Bakıda Türkdilli Ölkələrin Parlament Assambleyasının şura iclası keçirilmişdir

Türkdilli Ölkələrin Parlament Assambleyasının Bakıda keçiriləcək sammitində iştirak etmək üçün Azərbaycanda səfərdə olan Türkiyə Böyük Millət Məclisinin sədri Məhmət Əli Şahin, Qazaxıstan Parlamenti Məclisinin sədri Oral Muxamedjanov və Qırğızıstan parlamentinin sədri Aytibay Taqayev sentyabrın 28-də Milli Məclisə gəlmişlər.

Əvvəlcə qonaqlarla Azərbaycan Respublikası Milli Məclisinin Sədri Oqtay Əsədov arasında təkbətək görüş olmuşdur.

Sonra assambleya şurasının iclası keçirilmişdir.

Milli Məclisin Sədri Oqtay Əsədov qonaqları səmimiyyətlə salamlamış və həmkarlarını əlamətdar hadisə münasibətilə təbrik etmişdir.

Milli Məclisin Sədri demişdir ki, 2008-ci il noyabrın 21-də İstanbuldakı Dolmabağça sarayında Türkiyə Böyük Millət Məclisinin ev sahibliyi ilə Türkdilli Ölkələrin Parlament Assambleyasının I konfransı keçirilmişdir. Bununla da dili, dini, adət-ənənələri, müştərək keçmişi olan xalqların daha da yaxınlaşması istiqamətində yeni bir addım atılmışdır.

Həmin iclasda assambleyanın birinci sammitinin Bakıda keçirilməsi qərara alınmışdır. Sammitin Bakıda keçirilməsi bizim üçün mühüm əhəmiyyət kəsb edir.

Görüşdə bildirilmişdir ki, türkdilli ölkələrin yerləşdiyi coğrafiya dünyanın siyasi və iqtisadi həyatında olduqca əhəmiyyətlidir. Bu qurum türkdilli ölkələr, eləcə də onların qanunverici orqanları arasında əməkdaşlığın möhkəmləndirilməsi, mühüm məsələlərdə ortaq mövqedən çıxış edilməsi baxımından çox əhəmiyyətlidir.

Sentyabrın 29-da Türkdilli Ölkələrin Parlament Assambleyasının ilk iclası keçiriləcəkdir. İclasda Azərbaycan, Türkiyə, Qazaxıstan və Qırğızıstan parlamentlərinin sədrləri çıxış edəcəklər.

Türkdilli Ölkələrin PA-nın birinci ümumi iclasında qurumun daimi katibliyinin yaradılması və Bakı bəyannaməsinin imzalanması gözlənilir.

AzərTAc

Azərbaycan.- 2009.- 29 sentyabr.- S. 4.