Azərbaycanın xarici işlər naziri Nyu-Yorka səfəri çərçivəsində bir sıra görüşlər keçirmişdir

Azərbaycanın Xarici İşlər Nazirliyinin mətbuat xidmətindən bildirmişlər ki, nazir Elmar Məmmədyarov Nyu-Yorka səfəri çərçivəsində sentyabrın 24-də ABŞ-dakı yəhudi təşkilatlarının rəhbərləri ilə görüşmüşdür.

Azərbaycanda yüksək tolerantlıq şəraitindən məmnunluğunu bildirən yəhudi təşkilatlarının nümayəndələri İsrail Prezidenti Şimon Peresin ölkəmizə uğurlu səfərini, eləcə də Prezident İlham Əliyevin yəhudi xalqının milli yeni il bayramı - Roş-Ha-Şana münasibətilə yəhudi icmasına ünvanladığı təbriki yüksək qiymətləndirmişlər.

Nazir E.Məmmədyarov bildirmişdir ki, dinindən və etnik mənsubiyyətindən asılı olmayaraq insanlar arasında ənənəvi dostluq və qardaşlıq münasibətlərinin, nümunəvi tolerantlıq mühitinin hökm sürdüyü müasir Azərbaycan cəmiyyətində etnik-mədəni müxtəliflik milli dövlətçiliyimizin əsas sərvətlərindən biridir.

Vətənimizdə tarixən yəhudilərin sülh içində yaşadığını vurğulayan nazir, hazırda Azərbaycan ilə İsrail arasında səmərəli münasibətlərin inkişaf etdiyini və İsrail Prezidenti Şimon Peresin ölkəmizə səfərinin əməkdaşlığın inkişafına təkan verdiyini qeyd etmişdir.

Görüşdə regional məsələlər, Ermənistan-Azərbaycan, Dağlıq Qarabağ münaqişəsinin nizamlanması, Azərbaycanın regional və qlobal proseslərə münasibəti ətrafında fikir mübadiləsi aparılmışdır.

Həmin gün nazir E.Məmmədyarov İsveçrə Konfederasiyasının Federal Xarici İşlər Departamentinin rəisi xanım Mişlin Kalmi-Rey ilə görüşmüşdür.

Ölkələrimiz arasında münasibətlərin hazırkı vəziyyətinin və inkişaf perspektivlərinin, regional enerji layihələri və təhlükəsizlik məsələlərinin müzakirə olunduğu görüşdə əməkdaşlığın genişləndirilməsi üçün mövcud imkanlardan daha səmərəli şəkildə faydalanmağın əhəmiyyəti vurğulanmışdır.

M.Kalmi-Rey Azərbaycanın Avropanın enerji təhlükəsizliyində vacib rol oynadığını demişdir.

E.Məmmədyarov Ermənistan-Azərbaycan, Dağlıq Qarabağ münaqişəsi tənzimlənmədən regionda sülhün və təhlükəsizliyin təmin edilməsinin mümkünsüz olduğunu bildirmiş, problemin həlli ilə bağlı Azərbaycanın mövqeyi barədə ətraflı məlumat vermişdir.

Sentyabrın 24-də E.Məmmədyarovun növbəti görüşü İslam Konfransı Təşkilatının Baş katibi Ekmələddin İhsanoğlu ilə olmuşdur.

Görüşdə Azərbaycan-İKT əlaqələri yüksək qiymətləndirilmiş və əməkdaşlığın perspektivləri ətrafında fikir mübadiləsi aparılmışdır.

E.Məmmədyarov islam dünyası ilə əməkdaşlığın Azərbaycanın xarici siyasətinin əsas prioritetlərindən olduğunu vurğulamış və bu istiqamətdə İKT-nin rolunun vacibliyini qeyd etmişdir.

Ölkəmizin İKT ilə əməkdaşlığından məmnunluğunu bildirən E.İhsanoğlu, xüsusilə də Azərbaycanın sivilizasiyalararası dialoqun təşviq edilməsindəki rolunu və bu istiqamətdə həyata keçirdiyi tədbirləri təqdirəlayiq hesab etmişdir.

Görüşdə həmçinin regional təhlükəsizlik məsələləri müzakirə olunmuşdur. Nazir E.Məmmədyarov Ermənistan-Azərbaycan, Dağlıq Qarabağ münaqişəsinin Azərbaycanın suverenliyi, ərazi bütövlüyü və beynəlxalq səviyyədə tanınmış sərhədlərinin toxunulmazlığı çərçivəsində həllini dəstəkləyən İKT qətnamələrini və BMT çərçivəsində bu məsələyə islam ölkələri tərəfindən verilən dəstəyi yüksək qiymətləndirmişdir.

Nazir E.Məmmədyarovun livanlı həmkarı Fauzi Sallux ilə görüşündə ölkələrimiz arasında əməkdaşlıq əlaqələrinin inkişaf etdirilməsi, Yaxın Şərq və Cənubi Qafqazdakı vəziyyət və birgə maraq doğuran digər məsələlər müzakirə olunmuşdur.

Nazir E.Məmmədyarov Ermənistan-Azərbaycan, Dağlıq Qarabağ münaqişəsinin nizamlanması ilə bağlı ölkəmizin mövqeyi barədə məlumat vermiş və bu problem həll olunmadan regionda sülhün və təhlükəsizliyin təmin edilməsinin mümkünsüzlüyünü bildirmişdir.

Həmin gün nazir E.Məmmədyarovun son görüşü Qazaxıstanın dövlət katibi - xarici işlər naziri Kanat Saudabayev ilə olmuşdur. Nazirlər Azərbaycan ilə Qazaxıstan arasında əməkdaşlığın hazırkı vəziyyəti və inkişaf perspektivlərini, nəzərdə tutulan yüksək səviyyəli səfərlər, beynəlxalq təşkilatlar çərçivəsində əməkdaşlıq, regional təhlükəsizlik məsələlərini müzakirə etmişlər.

Nazir E.Məmmədyarov K.Saudabayevə Ermənistan-Azərbaycan, Dağlıq Qarabağ münaqişəsinin həlli ilə bağlı danışıqlar prosesi və nizamlanmaya dair ölkəmizin mövqeyi barədə məlumat vermişdir.

AzərTAc

Azərbaycan.- 2009.- 26 sentyabr.- S.3.