, Dağlıq Qarabağ münaqişəsinin nizamlanmasının hazırkı vəziyyəti barədə fikir mübadiləsi aparılmışdır.

Həmin gün E.Məmmədyarovun Portuqaliyanın Xarici İşlər Nazirliyinin dövlət katibi Joao Qomes Kravinyo ilə görüşü olmuşdur.

Görüşdə Azərbaycan ilə Portuqaliya arasında əlaqələrin inkişaf etdirilməsi üçün xarici işlər nazirlikləri arasında təmasların daha da intensivləşdirilməsi, o cümlədən mütəmadi siyasi məsləhətləşmələrin aparılması, iki ölkə arasında müqavilə-hüquq bazasının gücləndirilməsi, Azərbaycanla Aİ arasında əlaqələrin genişləndirilməsinə Portuqaliyanın verə biləcəyi töhfə, "Şərq tərəfdaşlığı" proqramı çərçivəsində əməkdaşlıq imkanları müzakirə olunmuşdur.

Səfər çərçivəsində nazir E.Məmmədyarov Estoniyanın xarici işlər naziri Urmas Paetlə də görüşmüş, ölkələrimiz arasında əməkdaşlığın cari vəziyyətini və inkişaf perspektivlərini müzakirə etmişdir. Tərəflər siyasi əlaqələrin yüksək səviyyədə olduğunu bildirərək, yüksək səviyyəli qarşılıqlı səfərlərin davam etdirilməsinin əhəmiyyətini vurğulamışlar. Görüşdə "Azərbaycan Respublikası Hökuməti ilə Estoniya Respublikası Hökuməti arasında informasiya və kommunikasiya texnologiyaları sahəsində əməkdaşlıq haqqında Saziş" də imzalanmışdır. Bu sənədin ölkələrimiz arasında İKT sektorunda əməkdaşlığın genişləndirilməsi üçün yeni imkanlar açdığını bildirən tərəflər bu istiqamətdə konkret layihələrin müzakirəsi, ümumilikdə iqtisadiyyatın müxtəlif sektorlarında əməkdaşlıq imkanlarının araşdırılması üçün qarşılıqlı biznes missiyalarının əhəmiyyətini qeyd etmişlər. Nazirlər iki ölkə arasında müxtəlif sahələr üzrə hüquq-müqavilə bazasının gücləndirilməsi üçün sənəd layihələrinin mübadiləsi üzrə də razılığa gəlmişlər.

Nyu-Yorka səfəri çərçivəsində nazir E.Məmmədyarov ABŞ Prezidentinin Avrasiya enerji məsələləri üzrə xüsusi nümayəndəsi səfir Riçard Morninqstarla da görüşmüşdür. Görüşdə Azərbaycan ilə ABŞ arasında enerji sahəsində əməkdaşlıq məsələləri, habelə regional enerji layihələri ətrafında fikir mübadiləsi aparılmışdır.

Həmin gün E.Məmmədyarovun son görüşü Kubanın xarici işlər naziri Bruno Eduardo Rodriges Parrilya ilə olmuşdur. Tərəflər ölkələrimiz arasında əməkdaşlığın hazırkı vəziyyətindən məmnunluqlarını bildirmiş, əlaqələrin daha da möhkəmləndirilməsi üçün siyasi məsləhətləşmələrin davam etdirilməsi, iqtisadi əməkdaşlıq imkanlarının müzakirəsi, mədəni tədbirlərin həyata keçirilməsi, humanitar təhsil sahəsində, iki ölkənin diplomatik akademiyaları arasında əməkdaşlığın həyata keçirilməsi ətrafında fikir mübadiləsi aparmışlar. Nazirlər ölkələrin beynəlxalq təşkilatlar, xüsusilə də BMT çərçivəsində əməkdaşlığının davam etdirilməsinin vacibliyini bildirmişlər.

AzərTAc

Azərbaycan.- 2009.- 25 sentyabr.- S. 6.